ខេត្តតាកែវ មាន​សិស្សជាង ៧ ម៉ឺននាក់ កំពុងសិក្សាថ្នាក់មធ្យមសិក្សាសាលារដ្ឋ

ចាប់តាំងពីរាជរដ្ឋាភិបាលសម្រេចបើកសាលារៀនទូទាំងប្រទេសឡើងវិញ ងាកមកមើលវិស័យអប់រំនៅខេត្តតាកែវឯណេះវិញ មានសិស្ស​ដែលកំពុងសិក្សានៅសាលារដ្ឋថ្នាក់មធ្យមសិក្សាទាំងបឋមភូមិនិងទុតិយភូមិមានចំនួន ៧៤ ១៧៥នាក់ ក្នុងឆ្នាំ​២០២២នេះ។

លោក ឡោ វីរិទ្ធិ ប្រធានមន្ទីរអប់រំយុវជននិងកីឡាខេត្តតាកែវ បានឲ្យដឹងនៅព្រឹកថ្ងៃទី០៩ ខែមិថុនា ឆ្នាំ២០២២នេះថា ដោយមានការយកចិត្តទុកដាក់ពីថ្នាក់ដឹកនាំក្រសួងអប់រំ ពិសេសសម្តេចអគ្គមហាសេនាបតិតេជោ ហ៊ុន សែន ជាប្រមុខរាជរដ្ឋាភិបាល វិស័យអប់រំត្រូវបានយកចិត្តទុកដាក់ខ្ពស់ជាអាទិភាព ដោយបានពង្រីកវិសាលភាពសាលារៀនដល់គ្រប់ទីកន្លែង ធ្វើយ៉ាងណាសម្រួលដល់អាណាព្យាបាល អាចឲ្យកូនទៅសិក្សា​បានងាយស្រួលគ្រប់ៗគ្នា។

លោកប្រធានមន្ទីរអប់រំខេត្តបន្ថែមថា មកដល់ថ្ងៃនេះសាលាវិទ្យាល័យទូទាំងខេត្តតាកែវ កើនឡើងរហូតដល់ ៥៣ សាលា ដែលមាន ៧៤៩ថ្នាក់ ក្នុងនោះសិស្សដែលកំពុងសិក្សាថ្នាក់ទី ១២ មានចំនួន ៨ ៩៨៩នាក់ ស្រី ៤ ៧៨៥នាក់។

លទ្ធផលសិស្សប្រឡងជាប់សញ្ញាបត្រមធ្យមសិក្សាទុតិយភូមិឆ្នាំសិក្សា២០១៩-២០២១ ជាសញ្ញាល្អមួយក្នុងវិស័យអប់រំរបស់សិស្ស ដោយបានប្រឡងជាប់សញ្ញាបត្រមធ្យមសិក្សាទុតិយភូមិចំនួន ៥៤៨៤នាក់ ក្នុងនោះស្រី ៣១០២នាក់។

លោក ឡោ វីរិទ្ធិ ប្រធានមន្ទីរអប់រំយុវជននិងកីឡាខេត្តតាកែវ តាម​រយៈលទ្ធផល​ប្រឡង​ទូទាំងប្រទេស សិស្សដែលប្រឡងបាននិទ្ទេស A មានរហូតដល់ ៩៩នាក់ កើន ៧០នាក់ បើធៀបការប្រឡងយកសញ្ញាបត្រមធ្យមសិក្សាឆ្នាំមុន៕

អត្ថបទ៖ វីរៈ​