ព័ត៌មានជាតិ

លោកប្រាក់ សុខុន អតីតកាលធ្លាប់ជាអ្នកកាសែត មុនក្លាយជារដ្ឋមន្រ្តីក្រសួងការបរទេស

បានផុស

១ year មុន

នៅ

ថ្ងៃអង្គារ ៤ តុលា ២០២២

ដោយ

លោក ប្រាក់ សុខុន ជារដ្ឋមន្រ្តីមួយរូបដែលមានភាពលេចធ្លោ និងមានបទពិសោធន៍ការងារច្រើន។ ធ្លាប់បម្រើការងារក្នុងជួរកងទ័ព ជាមន្រ្តីរាជការស៊ីវិល ហើយបើតាមជីវប្រវត្តិលោកក៏មានបទពិសោធន៍ផ្នែកសារព័ត៌មាន ដោយធ្លាប់កាន់តួនាទីជានិពន្ធនាយកកាសែតទៀតផង។

អតីតរដ្ឋមន្រ្តីក្រសួងប្រៃសណីយ និងទូរគមនាគមន៍ ដែលក្រោយមកបានផ្លាស់មកដឹកនាំនៅក្រសួងការបរទេសក្នុងអំឡុងឆ្នាំ ២០១៦ បានសម្រេចស្នាដៃជាច្រើនទុកជាមរតកនិងបម្រើដល់ផលប្រយោជន៍ជាតិ។

នៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី០៩ ខែកញ្ញា ឆ្នាំ២០២២ ប្រមុខរដ្ឋាភិបាលសម្ដេចតេជោ ហ៊ុន សែន បានថ្លែងកោតសរសើរដល់លោក ប្រាក់ សុខុន ដែលបានដឹកនាំរៀបចំកិច្ចប្រជុំរដ្ឋមន្ត្រីការបរទេសអាស៊ានដែលកម្ពុជាធ្វើជាម្ចាស់ផ្ទះបានយ៉ាងជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តើឥស្សរជន ដែលជាប្រមុខការទូតកម្ពុជារូបនេះមានប្រវត្តិបែបណា?

ប្រវត្តិផ្ទាល់ខ្លួន

លោកប្រាក់ សុខុន កើតនៅថ្ងៃ ០៣ ឧសភា ឆ្នាំ ១៩៤៥ នៅរាជធានីភ្នំពេញ។ លោកបានរៀបអាពាហ៍ពិពាហ៍ជាមួយលោកជំទាវ ខេង សំវ៉ាន់ដា បច្ចុប្បន្នក៏ជាមន្រ្តីជាន់ខ្ពស់មួយរូបកាន់តំណែងជារដ្ឋលេខាធិការក្រសួងកិច្ចការនារី និងមានកូនប្រុសស្រីចំនួន ០៣ នាក់ ក្នុងនោះប្រុស ០២ នាក់។

ការសិក្សា

ក្នុងជីវប្រវត្តិបង្ហាញថា លោក ប្រាក់ សុខុន ជាបញ្ញវន្តមួយរូបដែលទទួលការសិក្សាជ្រៅជ្រះ។ ក្រោយបញ្ចប់ការសិក្សាក្នុងប្រទេស លោកបានទៅបន្តជំនាញនៅបណ្តាប្រទេសនៅអឺរ៉ុប ក្នុងនោះក៏មានជំនាញសារព័ត៌មានផងដែរ។

-១៩៧២-១៩៧៥ និស្សិតនៅមហាវិទ្យាល័យច្បាប់រាជធានីភ្នំពេញ
-១៩៨៩ វិញ្ញាបនបត្រនៃសាលាអន្តរជាតិ ផ្នែកសារព័ត៌មានក្រុងប៊ុយដាប៉ែស ប្រទេសហុងគ្រី
-១៩៩៣ សញ្ញាប័ត្រវិទ្យាស្ថានអន្តរជាតិផ្នែករដ្ឋបាលសាធារណៈក្រុងប៉ារីស (ផ្នែកទំនាក់ទំនងអន្តរជាតិ)
-២០០១ សញ្ញាប័ត្រនៃមជ្ឈមណ្ឌលសិក្សាផ្នែកការទូតនិងយុទ្ធសាស្ត្រក្រុងប៉ារីស

