អ្នកវិនិយោគជប៉ុន ចង់​អភិវឌ្ឍអគារចាស់ៗនៅរាជធានីភ្នំពេញ ជាអគារលំនៅឋានតម្លៃសមរម្យ

អ្នកវិនិយោគក្រុមហ៊ុនជប៉ុនមួយ ដែលបច្ចុប្បន្នកំពុងវិនិយោគលើគម្រោងលំនៅឋានដ៏ធំចំនួន ២ គម្រោង នៅរាជធានីភ្នំពេញបានអះអាងពី​ផែនការអភិវឌ្ឍអាគារចាស់ៗនៅរាជធានីភ្នំពេញ ឱ្យក្លាយទៅជាអគារលំនៅឋានដែលមានតម្លៃសមរម្យ តាមការស្នើសុំរបស់ប្រជាពលរដ្ឋ។ ប៉ុន្តែ​ក្រុមហ៊ុន​មិនអាចបង្ហាញថា មានអគារចាស់ៗណាខ្លះដែលស្ថិតនៅក្នុងគម្រោងរបស់លោកនោះទេ។

លោក អាឡិច យ៉ាស៊ូម៉ូតូ (Alex Yasumoto) ដែលជាម្ចាស់គម្រោងលំនៅឋានអារ៉ាខាវ៉ា ហើយដែលបានប្រើទុនប្រមាណ ១០០ លានដុល្លារអាមេរិក សម្រាប់គម្រោងលំនៅឋានអារ៉ាខាវ៉ា ចំនួន២ដំណាក់កាលនោះ បានថ្លែងនៅក្នុងសន្និសីទសារព័ត៌មាននាព្រឹកថ្ងៃទី០៥ ខែកក្កដា នេះថា លោកមានផែនការអភិវឌ្ឍអាគារចាស់ៗនៅរាជធានីភ្នំពេញឱ្យក្លាយទៅជាអគារ លំនៅឋានដែលមានតម្លៃសមរម្យសម្រាប់ប្រជាពលរដ្ឋ។

“ខ្ញុំទទួលបានសំណើជាច្រើនពីប្រជាពលរដ្ឋ ដែលរស់នៅក្នុងអគារចាស់ៗនៅរាជធានីភ្នំពេញ ដូច្នេះផែនការរបស់ខ្ញុំ បន្ទាប់ពីបញ្ចប​គម្រោង​អារ៉ាខាវ៉ាទី២​នេះ ខ្ញុំនឹងចាប់ផ្ដើមអភិវឌ្ឍឱ្យបានលឿនតាមដែលអាចធ្វើទៅបាន ក្នុងការអភិវឌ្ឍន៍អាគារចាស់ៗនៅរាជធានីភ្នំពេញ ឱ្យក្លាយទៅជាអគារមួយដែលមានតម្លៃសមរម្យ”។

លោក Alex Yasumoto បានអះអាងដែរថា ការដែលលោកចាប់អារម្មណ៏មកវិនិយោគលើវិស័យអចលនទ្រព្យក្នុងប្រទេសកម្ពុជា ជាពិសេសនៅទីក្រុងភ្នំពេញនេះ ដោយសារតែលោកយល់ឃើញថា គ្រួសារដែលមានចំណូលមធ្យមមួយចំនួនធំ ត្រូវការផ្ទះដែលមានតម្លៃសមរម្យ ដូច្នេះហើយបានជាលោកផ្ដោតការវិនិយោគនៅខុនដូប្រភេទនេះ។

លោកថា ដោយសារការបញ្ហារីករាលដាលនៃជំងឺកូវីដ១៩ជាសកល ក៏បានបណ្ដាលឱ្យមានផលប៉ះពាល់ទៅលើពេលវេលាបញ្ចប់ការសាងសង់ផងដែរ ប៉ុន្តែដោយសារតែបញ្ហានេះក្រុមហ៊ុនក៏បានសម្រួលនៅក្នុងការបងថ្លៃសម្រាប់អតិថិជន ដែលចូលទៅទិញលំនៅឋានអារ៉ាខាវ៉ា សម្រាប់គម្រោងទី២ផងដែរ។

លោកជឿជាក់លើសេដ្ឋកិច្ចកម្ពុជា បើទោះបីជាស្ថិតក្នុងបញ្ហាប្រឈមជាសកលនៃកូវីដ-១៩ក៏ដោយ។ ស្ថានភាពកូវីដ១៩ ប៉ះពាល់ពិភពលោក តែកម្ពុជាមិនប៉ះពាល់សេដ្ឋកិច្ចធ្ងន់ធ្ងរនោះទេ៕

អត្ថបទ៖ កោះកែវ