ក្រសួងការងារចេញគោលការណ៍បង្រៀន និងរៀនពីចម្ងាយសម្រាប់គ្រឹះស្ថានអប់រំបណ្ដុះបណ្ដាលបច្ចេកទេស

ក្រសួងការងារ និងបណ្តុះបណ្តាលបានដាក់ចេញនូវការបង្រៀននិងរៀនពីចម្ងាយ ឬតាមអនឡាញសម្រាប់គ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈក្រោមឱវាទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត អុិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានឲ្យដឹងថា ការដាក់ចេញនូវ
ការបង្រៀននិងរៀនពីចម្ងាយឬតាមអនឡាញនេះក្នុងគោលបំណងផ្ដល់ឱកាសដល់សិក្ខាកាម សិស្ស និស្សិត យុវជន ឬអ្នកកំពុងតែបម្រើការងារនៅតាមសហគ្រាសគ្រឹះស្ថាន រោងចក្រ ឬស្ថាប័ននានានិងប្រជាពលរដ្ឋទូទៅទទួលបានសេវាអប់រំបណ្តុះបណ្តាលបច្ចេកទេសនិងវិជ្ជាជីវៈដ៏សម្បូរបែបនិងបណ្ដុះទម្លាប់នៃការប្រើប្រាស់កម្មវិធីបណ្ដុះបណ្ដាលបច្ចេកវិទ្យា និងឧបករណ៍វៃឆ្លាតទាំងនៅក្នុងអំឡុងពេលមានវិបត្តិនៃការរីករាលដាលជំងឺកូវីដ-១៩ និងទៅអនាគត។

លោករដ្ឋមន្ត្រីបានបន្តថា បន្ថែមពីនេះគោលការណ៍ណែនាំនេះនឹងឆ្លើយតបទៅនឹងយុទ្ធសាស្ត្រទី២ “ការធ្វើទំនើបកម្មប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ” នៃផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ឆ្នាំ២០១៩-២០២៣ ដែលចាំបាច់ក្រសួងត្រូវបង្កើតកម្មវិធីបណ្តុះបណ្តាលឱ្យសម្បូរបែបនិងស្របតាមការរីកចម្រើនបច្ចេកវិទ្យា និងបដិវត្តន៍ឧស្សាហកម្មជំនាន់ទី៤។

ជាមួយគ្នានេះដែរ លោករដ្ឋមន្ត្រីបានបញ្ជាក់ថា គោលការណ៍ណែនាំនេះនឹងបង្ហាញអំពីដំណើរការនៃការចុះឈ្មោះចូលរៀន ការបង្រៀន ការរៀនការអនុវត្តផ្ទាល់ ការប្រឡង និងការត្រួតពិនិត្យវាយតម្លៃជាដើម។

លោករដ្ឋមន្ត្រីបានឲ្យដឹងទៀតថាដើម្បីអនុវត្តការបង្រៀន និងរៀនពីចម្ងាយឬតាមអនឡាញ គ្រឹះស្ថាន TVET នីមួយៗត្រូវរៀបចំផែនការនិងសកម្មភាពការងារមួយចំនួនរួមមានផែនការរយៈពេលខ្លី មធ្យមនិងវែងនៃដំណើរការបង្រៀន និងរៀនពីចម្ងាយ ឬតាមអនឡាញ របស់គ្រឹះស្ថាន អ.ប.វ. ។ ណែនាំសាស្រ្តាចារ្យ គ្រូបច្ចេកទេស/ឯកទេស រៀបចំកិច្ចតែងការបង្រៀនឯកសារមេរៀន បទបង្ហាញ ការផលិតវីដេអូបង្រៀនទាំងទ្រឹស្តី និងការអនុវត្ត។ រៀបចំនិងគ្រប់គ្រងបន្ទប់បង្រៀន រោងជាង បន្ទប់ពិសោធន៍/មន្ទីរពិសោធន៍មូលដ្ឋានឧបករណ៍/សម្ភារបង្រៀន និងរៀនពីចម្ងាយ ឬតាមអនឡាញ ទាំងទ្រឹស្តីនិងការអនុវត្ត។ ផែនការចុះកម្មសិក្សារបស់សិក្ខាកាម សិស្ស និស្សិតនៅតាមសហគ្រាសគ្រឹះស្ថាននិងផែនការប្រឡងបញ្ចប់ការសិក្សារបស់សិក្ខាកាម សិស្ស និស្សិតជាដើម។

គួរបញ្ជាក់ថាក្នុងរយៈពេល ៥ ឆ្នាំចុងក្រោយនេះ មានសិក្ខាកាមសិស្សនិស្សិតនិងកម្មករនិយោជិតប្រមាណជាង ២០ ម៉ឺននាក់បានទទួលការបណ្តុះបណ្តាលជំនាញថ្មីៗដើម្បីបំពេញតាមតម្រូវការការងារ៕

អត្ថបទ៖ សំអឿន

ចុចអាន៖ ធនាគារជាតិ ​៖​ តម្លៃ​ប្រាក់​រៀល​បាន​វិល​មក​គន្លង​ដើម​ធម្មតា​ នៅ​ចុង​ឆ្នាំ​២០២០

ចុចអាន៖ លោក អុិត សំហេង អំពាវនាវពលករខ្មែរធ្វើការនៅថៃ កុំទាន់វិលត្រឡប់មកស្រុកកំណើត ចៀសវាងហានិភ័យ