ព័ត៌មានជាតិ
គណបក្សប្រជាជនកម្ពុជា មិនទុកឱ្យពលរដ្ឋណាម្នាក់ស្លាប់ ដោយមិនបានជួយដោះស្រាយនោះឡើយ
គណៈកម្មាធិការគណបក្សគ្រប់ថ្នាក់ គ្រប់ផ្នែក ក្រុមការងារចុះមូលដ្ឋាន អង្គការមហាជន និងប្រព័ន្ធឃោសនារួមជាមួយអាជ្ញាធរគ្រប់បានធ្វើសកម្មភាពផ្សារភ្ជាប់ជាច្រើនទៅកាន់ប្រជាជន និងដោះស្រាយទុក្ខលំបាកដោយមិនដាក់ឱ្យប្រជាជនណាម្នាក់ត្រូវស្លាប់មិនបានជួយដោះស្រាយនោះឡើយ។
នេះជាការលើកឡើងរបស់លោក ប៊ុន លើត សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានក្រុមការងារគណបក្សចុះមូលដ្ឋានខេត្តកោះកុង ក្នុងពិធីសំណេះសំណាលជាមួយសមាជិក សមាជិកាបេក្ខជនក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២។
លោក ប៊ុន លើត បន្តថា ស្ទើរតែគ្រប់បញ្ហាលំបាកប្រជាពលរដ្ឋ ក្រុមការងារ រដ្ឋបាលឃុំសង្កាត់ ដឹកនាំដោយគណបក្សប្រជាជនកម្ពុជា បានស្វែងរកជួយរកដំណោះស្រាយជូនពលរដ្ឋប្រកបដោយសន្តិវិធីឈរលើគោលការណ៍ស្មារតីរួមគ្នាទទួលខុសត្រូវ។ ភាពជោគជ័យជាបន្តបន្ទាប់ដែលសម្រេចបាននេះ ក៏ដោយសារតែសាមគ្គីភាពផ្ទៃក្នុង តាមកម្មវិធីគោលនយោបាយ សេចក្តីសម្រេចរបស់គណៈអចិន្ត្រៃយ៍ស្តីពីផែនការរួមឆ្ពោះទៅកាន់បោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ខាងមុខ ស្របតាមស្ថានភាពជាក់ស្តែង។
លោកអនុប្រធានក្រុមការងារគណបក្សចុះមូលដ្ឋានខេត្តកោះកុង គូសបញ្ជាក់ដែរថា រយៈពេលប៉ុន្មានឆ្នាំចុងក្រោយនេះ ទោះបីស្ថិតក្នុងកាលៈទេសៈ និងស្ថានភាពរងត្រូវសម្ពាធយ៉ាងធ្ងន់ធ្ងរដោយវិបត្តិជំងឺកូវីដ១៩ ការបង្កសកម្មភាពប្រទូស្តរ៉ាយឥតឈប់ឈរពីសំណាក់ក្រុមប្រឆាំងជ្រុលនិយម និងមជ្ឈដ្ឋានអគតិនានាព្រមទាំងការវិវត្តន៍ដ៏ស្មុគស្មាញនៃសភាពការណ៍អន្តរជាតិក្តី។ ប៉ុន្តែរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត សម្តេចតេជោ ហ៊ុន សែន នាយករដ្ឋមន្ត្រី បានធ្វើឱ្យស្ថានទូទៅរបស់កម្ពុជានៅតែវិវត្តតាមទិសដៅវិជ្ជមានផ្តល់ភាពអនុគ្រោះដល់ដំណើរប្រព្រឹត្តទៅនៃជីវភាពសង្គមគ្រប់វិស័យ ការពារសុខសន្តិភាព ឯករាជ្យ អធិបតេយ្យ បូរណភាពទឹកដី ខឿនសន្តិសុខជាតិ និងស្ថិរភាពនយោបាយបម្រើដល់ការអភិវឌ្ឍន៍ទៅមុខ។
ទន្ទឹមនេះ លោក ប៊ុន លើត ក៏បានទាញចំណាប់អារម្មណ៍ដល់សមាជិកឱ្យបង្កើនការយកចិត្តទុកដាក់ថែមទៀត ទៅការធ្វើឱ្យប្រជាពលរដ្ឋសប្បាយរីករាយតាមរយៈដោះស្រាយបញ្ហានានាដែលជាតម្រូវការចង់បាន លើកកម្ពស់សេដ្ឋកិច្ចប្រាក់ចំណូល កាត់បន្ថយភាគក្រីក្រ កសាងហេដ្ឋារចនាសម្ព័ន្ធថ្មីៗ និងការពារសន្តិសុខសណ្តាប់ធ្នាប់ជូនរបស់ពួកគាត់បានល្អប្រសើរ។ ជៀសវាងបង្កបាតុភាពអសកម្មនាំថ្នាំថ្នាក់ចិត្តឈានដល់បាតុភាពអាក្រក់ដល់ការបោះឆ្នោតនៅពេលខាងមុខ។
