សម្ដេចតេជោ ហ៊ុន សែន គូសបញ្ជាក់ជាថ្មីថា ការបោះឆ្នោតនាឆ្នាំ ២០២៣ សម្ដេចនៅតែជាបេក្ខជននាយករដ្ឋមន្ត្រី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ជាថ្មីថា សម្រាប់ការបោះឆ្នោតនាឆ្នាំ ២០២៣ខាងមុខនេះ សម្ដេចនៅតែជាបេក្ខជននាយករដ្ឋមន្ត្រី ដដែល។ រីឯកូនប្រុសរបស់សម្ដេច គឺលោកឧត្ដមសេនីយ៍ឯក ហ៊ុន ម៉ាណែត ជាបេក្ខជនបន្តវេននៅពេលណាមួយនោះ គឺទុកបញ្ហានេះមួយ​អន្លើសិន។

សម្ដេចតេជោ ហ៊ុន សែន បានថ្លែងថា គណបក្សប្រជាជនកម្ពុជា បានសម្រេចជាផ្លូវការរួចហើយ អំពីអនាគតនៃបេក្ខភាពនាយករដ្ឋមន្ត្រីបន្តវេន គឺលោកឧត្ដមសេនីយ៍ឯក ហ៊ុន ម៉ាណែត។ ប៉ុន្តែ បន្តវេននៅពេលណាមួយនោះ គឺទុកបញ្ហានេះមួយ​អន្លើសិន។

សម្ដេចតេជោនាយករដ្ឋមន្ត្រី បានឲ្យដឹងបន្តថា សម្រាប់​ការបោះឆ្នោតនាឆ្នាំ ២០២៣ខាងមុខនេះ សម្ដេចនៅតែបេក្ខជននាយករដ្ឋមន្ត្រី។ រីឯកូនប្រុសរបស់សម្ដេច គឺលោកឧត្ដមសេនីយ៍ឯក ហ៊ុន ម៉ាណែត ជាបេក្ខជនបន្តវេន ដែលទទួលបានការសម្រេច ពីថ្នាក់ដឹកនាំគណបក្សប្រជាជនកម្ពុជារួចហើយ។  

«ហើយសម្រាប់អ្នកដែលទិតៀន សូមអញ្ជើញ​ទិតៀនបន្តទៀតចុះ យើងខ្ញុំនៅទីនេះប្រើប្រាស់ ការបោះឆ្នោត បើសិនជាគណបក្សប្រជាជនចាញ់ឆ្នោត វាមិនមែនបាត់តែ ហ៊ុន ម៉ាណែត ទេ វាបាត់ទាំង ហ៊ុន សែន តែម្ដង ដូច្នេះបើប្រើវិធីបោះឆ្នោត វាមានអ្វីដែលខុស»។ នេះជាការឆ្លើយតប របស់សម្ដេចតេជោ ហ៊ុន សែន ទៅកាន់អ្នកទិតៀនមួយចំនួនតូច ដោយសម្ដេចបានបន្ថែមថា សម្ដេច បណ្ដុះបណ្ដាលកូន មិនមែនបណ្ដុះបណ្ដាល ឲ្យធ្វើមេចោរនោះទេ។

សម្ដេចតេជោនាយករដ្ឋមន្ត្រី បានលើកឡើងជាសំណួរថា «នៅលើពិភពលោកនេះ តើមាននរណាចង់ឲ្យកូនខ្លួន មិនចង់ឲ្យមាន ឲ្យបាន មិនចង់ឲ្យធ្វើអ្នកធំ ហើយបណ្ដុះធ្វើម៉េច មានតែការភូតខ្លួនឯងតែប៉ុណ្ណោះៗ»។ សម្ដេចតេជោ ហ៊ុន សែន បានបន្ថែមទៀតថា «បើកូនខ្ញុំ មិនសាកសមទេ ប្រហែលទាំងខ្លួនខ្ញុំ ក៏ដូចជាថ្នាក់ដឹកនាំគណបក្សប្រជាជនផ្សេងទៀត ក៏មិនសម្រេចតែងតាំងឲ្យធ្វើជាបេក្ខជនបម្រុង បេក្ខជនបន្តវេន នោះដែរ»៕

អត្ថបទ៖ ឃួន សុភ័ក្រ