ព័ត៌មានជាតិ

ស្រីលង្កាតែងតាំងនាយករដ្ឋមន្ត្រីថ្មីជាបុរសធ្លាប់កាន់តំណែងនេះ៤ដងហើយ

បានផុស

២ years មុន

នៅ

ថ្ងៃសុក្រ ១៣ ឧសភា ២០២២

ដោយ

ប្រទេសស្រីលង្កាបានតែងតាំងនាយករដ្ឋមន្ត្រីថ្មីកាលពីថ្ងៃព្រហស្បតិ៍ ខណៈប្រធានាធិបតីកំពុងតស៊ូក្នុងការស្វែងរកច្រកចេញពីវិបត្តិសេដ្ឋកិច្ចដ៏ធ្ងន់ធ្ងរបំផុតមិនធ្លាប់មានក្នុងប្រវត្តិសាស្ត្ររបស់ខ្លួនគិតចាប់តាំងពីទទួលបានឯករាជ្យមក។

លោក Ranil Wickremesinghe អ្នកនយោបាយជើងចាស់ដែលធ្លាប់បានក្លាយជានាយករដ្ឋមន្ត្រីនៃប្រទេសកោះមួយនេះ៤លើកពីមុន និងនេះជាលើកទី៥ត្រូវតែព្យាយាមដោះស្រាយភាពវឹកវរផ្នែកហិរញ្ញវត្ថុ និងសម្របសម្រួលនយោបាយបែកបាក់ នៅពេលលោកត្រូវបង្កើតទម្រង់រដ្ឋាភិបាលចម្រុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«យើងកំពុងប្រឈមនឹងវិបត្តិ យើងត្រូវតែចាកចេញ»។ លោក Wickremesinghe បាននិយាយ នៅពេលលោកបានចាកចេញពីវត្តមួយក្នុងទីក្រុង Colombo ក្រោយពេលលោកស្បថចូលកាន់តំណែងនាយករដ្ឋមន្ត្រី។

បុរសវ័យ៧៣ឆ្នាំគឺជាអ្នកសេដ្ឋកិច្ចដែលមានបទពិសោធច្រើនក្នុងការដោះស្រាយជាមួយមូលនិធិរូបិយប័ណ្ណអន្តរជាតិ ដែលកាលពីពេលថ្មីៗទើបតែពិភាក្សាជាមួយប្រទេសស្រីលង្កាដើម្បីរកច្រកចេញ។

លោកក៏បានកសាងទំនាក់ទំនងជាមួយប្រទេសមហាអំណាចក្នុងតំបន់គឺឥណ្ឌា និងចិន ដែលជាអ្នកវិនិយោគសំខាន់ និងជាអ្នកផ្តល់ប្រាក់កម្ចីដែលមានឥទ្ធិពលលើប្រទេសកោះដែលស្ថិតនៅតាមបណ្តោយផ្លូវទឹកដឹកជញ្ជូនដ៏មមាញឹកពីអាស៊ីទៅអឺរ៉ុប។

លោកប្រធានាធិបតី Gotabaya Rajapaksa បានធ្វើការអបអរសាទរដល់នាយករដ្ឋមន្ត្រីថ្មី។

វិបត្តិបច្ចុប្បន្ននេះអាចជាបញ្ហាប្រឈមធ្ងន់ធ្ងរបំផុតមិនធ្លាប់មានសម្រាប់លោក Wickremesinghe។ ការគ្រប់គ្រងសេដ្ឋកិច្ចមិនល្អ បញ្ហាកូវីដ-១៩ និងតម្លៃថាមពលកំពុងកើនឡើង បន្ទាប់ពីការវាយប្រហាររបស់រុស្ស៊ីលើប្រទេសអ៊ុយក្រែនដែលបានធ្វើឲ្យប្រទេសមួយនេះរងទុក្ខយ៉ាងខ្លាំង៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសស្រីលង្កា