ផ្លូវជាតិ លេខ៧ ត្រូវផ្អាកចរាចរណ៍មួយរយៈ ដេីម្បីក្រុមការងារដាក់លូរំដោះទឹកចេញពីផ្លូវជាតិ

រដ្ឋបាល ខេត្តកំពង់ចាម បានជូនដំណឹងដល់សាធារណៈជនទាំងអស់មេត្តាជ្រាបថា កំណាត់ផ្លូវជាតិលេខ៧ ត្រូវផ្អាកចរាចរណ៍មួយរយៈ ទាំងម៉ូតូ រថយន្ត គ្រប់ប្រភេទ នៅត្រង់ចំណុចឃុំខ្វិតធំ ស្រុកព្រៃឈរ ខណៈមន្ត្រីសាធារណការ និងដឹកជញ្ជូន ខេត្តកំពង់ចាម កាត់ផ្លូវជាតិលេខ៧ ដាក់លូមុខ១ម៉ែត្រ មានពីរជួរ ដេីម្បីរំដោះទឹកចេញពីបណ្តោយផ្លូវជាតិលេខ៧ ដែលកំពុងជន់លិចដោយសារជំនន់ទឹកភ្លៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនឹងនេះ នៅរសៀល ថ្ងៃទី៧ ខែតុលា ឆ្នាំ២០២២ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម  បានដឹកនាំមន្ត្រីជំនាញ នៃមន្ទីរសាធារណការ និងដឹកជញ្ជូន ខេត្តកំពង់ចាម សហការជាមួយអាជ្ញាធរ ស្រុកព្រៃឈរ ចុះពិនិត្យស្ថានភាពទឹកជំនន់ទឹកភ្លៀងដែលបង្កឱ្យហូរកាត់ ជន់លិចបណ្តោយផ្លូវជាតិលេខ៧ ត្រង់ចំណុចភូមិកប្បាស ឃុំខ្វិតធំ ស្រុកព្រៃឈរ ខេត្តកំពង់ចាម។ 

បន្ទាប់ពី លោក អ៊ុន ចាន់ដា អភិបាល បានបញ្ជាឱ្យមន្ទីរសាធារណការ និងដឹកជញ្ជូន ខេត្តកំពង់ចាម ដែលដឹកនាំដោយ លោក សុខ លឹមហៀង ប្រធានមន្ទីរ ឱ្យក្រុមការងារកាត់ផ្លូវជាតិលេខ៧ ចេញ ដេីម្បីដាក់លូមុខកាត់ ១ម៉ែត្រ ចំនួន ២ជួរ  រំដោះទឹកចេញពីផ្លូវ និងមួយចំហៀងផ្លូវទៀត។

លោក សុខ លឹមហៀង ប្រធានមន្ទីរ សាធារណការ និង ដឹកជញ្ជូន ខេត្តកំពង់ចាម បានឱ្យដឹងថា ផ្លូវជាតិលេខ៧នេះត្រូវផ្អាកចរាចរណ៍មួយរយៈសិន ហេីយសូមអធ្យាស្រ័យដល់សាធារណជនទាំងអស់ដែលធ្វេីដំណេីរឆ្លងកាត់ផ្លូវនេះ។ លោកប្រធានមន្ទីរ បញ្ជាក់ទៀតថា ក្រុមការងារនឹងពន្លឿនការដាក់លូឱ្យរួចរាល់នៅព្រឹកថ្ងៃទី៨ ខែតុលានេះ ដេីម្បីបេីកចរាចរណ៍ឱ្យបងប្អូនប្រជាពលរដ្ឋអាចធ្វេីដំណេីរឆ្លងកាត់បាន៕

អត្ថបទ និង រូបភាព៖  ឡេក  ចាន់ពេជ្រ