អាជ្ញាធរស្រុកសេសាន កំពុងស្រាវជ្រាវរកអត្តសញ្ញាណអ្នកកាប់បំផ្លាញព្រៃឈើ២កន្លែង

អាជ្ញាធរស្រុកសេសាន ដឹកនាំកម្លាំងចម្រុះរួមជាមួយកម្លាំងអធិការដ្ឋាននគរស្រុក មន្ត្រីនគរបាលប៉ុស្តិ៍ស្តៅ មន្ត្រីបរិស្ថានបានចុះស្រាវជ្រាវល្បាតរកអត្តសញ្ញាណជនខិលខូចដែលកាប់ទន្ទ្រានដីព្រៃរបស់រដ្ឋពីរកន្លែង។

ទីតាំងកាប់ទន្ទ្រានដីព្រៃត្រូវបានសមត្ថកិច្ចរកឃើញកាលពីថ្ងៃទី០៤ ខែសីហា ឆ្នាំ២០២២ ត្រង់ចំណុចឈឹនលឹមនិយាមការ ០៦៤២៣៩៥១៥២៣៦៩៤ ស្ថិតក្នុងភូមិញើន ឃុំស្ដៅ ស្រុកសេសាន ខេត្តស្ទឹងត្រែង។

លោក ស៊ុយ អុិនឡន អភិបាលរងស្រុកបានឲ្យដឹងថា នៅក្នុងការចុះស្រាវជ្រាវល្បាតរកអត្តសញ្ញាណជនខិលខូចកាប់ទន្ទ្រានដីព្រៃរបស់រដ្ឋនៅក្នុងស្រុកសេសាន កម្លាំងសមត្ថកិច្ចបានរកឃើញទីតាំងកំពុងតែធ្វើការកាប់ទន្ទ្រានដីព្រៃរបស់រដ្ឋចំនួន២កន្លែង ប្រមាណជាង១០ហិកតា ដែលជាសកម្មភាពកាប់បំផ្លាញព្រៃឈើដោយខុសច្បាប់។

លោកអភិបាលរងស្រុកបានបន្តឲ្យដឹងទៀតថា លោកនឹងចាត់វិធានច្បាប់ចំពោះជនខិលខូចដែលចេះតែលបលួចកាប់ទន្ទ្រានដីព្រៃរបស់រដ្ឋធ្វើជាកម្មសិទ្ធិ និងតែងតែញួសញុងប្រជាពលរដ្ឋឱ្យចូលកាប់ព្រៃដុតរានយកដីធ្វើជាកម្មសិទ្ធ មិនគោរពច្បាប់ ទោះបីមន្ត្រីជំនាញបានចុះទៅណែនាំយ៉ាងណាក៏ដោយ។

លោក រិទ្ធី សារ មន្ត្រីបរិស្ថានក៏បានបញ្ជាក់ថា ទីតាំងដែលកំពុងធ្វើសកម្មភាពកាប់ដីព្រៃនោះ ស្ថិតនៅចំណុចនិយាមការ០៦៤២៣៩៥១៥២៣៦៩៤ ដែលទីតាំងកំពុងកាប់រានដីព្រៃមួយកន្លែងចំនួនមួយហិកតា និងមួយទីតាំងទៀតចំនួនប្រមាណជិត១០ហិកតា ក្រោយពីសមត្ថកិច្ចចម្រុះចុះល្បាតជិតដល់ ជនខិលខូចបានរត់គេចខ្លួនបាត់អស់បន្សល់ទុកតែភស្តុតាងប៉ុណ្ណោះ។

លោកបន្តឲ្យដឹងទៀតថា ពេលនេះសមត្ថកិច្ចជំនាញកំពុងស្រាវជ្រាវរកអត្តសញ្ញាណជនខិលខូចដែលតែងតែធ្វើសកម្មភាពកាប់រានដីព្រៃរបស់រដ្ឋធ្វើជាកម្មសិទ្ធិដើម្បីចាត់វិធានការតាមផ្លូវច្បាប់។

សូមបញ្ជាក់ថា ទីតាំងកាប់រានដីព្រៃទាំងពីរកន្លែងខាងលើ ត្រូវបានសមត្ថកិច្ចជំនាញធ្វើរបាយការណ៍ជូនទៅថ្នាក់ខេត្តរួចរាល់ហើយរង់ចាំចេញសេចក្តីសម្រេចដើម្បីចាត់វិធានការបន្តតាមនីតិវិធី៕

អត្ថបទ៖ ងិនលីម