កម្ពុជានឹងបើកប្រតិបត្តិការទ្រង់ទ្រាយធំត្រួតពិនិត្យជនបរទេសរស់នៅលើទឹកដីកម្ពុជា

ប្រទេសកម្ពុជានឹងបើកប្រតិបត្តិការលក្ខណៈទ្រង់ទ្រាយធំដើម្បីត្រួតពិនិត្យទៅលើជន​បរទេស​ទាំងអស់ដែលកំពុងរស់នៅលើទឹកដីកម្ពុជាលើកលែងតែមន្រ្តីការទូត។

សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានមានប្រសាសន៍ក្នុងពិធីបិទវគ្គសុក្រឹតការវគ្គ១
នៅបណ្ឌិត្យសភានគរបាល នៅព្រឹកថ្ងៃទី២៦ ​ខែកក្កដា ក្រសួងមហាផ្ទៃនឹង​បើក​ប្រតិបត្តិការទ្រង់ទ្រាយធំ​ត្រួតពិនិត្យ​រាល់ការរស់នៅរបស់ជនបរទេសទាំងអស់ មិនថា​នៅ​តាមសណ្ឋាគារ ការដ្ឋាន ​និងតាមក្រុមហ៊ុន នានានោះទេ​ លើកលែងតែ​មន្រ្តីការទូតដើម្បីលុបបំបាត់ការសង្ស័យ និងភាពចន្លោះប្រហោងចំពោះការជួញដូរមនុស្ស។

យោងតាមរបាយការណ៍ប្រចាំឆ្នាំ២០២២របស់ក្រសួងការបរទេសអាមេរិកបានបង្ហាញឲ្យដឹងថា កម្ពុជាបានរអិលធ្លាក់ទៅក្នុងបញ្ជីខ្មៅ ឬចំណាត់ថ្នាក់កម្រិត៣ដែលមិនបានទប់ស្កាត់បទល្មើសជួញដូរមនុស្សតាមស្តង់ដារជាអប្បរមា។ ក្នុងបញ្ជីខ្មៅឬកម្រិត៣ កម្ពុជានឹងអាចប្រឈមការរឹតត្បិតជំនួយ ឬឈានទៅដល់ការផ្តាច់ជំនួយពីសហរដ្ឋអាមេរិក ពាក់ព័ន្ធនឹងករណីជួញដូរមនុស្ស ខណៈ២ឆ្នាំជាប់គ្នាមកនេះ សហរដ្ឋអាមេរិកបានដាក់កម្ពុជា ក្នុងចំណាត់ថ្នាក់លេខ២ ជាប្រទេសមានការខិតខំប្រឹងប្រែង និងមានការឆ្លើយតប និងមានភាពចន្លោះប្រហោងដែលត្រូវបំពេញបន្ថែមក្នុងកិច្ចការប្រយុទ្ធប្រឆាំងការជួញដូរមនុស្សនេះ។

សម្តេចក្រឡាហោមក៏បានសម្តែងការ​ងឿងឆ្ងល់​យ៉ាងខ្លាំងចំពោះក្រសួងការបរទេសអាមេរិក ដាក់ប្រទេសកម្ពុជា​ចូលក្នុងបញ្ជីជាប្រទេសជាប់ចំណាត់ថ្នាក់លេខ៣ចំពោះការជួញដូរមនុស្ស ខណៈកម្ពុជាបានខិតខំយ៉ាងសកម្មក្នុងការសហការទប់ស្កាត់នូវអំពើជួញដូរមនុស្សនេះ។

យ៉ាងណាក៏ដោយ សម្តេចក្រឡាហោម ស ខេង បានសម្តែងការខកចិត្តយ៉ាងខ្លាំងចំពោះការសម្រេចរបស់ក្រសួងការបរទេសអាមេរិក ដាក់កម្ពុជាចូលក្នុងបញ្ជីខ្មៅនេះ ​ប៉ុន្តែកម្ពុជា នៅតែមាន​ឆន្ទៈមោះមុតក្នុងការសហការប្រយុទ្ធប្រឆាំងអំពើជួញដូរមនុស្សជានិច្ច ហើយនឹង​បើក​ប្រតិបត្តិការ​ធំ​ដើម្បីសម្អាត អំពើជួញដូរមនុស្សនៅកម្ពុជានេះឱ្យស្របទៅតាមការចង់បានរបស់រាជរដ្ឋាភិបាល​កម្ពុជា៕

អត្ថបទ៖ សំអឿន