បទពិសោធន៍ការងារ

២០១៨-បច្ចុប្បន្ន

-ឧបនាយករដ្ឋមន្ត្រី និងរដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ
-ប្រធានគណៈកម្មាធិការជាតិសម្របសម្រួលកិច្ចការ បញ្ជូនកងកម្លាំងចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ
-ប្រធានក្រុមស្រាវជ្រាវ និងវិភាគព័ត៌មានខុទ្ទកាល័យសម្តេចតេជោនាយករដ្ឋមន្ត្រី (IRAG)

ខែមេសា ២០១៦ – ២០១៨

-ទេសរដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ
-ប្រធានគណៈកម្មាធិការជាតិសម្របសម្រួលកិច្ចការ បញ្ជូនកងកម្លាំងចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ
-ប្រធានក្រុមស្រាវជ្រាវ និងវិភាគព័ត៌មានខុទ្ទកាល័យសម្តេចតេជោនាយករដ្ឋមន្ត្រី (IRAG)

ខែកញ្ញា ២០១៣ – ខែមេសាឆ្នាំ ២០១៦

-រដ្ឋមន្ត្រីក្រសួងប្រៃសណីយ៍ និងទូរគមនាគមន៍
-អនុប្រធានទី១ អាជ្ញាធរមីនកម្ពុជា (CMAA)
-ប្រធានគណៈកម្មាធិការជាតិសម្របសម្រួលកិច្ចការ បញ្ជូនកងកម្លាំងចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ
-ប្រធានក្រុមស្រាវជ្រាវនិងវិភាគព័ត៌មានខុទ្ទកាល័យសម្តេចតេជោនាយករដ្ឋមន្ត្រី (IRAG)

ខែធ្នូ ២០១១ – ២០១២

-ប្រធានកិច្ចប្រជុំលើកទី១១ នៃបណ្ដារដ្ឋភាគីនៃអនុសញ្ញាស្តីពីការហាមប្រើប្រាស់គ្រាប់មីនប្រឆាំង មនុស្ស (11-MSP)

២០០៩ – ២០១៣

-រដ្ឋមន្ត្រីប្រតិភូអមនាយករដ្ឋមន្ត្រី
-ទីប្រឹក្សានាយករដ្ឋមន្ត្រី
-រដ្ឋលេខាធិការទីស្ដីការគណៈរដ្ឋមន្ត្រី
-អនុប្រធានអាជ្ញាធរមីនកម្ពុជា (CMAA)
-ប្រធានគណៈកម្មាធិការជាតិសម្របសម្រួលកិច្ចការ បញ្ជូនកងកម្លាំងចូលរួមបេសកកម្មថែរក្សាសន្តិភាពរបស់អង្គការសហប្រជាជាតិ
-ប្រធានក្រុមស្រាវជ្រាវ និងវិភាគព័ត៌មានន ឧទ្ទកាល័យសម្តេចតេជោ នាយករដ្ឋមន្ត្រី (IRAG)

២០០៤

-ទីប្រឹក្សានាយករដ្ឋមន្ត្រី
-រដ្ឋលេខាធិការទីស្តីការគណៈរដ្ឋមន្ត្រី
-អនុប្រធានទី២ អាជ្ញាធរមីនកម្ពុជា (CMAA)
-ប្រធានគណៈកម្មាធិការជាតិសម្របសម្រួលកិច្ចការបញ្ជូនកងកម្លាំងចូលរួមបេសកកម្មថែរក្សាសន្តិភារបស់អង្គការសហប្រជាជាតិ

២០០៣

-ទីប្រឹក្សានាយករដ្ឋមន្ត្រី
-អគ្គលេខាធិការរងរាជរដ្ឋាភិបាល

១៩៩៩

-ឯកអគ្គរាជទូតប្រចាំប្រទេសបារាំង បែលហ្ស៊ិក ហូឡង់ អូទ្រីស ដាណឺម៉ាក ស៊ុយអែត ហ្វាំងឡង់ សហគមន៍អឺរ៉ុប និងការិយាល័យ អ.ស.ប ប្រចាំក្រុងហ្សឺណែវ

