ព័ត៌មានជាតិ

ចិនបន្តប្តេជ្ញាគាំទ្រលើវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ នៅកម្ពុជា

បានផុស

៤ years មុន

នៅ

ថ្ងៃអង្គារ ២០ កញ្ញា ២០២២

ដោយ

រដ្ឋាភិបាលចិន បានបន្តប្តេជ្ញាគាំទ្រលើវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ នៅកម្ពុជាពិសេសផ្លាស់ប្តូរការយល់ដឹងរវាងសិស្ស និងនិស្សិតនៃប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពេជ សោភ័ន រដ្ឋមន្ត្រីស្តីទីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ នៅក្នុងជំនួបជាមួយលោក Leung Chun Ying ប្រធានក្រុមប្រឹក្សាភិបាលអង្គការមូលនិធិ GX និងជាអនុប្រធានគណៈកម្មាធិការជាតិនៃសន្និសីទពិគ្រោះយោបល់នយោបាយប្រជាជនចិន កាលពីរសៀលថ្ងៃទី ១៩ កញ្ញា នៅទីស្ដីការក្រសួងការងារឱ្យដឹងថា នៅក្នុងជំនួបនោះភាគីចិនបានឯកភាពជាមួយភាគីកម្ពុជា ក្នុងការបន្តកិច្ចសហប្រតិបត្តិការ ដែលអាចជួយដល់ការអភិវឌ្ឍធនធានមនុស្ស ជាពិសេសលើការអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET) ក៏ដូចជាបន្តពិនិត្យលើលទ្ធភាពដែលអាចបង្កើនទំនាក់ទំនង និងផ្លាស់ប្តូរការយល់ដឹងរវាងសិស្ស និងនិស្សិតនៃប្រទេសទាំងពីរ។

លោករដ្ឋមន្ត្រីស្តីទីបានបន្តថា ក្រៅពីនេះក្នុងជំនួប ភាគីទាំងពីរបានពិភាក្សាស្វែងយល់ពីគ្នានូវកិច្ចសហប្រតិបត្តិការ ដែលអាចជួយដល់ការអភិវឌ្ឍធនធានមនុស្ស ជាពិសេសលើការអប់រំបណ្តុះបណ្តាលបច្ចេកទេស និងវិជ្ជាជីវៈ បន្ថែមទៅលើអ្វីដែលអង្គការមូលនិធិ GX បាននិងកំពុងសហប្រតិបត្តិការលើវិស័យសុខាភិបាល។

កន្លងមកក្រសួងការងារ និងបណ្តុះបណ្តាលវិជ្ជាជីវៈ ក៏បានធ្វើកិច្ចសហការជាមួយសាធារណរដ្ឋប្រជាមានិតចិន ដូចជាបានបង្កើតវិទ្យាស្ថានពហុបច្ចេកទេសមិត្តភាពកម្ពុជា-ចិននៅតំបន់សេដ្ឋកិច្ចពិសេសក្រុងព្រះសីហនុ ក្រោមគម្រោងហិរញ្ញប្បទានសហប្រតិបត្តិការឥតសំណងរបស់សាធារណរដ្ឋប្រជាមានិតចិន។ ដាក់ឱ្យដំណើរការមជ្ឈមណ្ឌលមេគង្គឡានឆាងនៅវិទ្យាស្ថានជាតិពហុបច្ចេកទេសកម្ពុជា ក្រោមគម្រោងមេគង្គឡានឆាងនៃសាធារណរដ្ឋប្រជាមានិតចិន ក្នុងឆ្នាំ ២០១៨ ។ សហការ និងបង្កើតសាលាមធ្យមសិក្សាបច្ចេកទេស និងវិជ្ជាជីវៈផ្លូវសូត្រកម្ពុជា-ចិន-យ៉ាឡុង ចំនួន ៤ កន្លែង ដោយមាននៅវិទ្យាស្ថានជាតិបណ្តុះបណ្តាលបច្ចេកទេស វិទ្យាស្ថានពហុបច្ចេកទេសព្រះកុសុមៈ វិទ្យាស្ថានពហុបច្ចេកទេសភូមិភាគតេជោសែនបាត់ដំបង និងវិទ្យាស្ថានពហុបច្ចេកទេសភូមិភាគតេជោសែនកំពត។

លើសពីនេះ ភាគីកម្ពុជា-ចិន ក៏បាននិងកំពុងអនុវត្តកម្មវិធី បណ្តាញអភិវឌ្ឍន៍ជំនាញតាមរយៈកិច្ចសហប្រតិបត្តិការត្បូងត្បូង ដែលជាកម្មវិធីរួមគ្នារវាងចិន និងអង្គការអាយឡូដែលគម្រោងទាំងនេះ មានគោលបំណង ដើម្បីកសាងសមត្ថភាពស្ថាប័នទៅមុខឲ្យកាន់តែប្រសើរ និងអនុវត្តកម្មវិធីការងារសមរម្យប្រចាំប្រទេសរបស់ ILO ។ លើកកម្ពស់ការអភិវឌ្ឍជំនាញ ការរៀបចំជំនាញឡើងវិញ ការបង្កើនជំនាញតាមរយៈកិច្ចសហប្រតិបត្តិការ South-South ។

កម្មវិធីនេះ នឹងត្រូវបានអនុវត្តដោយប្រទេសចំនួន ៣ នៅក្នុងតំបន់អាស៊ីអាគ្នេយ៍រួមមានកម្ពុជា មីយ៉ានម៉ា និងឡាវ ដែលគាំទ្រថវិកាដោយសាធារណរដ្ឋប្រជាមានិតចិន និងគាំទ្របច្ចេកទេសដោយអង្គការអន្តរជាតិខាងការងារ (ILO) ព្រមទាំងការអភិវឌ្ឍធនធានមនុស្សជាច្រើនបន្ថែមទៀត៕

អត្ថបទ៖ សំអឿន