ឯកឧត្តម ហ៊ុន ម៉ានី ៖ គ្រូបង្រៀន គឺជាឆ្អឹងខ្នងនៃគុណភាពអប់រំ និងជាមូលដ្ឋានគ្រឹះ ​នៃការអភិវឌ្ឍធនធានមនុស្ស

ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេស​​ចរណ៍ នៃរដ្ឋសភា បានបង្ហោះសារអបអរសាទរទិវាគ្រូបង្រៀន ៥ តុលា ឆ្នាំ២០២២ ក្រោមប្រធានបទ៖ «គ្រូបង្រៀនយើង អនាគតយើង ប្រទេសជាតិយើង» ដោយក្នុងនោះ ឯកឧត្ដម បានលើកឡើងថា បង្រៀន គឺជាឆ្អឹងខ្នងនៃគុណភាពអប់រំ និងជាមូលដ្ឋានគ្រឹះ ​នៃការអភិវឌ្ឍធនធានមនុស្ស។

តាមរយៈទំព័រហ្វេសប៊ុករបស់ខ្លួន ឯកឧត្តម ហ៊ុន ម៉ានី បានសរសេរថា គ្រូបង្រៀន គឺជាបេះដូងនៃកំណែទម្រង់វិស័យអប់រំ ដើម្បីការអភិវឌ្ឍ។ គ្រូបង្រៀន គឺជាឆ្អឹងខ្នងនៃគុណភាពអប់រំ និងជាមូលដ្ឋានគ្រឹះ ​នៃការអភិវឌ្ឍធនធានមនុស្ស សម្រាប់ប្រទេសជាតិ។ គ្រូបង្រៀន ជាប្រទីបបំភ្លឺលោកប្រកបដោយគតិបណ្ឌិត។

ឆ្លៀតក្នុងឱកាសអបអរសាទរទិវាគ្រូបង្រៀន ៥ តុលា ឯកឧត្តម ហ៊ុន ម៉ានី បានសម្តែងនូវសេចក្តីគោរព និងថ្លែងអំណរគុណ ចំពោះលោកសាស្រ្តាចារ្យ លោកគ្រូ-អ្នកគ្រូ និងបុគ្គលិកអប់រំទាំងអស់ ដែលបានខិតខំប្រឹងប្រែង និងលះបង់ខ្ពស់មិនគិតនឿយហត់ ក្នុងការងារអប់រំ ផ្តល់ចំណេះដឹងដល់សិស្សានុ-សិស្សគ្រប់ៗរូប។ ជាអាទិ៍ក្នុងកាលៈទេសៈ ដែលប្រទេសជាតិជួបប្រទះនឹងវិបត្តិជំងឺឆ្លងរាលដាលកាចសាហាវ កាលពីពេលថ្មីៗកន្លងទៅ លោកគ្រូ-អ្នកគ្រូបានព្យាយាមជម្នះឧបសគ្គគ្រប់បែបយ៉ាង ដើម្បីបន្តនិរន្តភាព នៃការងារអប់រំ និងឈានមកដល់ភាពជោគជ័យនៅថ្ងៃនេះ។

ឯកឧត្តម ហ៊ុន ម៉ានី បានសរសេរបន្តថា «ឆ្លៀតក្នុងឱកាសនេះដែរ ខ្ញុំក៏សូមរំលឹក និងបួងសួងដល់ដួងវិញ្ញាណក្ខន្ធរបស់លោកគ្រូ-អ្នកគ្រូ បុគ្គលិកអប់រំទាំងអស់ ដែលបានចែកឋានទៅ សូមបានសោយសុខក្នុងឋានសុគតិភពកុំបីឃ្លៀងឃ្លាតឡើយ»៕