១៩៩៣ -១៩៩៨

-ទីប្រឹក្សានាយករដ្ឋមន្ត្រីទទួលបន្ទុកកិច្ចការព័ត៌មាន និងទំនាក់ទំនងអន្តរជាតិ

១៩៩៣

-អ្នកនាំពាក្យអគ្គសេនាធិការកងយោធពលខេមរភូមិន្ទ

១៩៨៦ -១៩៩២

-និពន្ធនាយករងកាសែតកងទ័ព

១៩៧៩ – ១៩៨៦

-ប្រធានផ្នែកនិពន្ធកាសែតកងទ័ព

១៩៧៩

• មន្ត្រីយោធា

ភាសា

• ក្រៅពីភាសាកំណើត លោកប្រាក់ សុខុន អាចប្រើប្រាស់បានទាំងភាសាបារាំង និងអង់គ្លេស

ឋានន្តរសក្ដិកងយោធពលខេមរភូមិន្ទ

-នាយឧត្តមសេនីយ៍ ផ្កាយមាស ៤

គ្រឿងឥស្សរិយយស

-មេដាយជាតូបការ
-មេដាយព្រះរាជាណាចក្រកម្ពុជាថ្នាក់មហាសេរីវឌ្ឍន៍
-មេដាយព្រះរាជាណាចក្រកម្ពុជា ថ្នាក់មហាសេនា
-“Officier dans l’Ordre National de la Légion d’Honneur”

សមិទ្ធផលការងារ

មន្រ្តីជើងចាស់រូបនេះ ត្រូវបានគេទទួលស្គាល់លើគំនិតច្នៃប្រឌិត ហើយក្នុងរយៈជាង ៦ ឆ្នាំនៅក្រសួងការបរទេស លោកបានសម្រេចស្នាដៃជាច្រើនទុកជាមរតកបម្រើដល់ផលប្រយោជន៍ជាតិមានដូចជា៖

-បង្កើត “វិទ្យាស្ថានជាតិការទូតនិងទំនាក់ទំនងអន្តរជាតិ (NIDIR)”ដំបូងគេ នៅក្នុងវិស័យការទូតកម្ពុជា

ឆ្នាំ ២០១៨ លោក ប្រាក់ សុខុន បានបង្កើតវិទ្យាស្ថានជាតិការទូតនិងទំនាក់ទំនងអន្តរជាតិ ជាប្រវត្តិសាស្ត្រលើកដំបូងគេនៅក្នុងវិស័យការទូតកម្ពុជា។

ស្ថាប័ននេះចូលរួមចំណែកគាំទ្រ និងពង្រឹងជួរអ្នកការទូតរបស់កម្ពុជាឱ្យមានវិជ្ជាជីវ:ច្បាស់លាស់ពិតប្រាកដ អាចបំពេញមុខងារជាតំណាងដ៏ស័ក្តិសម និងការពារផលប្រយោជន៍ប្រទេសជាតិ និងប្រជាពលរដ្ឋលើឆាកអន្តរជាតិ។

-ដាក់ចេញ “យុទ្ធសាស្ត្រការទូតសេដ្ឋកិច្ច” ឆ្នាំ២០២១-២០២៣

យុទ្ធសាស្រ្តការទូតសេដ្ឋកិច្ចឆ្នាំ២០២១-២០២៣ រៀបចំឡើងនៅក្នុងកាលៈទេសៈដែលពិភពលោកក៏ដូចជាប្រទេសកម្ពុជា កំពុងប្រឈមទៅនឹងការគំរាមកំហែងធ្ងន់ធ្ងរបំផុតមិនធ្លាប់ជួបក្នុងរយៈពេលជាង ៣ ទសវត្សរ៍ចុងក្រោយនេះ។

តាមរយៈយុទ្ធសាស្រ្តនេះ ក្រសួងការបរទេស និងសហប្រតិបត្តិការអន្តរជាតិនឹងដើរតួនាទីជាអ្នកសម្របសម្រួល និងជំរុញយន្តការដែលមានស្រាប់ ដើម្បីទាក់ទាញការវិនិយោគទុនផ្ទាល់ពីបរទេស។

បង្កើត “ផ្ទះបាយអង្គរ“

“ផ្ទះបាយអង្គរ” ជាការកំណែទម្រង់ផ្ទៃក្នុង ដែលផ្តួចផ្តើមឡើងដោយលោកប្រាក់ សុខុន ជាផ្នែកមួយនៃការទូតអាហារ។ ផ្ទះបាយអង្គរ គឺជាផ្នែកមួយនៃការទូតសេដ្ឋកិច្ច ជាឧបករណ៍គន្លឹះដើម្បីលើកស្ទួយនិងផ្សព្វផ្សាយវិស័យការទូតកម្ពុជា តាមរយៈការបង្ហាញអំពីប្រវត្តិម្ហូបខ្មែរនិងអត្តសញ្ញាណជាតិខ្មែរ ដែលមានតួនាទីយ៉ាងសំខាន់ដល់វិស័យការទូតអាហារ ដើម្បីស្វែងរកការគាំទ្រ និងការទទួលស្គាល់ពីម្ហូបខ្មែរនៅលើឆាកអន្តរជាតិ៕