រដ្ឋបាលខេត្តបាត់ដំបងត្រៀមរៀបចំព្រឹត្តិការណ៍សង្ក្រាន្តរយៈពេល ៥ ថ្ងៃ

ក្នុងខែមេសាឆ្នាំ២០២៤ ខាងមុខនេះ រដ្ឋបាលខេត្តបាត់ដំបងបានគ្រោងរៀបចំព្រឹត្តិការណ៍សង្ក្រាន្តបាត់ដំបងឲ្យបានអធឹកអធ័មជាទីបំផុត ដោយត្រៀមរៀបចំចាប់ពីថ្ងៃទី១២ ដល់ថ្ងៃទី១៦ ខែមេសា គឺសរុបមានចំនួន៥ថ្ងៃ ដើម្បីបង្កភាពសប្បាយរីករាយដល់ប្រជាពលរដ្ឋក្នុងខេត្ត ក៏ដូចជាភ្ញៀវទេសចរណ៍ជាតិ និងអន្តរជាតិដែលមកពីខាងក្រៅផងដែរ។

នៅក្នុងផែនការរៀបចំព្រឹត្តិការណ៍សង្ក្រាន្តរយៈពេល៥ ថ្ងៃនេះ គឺរដ្ឋបាលខេត្តមានគោលបំណងបង្កើតការសប្បាយរីករាយ ក្នុងឱកាសចូលឆ្នាំប្រពៃណីជាតិខ្មែរ ព្រមទាំងបានផ្សព្វផ្សាយនូវ វប្បធម៌ ប្រពៃណីដ៏ល្អ តាមរយៈការរៀបចំសិល្បៈ លេងល្បែងប្រជាប្រិយផ្សេងៗ ពិសេសគឺការបង្ហាញដល់ភ្ញៀវជាតិ និងអន្តរជាតិឲ្យបានស្គាល់អំពីទំនៀមទំលាប់ក៏ដូចជាសក្តានុពលរបស់អ្នករស់នៅខេត្តបាត់ដំបងតាមរយៈការដាក់តាំងនូវផលិតផលតាមបណ្ដាស្រុក ក្រុងទាំង១៤ ផងដែរ។

រដ្ឋបាលខេត្តបានបញ្ជាក់ថា នៅក្នុងរយៈពេល៥ ថ្ងៃនៃព្រឹត្តិការណ៍សង្ក្រាន្តបាត់ដំបងនេះ គឺរដ្ឋបាលខេត្តបានកំណត់ទីតាំងដែលត្រូវរៀបចំរួមមាន តាមបណ្ដោយវិថីសម្ដេចក្រឡាហោម ស ខេង ក្នុងបរិវេណវិទ្យាល័យនេតយ៉ង់ និងខាងមុខសារមន្ទីរប្រវត្តិសាស្ត្រខេត្ត (សាលាខេត្តចាស់) ក្នុងក្រុងបាត់ដំបងតែម្ដង ដោយមានការដាក់តាំងម្ហូបអ្នកបាត់ដំបង ចាប៉ីដងវែងយក្ស ផ្លែទុរេនយក្ស និងណែមយក្សជាដើម៘ លុះនៅពេលរាត្រីក៏មានការរៀបចំខនសឺតប្រគំតន្ត្រីខ្នាតយក្ស ព្រមទាំងមានប្រដាល់គុនខ្មែរផងដែរ។

នៅក្នុងការរៀបចំព្រឹត្តិការណ៍សង្ក្រាន្តបាត់ដំបងនេះ គឺរដ្ឋបាលខេត្តបាត់ដំបងបានសហការគ្នាជាមួយសហភាពសហព័ន្ធយុវជនកម្ពុជាខេត្តបាត់ដំបង ហើយរដ្ឋបាលខេត្តក៏បានអំពាវនាវដល់ប្រជាពលរដ្ឋ និងភ្ញៀវទេសចរណ៍ទាំងទីជិតទីឆ្ងាយ អញ្ជើញចូលរួមកម្សាន្តឱ្យបានច្រើនកុះករប្រកបដោយភាពសប្បាយរីករាយទាំងអស់គ្នា៕

អត្ថបទ៖ សោ និយមរ័ត្ន