អ្នកនាំពាក្យ៖ សិស្សជាង២៧ម៉ឺននាក់កំពុងរីករាយជាមួយការទទួលទានអាហារពេលព្រឹកតាមសាលារៀនឡើងវិញ

លោក រស់ សុវាចា អ្នកនាំពាក្យក្រសួងអប់រំយុវជននិងកីឡា បានមានប្រសាសន៍នៅថ្ងៃទី១៨ ខែឧសភានេះថា
សិស្សានុសិស្សប្រមាណជាង២៧ម៉ឺននាក់នៅតាមសាលាគោលដៅចំនួន១១១៣ នៅទូទាំងប្រទេសកំពុងរីករាយជាមួយការទទួលទានអាហារពេលព្រឹកតាមសាលារៀនឡើងវិញ បន្ទាប់ពីបានផ្អាកដោយសារការរារត្បាតជំងឺកូវីដ១៩ ក្នុងរយៈពេលជាង២ឆ្នាំមកនេះ។

លោកបានបន្តថា បន្ទាប់ពីរាជរដ្ឋាភិបាលកម្ពុជាបានបើកឱ្យដំណើរការឡើងវិញនូវសាលារៀនទូទាំងប្រទេស, កម្មវិធីផ្តល់អាហារតាមសាលារៀនក៏ត្រលប់មកវិញផងដែរ។

លោកបានបន្តថា កម្មវិធីនេះបានផ្តល់អាហារក្តៅៗពេលព្រឹកសម្បូរជីវជាតិដល់សិស្សានុសិស្សរហូតដល់ជាង ២៧ម៉ឺននាក់ នៅតាមសាលាគោលដៅចំនួន ១១១៣ នៅទូទាំងប្រទេសជារៀងរាល់ព្រឹក និងបានជួយលើកកម្ពស់កសិផលក្នុងសហគមន៍ ព្រោះបន្លែនិងសាច់សម្រាប់កម្មវិធីនេះ ត្រូវបានផលិតក្នុងសហគមន៍នៅជុំវិញតំបន់គោលដៅនីមួយៗ។

លោកបានបន្ថែមទៀតថា ក្នុងនោះរាជរដ្ឋាភិបាលកម្ពុជាផ្តល់ជូនអាហារជារៀងរាល់ព្រឹកដល់សិស្សចំនួនជាង៥ម៉ឺននាក់ នៅតាមសាលាចំនួន ២៩០ និងសិស្សានុសិស្សចំនួនជាង ២២ ម៉ឺននាក់នៅតាមសាលាចំនួន ៨២៣ ទៀត ត្រូវបាន​ផ្តល់ជូនដោយកម្មវិធីស្បៀងអាហារពិភពលោក។

លោកបានបន្ថែមថា «សិស្សានុសិស្សដែលកំពុងសិក្សាក្នុងសាលាគោលដៅនៅទូទាំងប្រទេស បានបង្ហាញអារម្មណ៍រីករាយបន្ទាប់ពីបានទទួលទានអាហារពេលព្រឹកនៅសាលារៀនឡើងវិញ»។

លោក​ រស់ សុវាចា បានបញ្ជាក់ថា អាហារូបត្ថម្ភល្អចូលរួមលើកកម្ពស់គុណភាពរៀន និងបង្រៀន ថែមទាំងបណ្តាលឲ្យគុណភាពជីវិតរឹតតែប្រសើរ។ ក្រសួងអប់រំ យុវជននិងកីឡាស្វាគមន៍ និងថ្លែងអំណគុណចំពោះកិច្ចសហការជាមួយក្រសួង-ស្ថាប័ន ដៃគូរអភិវឌ្ឍន៍ដូចជាអង្គការស្បៀងអាហារពិភពលោក និងគ្រប់ភាគីពាក់ព័ន្ធដើម្បីបន្តលើកកម្ពស់អាហារូបត្ថម្ភ និងសុខភាពសិក្សារបស់អ្នកសិក្សានិងភាគីពាក់ព័ន្ធតាមរយ:គ្រប់រូបភាព៕

អត្ថបទ៖ សំអឿន