លោកបណ្ឌិត ហ៊ុន ម៉ាណែត អរគុណពលរដ្ឋគ្រប់ទិសទី ដែល​ចូលរួមថែរក្សាសន្តិភាព និងបន្តជំរុញ​ការអភិវឌ្ឍជាតិទៅមុខទៀត

លោកបណ្ឌិត ហ៊ុន ម៉ាណែត បានថ្លែងអំណរគុណដល់ប្រជាពលរដ្ឋគ្រប់ទិសទី ដែល​បានចូលរួមថែរក្សាសុខសន្តិភាព និងបន្តជំរុញ​ការអភិវឌ្ឍជាតិទៅមុខបន្តទៀត។

លោកបណ្ឌិត ហ៊ុន ម៉ាណែត ថ្លែងអំណរគុណបែបនេះ ខណៈលោកធ្វើជា​តំណាង​ដ៏ខ្ពង់ខ្ពស់ របស់សម្តេច តេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ក្នុងពិធីស្រោចស្រពសុគន្ធវារី ប្រកាសព្រះរាជប្រកាសនីយប័ត្រ តែងតាំងព្រះគ្រូអនុគណស្រុកត្រាំកក់ ខេត្តតាកែវ និង​សម្ពោធសមិទ្ធផលនានា ក្នុងវត្តមង្គលមានលក្ខណ៍ ស្ថិតនៅឃុំត្រពាំងធំខាងជើង ស្រុកត្រាំកក់ ខេត្តតាកែវ នាព្រឹកថ្ងៃទី ១៣ ខែកក្កដា ឆ្នាំ ២០២២នេះ។​

បើតាមបណ្ឌិត ហ៊ុន ម៉ាណែត​ ប្រទេសកម្ពុជា​ អាចទទួលបានសន្តិភាពពេញលេញ ឯកភាពជាតិ និងឯកភាពទឹកដី ដូចសព្វថ្ងៃនេះ ក៏ដោយសារការដឹកនាំប្រកបដោយធម៌ របស់សម្តេចតេជោនាយករដ្ឋមន្ត្រី ដែលបានដាក់ចេញនូវនយោបាយឈ្នះ-ឈ្នះ ដែល​ជាគោលនយោ​បាយ​ផ្អែកលើគោលការណ៍គុណធម៌ មនុស្សធម៌ ការចែករំលែក និងការទុកចិត្តគ្នាទៅវិញទៅមក ដោយធ្វើយ៉ាងណារក្សាការពារឲ្យបាននូវអាយុជីវិត​ ទ្រព្យសម្បត្តិ និងមុខរបរការងាររបស់ខ្មែរគ្រប់រូប គ្រប់និន្នាការ ដោយមិនមានការរើសអើងបែងចែក។

លោកបាន​អរគុណប្រជាពលរដ្ឋគ្រប់ទិសទី ដែល​បានចូលរួមថែរក្សាសុខសន្តិភាព និងបន្តជំរុញ​ការអភិវឌ្ឍជាតិទៅមុខទៀត តាមរយៈការរួមគ្នាដើរទៅមុខលើវិថីដ៏ត្រឹមត្រូវ, ការរស់នៅជា​មួយ​គ្នាប្រកប​ដោយភាពសុខដុមរមនា ដោយមិនមានការបែកបាក់ផ្ទៃក្នុងជាតិ, ការចែករំលែក​ជួយគ្នាទៅវិញទៅមក និងការខិតខំកសាងអភិវឌ្ឍខ្លួនឯង និងគ្រួសារឲ្យបានរីកចម្រើនរុងរឿង។

លោកបណ្ឌិត ហ៊ុន ម៉ាណែត បញ្ជាក់ដែរថា ​សន្តិភាពដ៏ពេញលេញ និងសេចក្តីសុខសាន្ត​រយៈពេលកន្លមក​នេះ អាចនឹងរលាយបាត់បង់ទៅវិញយ៉ាងឆាប់រហ័សក្នុងមួយប៉ប្រិចភ្នែក ប្រសិន​បើ​សិនគ្មានការចូលរួម ប្រកបដោយស្មារតីទទួលខុសរបស់ប្រជាពល​រដ្ឋម្នាក់ៗ និងការប្តេជ្ញាចិត្តដ៏ច្បាស់លាស់របស់ប្រមុខថ្នាក់ដឹកនាំក្នុងការបន្តថែរក្សាការពារសន្តិភាព ស្ថិរភាពឲ្យបានដាច់ខាត ទោះបីក្នុងតម្លៃណាក៏ដោយ។ គ្មានអ្នកណាស្រលាញ់ខ្មែរ ការ​ពារខ្មែរ ជាងខ្មែរខ្លួនយើងនោះទេ ដូច្នេះខ្មែរត្រូវតែខ្លាំង និងរួមសាមគ្គីគ្នា ដើម្បីថែរក្សាអត្តសញ្ញាណជាតិ ឯករាជ្យ អធិបតេយ្យ បូរណភាពទឹកដី និងការអភិវឌ្ឍជាតិ ឲ្យឋិតឋេរចីរកាលតទៅមុខ សម្រាប់អ្នកជំនាន់ក្រោយៗទៀត។ ​

ទាក់ទងដល់​ពិធី​​បុណ្យ​​ក្នុងវត្តមង្គលមានលក្ខណ៍​ លោកបណ្ឌិត​ ហ៊ុន ម៉ាណែត​​ បាន​ចូលរួមអបអរសាទរ​ ​និងអនុមោទនាត្រេកអរ ចំពោះការសម្ពោធសមិទ្ធផលថ្មីៗបន្ថែមទៀត នៅក្នុងទីអារាម ដែលមានអាយុកាលប្រមាណ ​២២០ ឆ្នាំមួយនេះ ដែលពីដើមឡើយ​ក៏ធ្លាប់មានការខិតខំកសាង​សមិទ្ធផលជាច្រើនបន្តបន្ទាប់ផងដែរ តាមរយៈសទ្ធាជ្រះថ្លារបស់ពុទ្ធបរិស័ទ​។ លោកថា ការរីកចម្រើននៅទីនេះ ក៏អាចឆ្លុះបញ្ចាំងឲ្យឃើញអំពីនិន្នាការរួម នៃការអភិវឌ្ឍរីកចម្រើនក្នុងវិស័យព្រះពុទ្ធសាសនា នៅក្នុងសង្គមខ្មែរនៅទូទាំងប្រទេស ដោយបានឆ្លងកាត់ដំណាក់កាលជាច្រើន នៅក្នុងប្រវត្តិសាស្ត្រ ជាពិសេសនៅក្រោយ​ឆ្នាំ ១៩៧៩៕

អត្ថបទ៖ កោះកែវ