លោកជំទាវ ម៉ែន សំអន សាទរបេក្ខជន លីម តិចម៉េង ដែលទទួលជ័យលាភីក្នុងកម្មវិធី Cambodian Idol រដូវកាលទី ៤

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានសម្ដែងការអបអរសាទរ ចំពោះបេក្ខជន លីម តិចម៉េង ដែលទទួលជ័យលាភីលេខ ១ក្នុងកម្មវិធី Cambodian Idol រដូវកាលទី ៤។ លោកជំទាវ ម៉ែន សំអន បានអបអរបែបនេះ ខណៈអញ្ជើញជាអធិបតីក្នុងកម្មវិធី Cambodia Idol រដូវកាលទី ៤ វគ្គផ្តាច់ព្រាត់របស់ទូរទស្សន៍ហង្សមាស នៅផ្សារអ៊ីអនសែនសុខ រាជធានីភ្នំពេញ នារាត្រីថ្ងៃអាទិត្យ ទី ២៨ ខែសីហា ឆ្នាំ ២០២២។

សូមបញ្ជាក់ថា កម្មវិធីនេះបានចាប់ផ្តើមមកអស់រយៈពេលកន្លះឆ្នាំ ដោយគិតចាប់ពី ខែកុម្ភៈ ឆ្នាំ ២០២២មកម្ល៉េះ ដែលមានបេក្ខភាពមកពីបណ្តារាជធានី-ខេត្តទូទាំងប្រទេស។ ក្នុងវគ្គផ្តាច់ព្រាត់នេះ មានបេក្ខជនសរុបចំនួន ៤រូប ទី១. លោក នាង ដាវីន ទី២. លោក ថុល សុភិទិ ទី៣. លីម តិចម៉េង ទី៤.លោក ស៊ឹម ច័ន្ទពន្លឺ ដែលត្រូវប្រកួតប្រជែងគ្នា ដើម្បីដណ្តើមយកជ័យលាភី ហើយតាមរយៈការប្រកួតប្រជែងលំដាប់អន្តរជាតិនេះ គឺបេក្ខជនបានបង្ហាញឲ្យទស្សនិកជនឃើញនូវសមត្ថភាពពិតៗ ទេពកោសល្យពិតៗ និងការបញ្ចេញអស់ពីសមត្ថភាព។

លោកជំទាវ ម៉ែន សំអន បានសម្ដែងការចូលរួមអបអររសាទរ ក្នុងកម្មវិធីនៃទីបញ្ជប់ក្នុងការប្រកួតនេះ ដោយបេក្ខជន លីម តិចម៉េង បានទទួលបានជ័យលាភីចំណាត់ថ្នាក់លេខ ១ នៅក្នុងកម្មវិធី Cambodian Idol រដូវកាលទី ៤ នេះ ហើយទទួលបានពានមួយ ប្រាក់រង្វាន់ចំនួន ១០០លានរៀល។ ចំណែកឯបេក្ខជន ដែលមិនបានលើកពាន ទទួលបានថវិកាឧបត្ថម្ភចំនួន ៤លានរៀលផងដែរ៕

អត្ថបទ៖ វិមាន