Connect with us

ព័ត៌មានជាតិ

ប្រធានវេទិកាសេដ្ឋកិច្ចពិភពលោក មានគម្រោងមកបំពេញទស្សនកិច្ចនៅកម្ពុជា ហើយចង់ឃើញការរីកចម្រើនដោយផ្ទាល់របស់កម្ពុជា

បានផុស

នៅ

លោកសាស្ត្រាចារ្យ ក្លោស ឆ្វាប់ (Klaus Schwab) ស្ថាបនិក និងជាប្រធានវេទិការសេដ្ឋកិច្ចពិភពលោកមានគម្រោងមកបំពេញទស្សនកិច្ចនៅកម្ពុជា តាមការអញ្ជើញរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ពីព្រោះលោកបានលឺពីប្រទេសកម្ពុជាច្រើនណាស់ ដូច្នេះលោកចង់ឃើញការរីកចម្រើនដោយផ្ទាល់។ នេះបើតាមការបញ្ជាក់របស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី នៅក្នុងសន្និសីទសារព័ត៌មាន ស្ដីពី លទ្ធផលដែលសម្ដេច​តេជោ ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា​ ទៅចូលរួមកិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស (Davos) ប្រទេសស្វីស រយៈពេល ៥ថ្ងៃ នាព្រឹកថ្ងៃទី ២៦ ខែឧសភានេះ។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក កៅ គឹមហួន ខណៈពេលដែលសម្តេចតេជោ ហ៊ុន សែន អញ្ជើញទៅចូលរួមកិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស (Davos) ប្រទេសស្វីស ហើយនៅទីនោះ សម្តេចបានជួបពិភាក្សាជាមួយលោកសាស្ត្រាចារ្យ Klaus Schwab ហើយនៅក្នុងកិច្ចពិភាក្សានោះ សម្តេចបានអញ្ជើញលោកសាស្ត្រាចារ្យ មកបំពេញទស្សនកិច្ចនៅកម្ពុជា តាមពេលវេលាសមស្របណាមួយ។ លោក កៅ គឹមហួន បានអះអាងថា លោកសាស្ត្រាចារ្យ បានទទួលយកការអញ្ជើញរបស់សម្ដេចតេជោនាយករដ្ឋមន្ត្រី ដើម្បីបំពេញទស្សនកិច្ចនៅប្រទេសកម្ពុជា។

លោកសាស្ត្រាចារ្យ Klaus Schwab បានឲ្យដឹងថា ដោយសារតែដំណើរទស្សនកិច្ចនេះ ជាទស្សនកិច្ចលើកដំបូង ហើយជាទស្សនកិច្ចលើកទីមួយ នៅព្រះរាជាណាចក្រកម្ពុជាផងដែរនោះ លោកចង់ឃើញការរីកចម្រើននៅប្រទេសកម្ពុជាដោយផ្ទាល់ ពីព្រោះលោកបានលឺច្រើនណាស់ពីប្រទេសកម្ពុជា តែមិនដែលបានឃើញផ្ទាល់នោះទេ។

ជាមួយគ្នានេះ លោកសាស្រ្តាចារ្យ មានផែនការធ្វើការជាមួយប្រទេសកម្ពុជាច្រើនណាស់ ជាពិសេសលោកមានគម្រោងបង្កើតមជ្ឈមណ្ឌលថ្មីមួយ ដើម្បីគាំទ្រដល់បច្ចេកវិទ្យានៅប្រទេសកម្ពុជា។ សម្រាប់កិច្ចការនេះ លោកនឹងបញ្ជូនក្រុមការងារ មកធ្វើការជាមួយមន្ត្រីកម្ពុជានាពេលខាងមុខ។ ពាក់ព័ន្ធនឹងគម្រោងនេះ សម្ដេចតេជោនាយករដ្ឋមន្ត្រី បានប្រកាសស្វាគមន៍ ហើយអះអាងថា នឹងបញ្ជូនមន្ត្រី ដើម្បីធ្វើការ ជាមួយលោកសាស្ត្រាចារ្យដោយផ្ទាល់៕

អត្ថបទ៖ កោះកែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម