ក្រសួង​ផាកពិន័យប្រាក់ ​១០ លានរៀល​ពីមន្ទីរពេទ្យ​ម្លិះដង្កោបញ្ចេញឡាន​ពេទ្យ​ដឹកអ្នករងរបួសគ្រោះថ្នាក់ចរាចរណ៍

ក្រសួង​សុខាភិបាលបានព្រមាន និងផាកពិន័យប្រាក់ ​១០ លានរៀល​ពីលោក ស៊ី វន់ ម្ចាស់មន្ទីរពេទ្យ​ម្លិះដង្កោ​ពីកំហុស​បញ្ចេញឡាន​ពេទ្យ​សង្គ្រោះរបស់ខ្លួនដឹកអ្នករបួស​គ្រោះថ្នាក់ចរាចរណ៍​នៅតាមដងផ្លូវយកមកព្យាបាលនៅក្នុងគ្លិនិករបស់ខ្លួន។

សេចក្ដីព្រមានរបស់ក្រសួងសុខាភិបាលចេញផ្សាយនៅថ្ងៃទី ១៥ ខែសីហា ២០២២នេះ ឱ្យដឹងថា មន្ទីរពហុព្យាបាលម្លិះដង្កោតែងតែយករថយន្តគិលានសង្គ្រោះរបស់ខ្លួនចេញទទៅដឹកអ្នករបួសដោយគ្រោះថ្នាក់ចរាចរណ៍តាមដងផ្លូវយកមកព្យាបាលនៅមន្ទីរពេទ្យរបស់ខ្លួនខុសច្បាប់ ដែលក្រសួងសុខាភិបាលបានហាមឃាត់ និងបានណែនាំគ្រប់គ្លិនិកឯកជនទាំងអស់មិនអនុញ្ញាតឱ្យយករថយន្តគិលានសង្គ្រោះឯកជនរបស់ខ្លួនចេញទៅដឹកអ្នករងរបួសដោយគ្រោះថ្នាក់ចរាចរណ៍តាមដងផ្លូវយកមកព្យាបាលក្នុងគ្លិនិកឯកជនរបស់ខ្លួនជាដាច់ខាត។

ក្រសួងក៏បង្គាប់ឱ្យលោកវេជ្ជបណ្ឌិត ស៊ឹម វន់ ម្ចាស់មន្ទីរពហុព្យាបាល ម្លិះដង្កោ បញ្ឈប់ជាបន្ទាន់ចំពោះការយករថយន្តសង្គ្រោះរបស់ខ្លួនទៅដឹកអ្នករងរបួសដោយគ្រោះថ្នាក់ចរាចរណ៍យកទៅព្យាបាលនៅគ្លិនិករបស់ខ្លួន និងបានផាកពិន័យអន្តរការជាប្រាក់ ១០ លានរៀលចំពោះកំហុសដែលមាន៕