កត្តាអាកាសធាតុទាញទម្លាក់តួលេខភ្ញៀវទេសចរជាង ២០ភាគរយ

ភ្ញៀវទេសចរចេញកម្សាន្តនៅតាមតំបន់នានា ក្នុងប្រទេសបានធ្លាក់ចុះ នៅចុងសប្តាហ៍កន្លងទៅនេះ។

លោករដ្ឋមន្ត្រីទេសចរណ៍ ថោង ខុន បានឱ្យដឹងថា ភ្ញៀវទេសចរនៅចុងសប្តាហ៍ បានធ្លាក់ចុះប្រមាណ ២០.៧៧% ធៀបនឹងសប្តាហ៍កន្លងទៅ។ ក្នុងនោះ គោលដៅទេសចរណ៍សំខាន់ៗ ដូចជា៖ ខេត្តព្រះសីហនុ ថយចុះប្រមាណ ៤៨.០៧%, ខេត្តកែប ថយចុះប្រមាណ ៤១.៧២% និងខេត្តសៀមរាប ថយចុះប្រមាណ ៣៨.០៦%។

លោក ថោង ខុន បានគូសបញ្ជាក់ថា មូលហេតុ ដែលនាំឱ្យមានការថយនៃចំនួនភ្ញៀវទេសចរនា បណ្តាលមកពីបញ្ហាអាកាសធាតុមិនអំណោយផល មានភ្លៀងធ្លាក់ច្រើននៅគ្រប់រាជធានីខេត្ត ដែលបានធ្វើឲ្យមានជំនន់ទឹកភ្លៀងនៅតាមតំបន់មួយចំនួន ដូចជា គោលដៅទេសចរណ៍ខេត្តតំបន់ឆ្នេរ និងគោលដៅទេសចរណ៍នៅខេត្តពោធិ៍សាត់ (តំបន់វាលវែង និងផ្លូវបុប្ផាលក់ខ្លួន ( ផ្លូវជាតិលេខ៥៥ )ជាដើម។

ជាមួយគ្នានេះ ស្របពេលដែលប្រជាពលរដ្ឋមួយចំនួនបានធ្វើដំណើរទៅកាន់ទីវត្តអារាមនានា ដើម្បីនាំយកទានព្រះវស្សា និងគ្រឿងឧបភោគបរិភោគទៅប្រគេនព្រះសង្ឃ សម្រាប់ប្រើប្រាស់នាពេលចូលព្រះវស្សា។

បើតាមលោក ថោង ខុន បានបង្ហាញស្ថិតិប្រចាំសប្តាហ៍ថ្ងៃទី១៦-១៧ ខែកក្កដា ឆ្នាំ២០២២ មានភ្ញៀវទេសចរចេញដើរកម្សាន្តចំនួន ២២៦,៤៤១ នាក់ ក្នុងនោះភ្ញៀវជាតិ ២០៤,៤៨១នាក់ ភ្ញៀវបរទេសផ្ទៃក្នុង ២១,៩៦០នាក់៕