រដ្ឋបាលក្រុងប៉ោយប៉ែត ទុកពេល៩ថ្ងៃឱ្យអាជីវករ​រុះរើ អាជីវកម្មតាំងលក់​លើចំណីផ្លូវ នៅផ្សារត្រី

ប៉ោយប៉ែត៖ រដ្ឋបាលក្រុងប៉ោយប៉ែត បានទុកឱសានវាទរយៈពេល០៩ថ្ងៃ ឱ្យឱ្យអាជីវករ ដែលរុះរើការតាំងលក់លើ ចំណីផ្លូវ និងការតសំយ៉ាបលយចូលមកផ្លូវ នៅចំណុចជុំវិញផ្សារត្រីដែលស្ថិតនៅក្នុងសង្កាត់ប៉ោយប៉ែត និងសង្កាត់អូរជ្រៅ។

ការប្រកាសទុកឱសានវាទខាងលើធ្វើឡើង កាលពីថ្ងៃទី២៦សីហា២០២២ ក្នុងពេលដែលលោក គាត ហ៊ុល អភិបាលក្រុងប៉ោយប៉ែត ដឹកនាំក្រុមការងារ កងកម្លាំងចម្រុះ អាជ្ញាធរសង្កាត់ប៉ោយប៉ែត និងសង្កាត់អូរជ្រៅ អង្គភាពភូមិប្រជាការពារភូមិ ចុះរៀបចំសណ្តាប់ធ្នាប់ និងជូនដំណឹងឲ្យរុះរើ បញ្ឈប់ការតាំងលក់លើចំណីផ្លូវ និងការតសំយ៉ាបលយចូលមកផ្លូវនៅចំណុចជុំវិញផ្សារត្រី ។

លោកអភិបាលក្រុង ក៏សូមអំពាវនាវដល់បងប្អូនប្រជាពលរដ្ឋ ដែលបានតាំងលក់លើផ្លូវ និងការតសំយ៉ាបលយចូលមក ចំណីផ្លូវសូមចូលរួមសហការជាមួយអាជ្ញាធរគ្រប់លំដាប់ថ្នាក់ក្នុងការរៀបចំសណ្តាប់ធ្នាប់សាធារណៈឲ្យមានរបៀបរៀបរយ និងសូមឲ្យមានការស្វ័យរុះរើស្ម័គ្រចិត្តដោយខ្លួនឯង ។ លោកសង្កត់ធ្ងន់ថា ផុតរយៈពេលកំណត់រដ្ឋបាលក្រុងនឹង ចុះរុះរើ និងមិនទទួលខុសត្រូវលើការខូចខាតឡើយ។ ដើម្បីទីក្រុងស្អាត និងមានរបៀបរៀបរយ គឺត្រូវការចូលរួម និងផ្តើមចេញពីបងប្អូនទាំងអស់គ្នា។

សូមរំលឹកថា ជុំវិញការុះរើខាងលើ រដ្ឋបាលក្រុងប៉ោយប៉ែត បានជូនដំណឹងនឹងចុះអនុវត្តរុះរើជាច្រើនលើកមកហើយ តែបងប្អូមប្រជាពលរដ្ឋ និងអាជីវករតែងតែឆ្លៀតឱកាសរំលោភយកចំណីផ្លូវធ្វើអាជីវកម្ម រហូតមានការមិនពេញចិត្តរវាង អាជីវករនៅក្នុងផ្សារប្តឹងអាជីវករលក់ខាងក្រៅលើផ្លូវទៅអាជ្ញាធរក្រុងឱ្យរៀបចំសណ្តាប់ធ្នាប់។ អត្ថបទ៖ អពៅ