ដូច្នេះលោកដាស់តឿនដល់សមាជិក សមាជិកពេញសិទ្ធិ និងបម្រុងជាបេក្ខភាពបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី ៥ ចងចាំថា ការបោះឆ្នោតជ្រើសរើសក្រុមប្រឹក្សា អាណត្តទី៥ ជាការប្រកួតប្រជែងដ៏ស្រួចស្រាល់តាមគោលការណ៍លិទ្ធប្រជាធិបតេយ្យ ដែលគណបក្សប្រជាជនកម្ពុជាត្រូវដណ្តើមយកជ័យជម្នះ ដើម្បីពង្រឹងការដឹកនាំរបស់គណបក្សនៅគ្រប់ថ្នាក់ ក្នុងដំណើរឆ្ពោះទៅកាន់ការបោះឆ្នោតសកល ថ្នាក់ជាតិនីតិកាលទី ៧ នាឆ្នាំ ២០២៣។
ទាក់ទិននឹងបញ្ហានេះដែរ លោកស្រី មិថុនា ភូថង ប្រធានគណៈកម្មាធិការគណបក្សប្រជាជនកម្ពុជាខេត្តកោះកុង បង្ហាញឱ្យដឹងថា គិតត្រឹមថ្ងៃទី ៤ ខែមីនា កន្លងទៅ គណៈកម្មាធិការគណបក្សក្រុងស្រុកបានដាក់ពាក្យចុះបញ្ជីបេក្ខជនឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី ៥ ឆ្នាំ ២០២២ របស់គណបក្សប្រជាជនកម្ពុជារួចរាល់ទាំង ២៩ ឃុំសង្កាត់ ដែលមានបេក្ខជនសរុបចំនួន ៤២០ នាក់ ស្ត្រី ១១៩ នាក់ ក្នុងនោះបេក្ខជនពេញសិទ្ធិចំនួន ១៦៧ ស្ត្រី ៥២ នាក់។
ចំពោះលទ្ធផលចាប់ឆ្នោតលំដាប់លេខរៀងរបស់បណ្តាគណបក្សនយោបាយដោយគិតត្រឹមថ្ងៃទី ២៩ ខែមីនា ឆ្នាំ ២០២២ គណៈកម្មាធិការគណបក្សឃុំសង្កាត់បានចួលរួមចាប់ឆ្នោតចំនួន ២៩ ឃុំសង្កាត់ ក្នុងនោះគណបក្សប្រជាជនកម្ពុជាទទួលបានលេខរៀងទី ១ ចំនួន ១៦ ឃុំ លេខរៀងទី ២ ចំនួន១២ ឃុំ និងលេខរៀងទី ៣ ចំនួន ១ ឃុំ។ ដោយឡែកការដាក់ពាក្យចុះបញ្ជីភ្នាក់ងារគណបក្សនយោបាយ គិតត្រឹមថ្ងៃទី ២៩ ខែមីនា កន្លងទៅ គណៈកម្មាធិការគណបក្សឃុំសង្កាត់ បានដាក់ពាក្យចុះបញ្ជីភ្នាក់ងារគណបក្សចូលរួមសង្កេតការណ៍មើលការបោះឆ្នោត និងរាប់សន្លឹកឆ្នោតសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ សរុបចំនួន ២៩ លើ ២៩ ឃុំសង្កាត់ ស្មើនឹង ១៨៧ ការិយាល័យបោះឆ្នោតទូទាំងខេត្តកោះកុង ដោយមានភ្នាក់ងារសរុបចំនួន ៣៧៤ នាក់។
លោកស្រី មិថុនា ភូថង ក៏បានតម្លៃខ្ពស់ពីកិច្ចប្រឹងប្រែងដោះស្រាយបញ្ហាកន្លងទៅរបស់រដ្ឋបាលឃុំសង្កាត់ទៅកាន់ប្រជាពលរដ្ឋ។ លោកជំទាវ ជឿជាក់យ៉ាងមុតមាំថា សមាជិក សមាជិកាពេញសិទ្ធិ និងបម្រុងជាបេក្ខភាពឈរបោះឆ្នោតទាំងអស់បន្តខិតខំបំពេញការងារដែលគណបក្សប្រគល់ជូន ដើម្បីឈានទៅសម្រេចបានគោលដៅរួម គឺបម្រើផលប្រយោជន៍ប្រជាជន និងការអភិវឌ្ឍន៍នៅមូលដ្ឋានរៀងៗខ្លួនលើគ្រប់វិស័យក្នុងអាណត្តទី៥៕
អត្តបទ៖ សិរីវឌ្ឍនៈ
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២៤ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង