សហភាពសហព័ន្ធយុវជនកម្ពុជា ចុះ MOU ជាមួយសមាគមប្រជាជនសិង្ហបុរី បន្តកិច្ចសហប្រតិបត្តិការរវាងស្ថាប័នទាំងពីរបន្តទៀត

សហភាពសហព័ន្ធយុវជនកម្ពុជា (ស.ស.យ.ក) បានចុះអនុស្សារណៈយោគយល់គ្នា (MOU) ជាមួយសមាគមប្រជាជនសិង្ហបុរី (People’s Association of Singapore)​ ដើម្បីបន្តកិច្ចសហប្រតិបត្តិការរវាងស្ថាប័នជាដៃគូទាំងពីរ បន្តទៀត។

ពិធីចុះហត្ថលេខាលើអនុស្សារណៈយោគយល់គ្នានេះ បានធ្វើឡើងនៅរសៀលថ្ងៃទី ១៥ ខែសីហា ឆ្នាំ ២០២២ នៅសណ្ឋាគា Pan Pacific Singapore ក្រោមអធិបតីភាពលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងលោក Lim Hock Yu អគ្គនាយកប្រតិបត្តិនៃ PA។

លោក ហ៊ុន ម៉ានី បានឲ្យដឹងថា អនុស្សារណៈនេៈ ជាអនុស្សារណៈនៃការបន្តកិច្ចសហប្រតិបត្តិការរវាងស្ថាប័នជាដៃគូទាំងពីរ ដែលកន្លងមក ស្ថាប័នទាំងពីរមានស្នាដៃលេចធ្លោក្នុងការងារសង្គម មនុស្សធម៌ និងការងារយុវជននៅក្នុងប្រទេសរៀងៗខ្លួន។

កន្លងមក ស្ថាប័ននៃប្រទេសទាំងពីរ ធ្លាប់បានធ្វើការសហការគ្នាយ៉ាងស្អិតរមួត លើការអភិវឌ្ឍយុវជន ការងារអប់រំ វប្បធម៌ និងសិល្បៈ ដែលក្នុងនោះ ស្ថាប័នទាំងពីរធ្លាប់បានធ្វើការផ្លាស់ប្តូរយុវជន និងទស្សនៈកិច្ចសិក្សាជាច្រើនលើក។ បើតាមលោក ហ៊ុន ម៉ានី អនុស្សារណៈនាពេលនេះ ក៏នឹងបើកឱកាសកាន់តែធំ សម្រាប់ស្ថាប័នទាំងពីរក្នុងការពង្រីកសក្តានុពល នៃស្ថាប័នរបស់ខ្លួន៕