Connect with us

ព័ត៌មានជាតិ

សៀវភៅ “​អាថ៌កំបាំង​ក្រៅ​ឆាក​របស់​មេដឹកនាំ​” ត្រូវបាន​បើកសម្ពោធ​ជា​ផ្លូវការ

បានផុស

នៅ

​សៀវភៅ​ថ្មី​មួយ​ដែលមាន​ចំណងជើង​ថា “​អាថ៌កំបាំង​ក្រៅ​ឆាក​” ដែល​បាន​លាតត្រដាង​ពី​រឿងរ៉ាវ​ក្រៅ​ឆាក​របស់​មេដឹកនាំ​អាស៊ាន និង​លើ​ពិភពលោក ទទួលបាន​ការគាំទ្រ​យ៉ាងខ្លាំង​ពី​អ្នកអាន បន្ទាប់ពី​សៀវភៅ​នេះ ត្រូវបាន​បោះពុម្ពផ្សាយ​រយៈពេល​ប៉ុន្មាន​ថ្ងៃនេះ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពុ​យ គា អ្នកសារព័ត៌មាន​ជើងចាស់​មួយរូប និង​ជា​អ្នកនិពន្ធ​សៀវភៅ​នេះ បាន​ថ្លែង​នៅក្នុង​សន្និសីទ​សារព័ត៌មាន​នា​រសៀល​ថ្ងៃ​សុក្រ​នេះ​ថា លោក​បាន​ចំណាយពេល​១០​ឆ្នាំ ដើម្បី​តាក់តែង​សៀវភៅ​មាន​កម្រាស់​ជាង​២០០​ទំព័រ​នេះ​ទ្បើង ដែលមាន​លក្ខណៈពិសេស និង​ខុសប្លែក​ពី​សៀវភៅ ដែល​បាន​បោះពុម្ពផ្សាយ​កន្លងមក​នៅ​ក្នុងប្រទេស​។ លោក​ថា ចំណុច​ដែល​ប្លែក​នោះ​គឺ​ចំណងជើង និង​ក្របសៀវភៅ​ដែល​បង្កប់​នូវ​អត្ថន័យ​អ្វីមួយ​រហូតដល់​អ្នកអាន​បាន​បើក​មើល ឬ​បាន​អាន​រួច​ទើប​ដឹង​ថា​មាន​អ្វី​នៅ​ខាងក្នុង​។ អ្នកនិពន្ធ​រូបនេះ​បាន​ថ្លែងថា “​មានរឿង​ច្រើនណាស់​ដែល​ត្រូវបាន​ទម្លាយ​ពី​កិច្ចប្រជុំ​អន្តរជាតិ​ធំៗ​ទាំង​ក្នុងស្រុក តំបន់ និង​បណ្តា​ប្រទេស​ដទៃទៀត ក្នុងនោះ​មានរឿង​រ៉ាវ​ទាក់ទង​នឹង​មេដឹកនាំ​ល្បីៗ​របស់​អាស៊ាន និង​ពិភពលោក ជាពិសេស​ជីវិត​ស្នេហា ទម្លាប់​ការងារ ឥរិយាបថ​របស់​មេដឹកនាំ និង​ភាពមិន​ចុះសម្រុង​គ្នា​លើ​បញ្ហា​ខ្លះ​នៅក្នុង​តំបន់ ក៏ដូចជា​ជម្លោះទឹកដី​ជាដើម​”​។

អ្នកសារព័ត៌មាន​វិជ្ជាជីវៈ​រូបនេះ​បាន​បន្ត​ថា ក្រៅពី​ផ្តល់​ពុទ្ធិ​បន្ថែម​ដល់​អ្នកអាន​ស្នាដៃ​និពន្ធ​ថ្មី​នេះ​របស់​លោក​ក៏​អាច​ប្រើប្រាស់​ជា​ឯកសារ​ជំនួយស្មារតី ឬ​ឯកសារយោង​ដ៏​មានតម្លៃ​ផងដែរ ពីព្រោះ​ព័ត៌មាន​ដែល​លោក​ប្រមូល និង​សម្រិតសម្រាំង គឺ​បានមកពី​ប្រភព​ពាក់ព័ន្ធ និង​តាមរយៈ​ការសង្កេត​ផ្ទាល់​របស់លោក​នៅនឹងកន្លែង​ផងដែរ​។

លោក ពុ​យ គា ក៏បាន​សម្តែង​ក្តី​រីករាយ ដោយ​លោក​បាន​អះអាងថា សៀវភៅ​ចំនួន​ជាង​៣ ពាន់​ក្បាល​ត្រូវបាន​លក់​អស់​ក្នុង​រយៈពេល​១​សប្តាហ៍​។ លោក​នឹង​បោះពុម្ព​ឲ្យ​បាន​ដល់​២ ឬ​៣​ម៉ឺន​ក្បាល ដើម្បី​ឆ្លើយតប​ទៅនឹង​ការគាំទ្រ​របស់​អ្នកអាន​។

សៀវភៅ “​អាថ៌កំបាំង​ក្រៅ​ឆាក​របស់​មេដឹកនាំ​អាស៊ាន និង​ពិភពលោក​” ត្រូវបាន​បោះពុម្ពផ្សាយ​ចំ​ពេលដែល​កម្ពុជា​ធ្វើ​ម្ចាស់ផ្ទះ​ប្តូរ​វេន​កិច្ចប្រជុំ​អាស៊ាន​នៅ​ឆ្នាំ​២០២២​នេះ ដោយ​ក្នុងនោះ​អ្នកនិពន្ធ​ក៏បាន​បរិយាយ​ពី​តួនាទី​របស់​កម្ពុជា​ក្នុងនាម​ជា​ប្រធាន​អាស៊ាន​ផងដែរ​៕

ដោយ ៖ កោះ​កែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម