ការចំណាយរបស់ភ្ញៀវទេសចរធ្លាក់ចុះ ខណៈកញ្ចប់សេរវាទស្សនកិច្ចមានតម្លៃខ្ពស់

ចរន្តភ្ញៀវក្នុងចុងសប្តាហ៍នេះ មានការថមថយបន្តិចបើប្រៀបនឹងចុងសប្តាហ៍មុន ជាក់ស្តែង តួលេខចុងសប្តាហ៍នេះ សរុបមានចំនួន ៣១៨,៨៦៣នាក់ ក្នុងនោះ ភ្ញៀវជាតិ ២៩៨,៩៤០នាក់ និងភ្ញៀវបរទេសផ្ទៃក្នុង ១៩,៩២៣នាក់ ពោលគឺមានការថយចុះប្រមាណ ១២,៥៥% ធៀបនឹងចុងសប្តាហ៍កន្លងមក។ នេះបើតាមរដ្ឋមន្រ្តីក្រសួងទេសចរណ៍ លោក ថោង ខុន។

តាមការវាយតម្លៃបឋម របស់ក្រសួងទេសចរណ៍ បានបង្ហាញថា ការចំណាយរបស់ភ្ញៀវទេសចរ ហាក់មានកម្រិតទាបជាងពេលថ្ងៃឈប់សម្រាកកន្លងមក ដោយពួកគេមួយចំនួនធ្វើដំណើរកម្សាន្តជិតៗ ចេញដំណើរពីព្រឹកព្រលឹម នឹងត្រលប់ចូលផ្ទះល្ងាចវិញ។ ភ្ញៀវភាគច្រើនជាភ្ញៀវក្នុងខេត្តខ្លួនឯង និងភ្ញៀវឆ្លងខេត្តជិតៗគ្នា។
ការធ្លាក់ចុះភ្ញៀវទេសចរណ៍នេះ អាចមកពីតម្លៃកញ្ចប់សេវាទេសចរណ៍សម្រាប់ភ្ញៀវទេសចរនៅមានតម្លៃខ្ពស់ ស្របនឹងតម្លៃប្រេងសាំង មានការកើនឡើង។

ពាក់ព័ន្ធបញ្ហានេះ រដ្ឋមន្ត្រីក្រសួងទេសចរណ៍ បានអំពាវនាវឲ្យវិស័យឯកជន ពិភាក្សាគ្នាដាក់ចេញតម្លៃកញ្ចប់​ទស្សនកិច្ចឲ្យបានសមរម្យដើម្បីទាញ់ទាញ ជំរុញចលនាទីផ្សារក្នុងស្រុក និងដើម្បីប្រកួតប្រជែង ជាមួយទីផ្សារ​ប្រទេសជិតខាងផងដែរ៕