​លោក សុខ ឥសាន៖ ស្មារតី​នៃការអនុវត្តកិច្ចព្រមព្រៀង​ក្រុងប៉ារីស​គ្មានទីបញ្ចប់នោះទេ​

លោក សុខ ឥសាន អ្នកនពាក្យគណបក្សប្រជាជនកម្ពុជាបានឲ្យដឹងថា ​ការអនុវត្តស្មារតីនៃកិច្ចព្រម​ព្រៀង​ក្រុងប៉ារីស ២៣ តុលា ១៩៩១ ​គ្មានទីបញ្ចប់នោះទេ​។

លោក សុខ ឥសាន លើកឡើងនៅក្នុងវេទិកាមួយ​ស្ដីពីកិច្ចព្រមព្រៀង​សន្តិភាពទីក្រុងប៉ារីស​នៅថ្ងៃទី ២០ ខែតុលានេះ បញ្ជាក់ថា កិច្ចព្រមព្រៀងទីក្រុងប៉ារីស ស្ដីពីបញ្ហាកម្ពុជា មានពីរដំណាក់ការ ដែលដំណាក់ការទី១ ចាប់ពីថ្ងៃចុះហត្ថលេខា (២៣ ខែតុលា ឆ្នាំ ១៩៩១) រហូតដល់បោះឆ្នោត បង្កើតរដ្ឋធម្មនុញ្ញថ្មី និងរាជរដ្ឋាភិបាលនិតិកាលទី១ រួចហើយគឺចប់កិច្ចព្រមព្រៀងក្រុងប៉ារីសហើយ ក៏ប៉ុន្តែនៅក្នុងខ្លឹមសារនៃកិច្ចព្រមព្រៀងគឺបានបញ្ជាក់ហើយរាល់ខ្លឹមសារសំខាន់ៗ ដែលពាក់ព័ន្ធនឹងជីវិតនយោបាយរបស់កម្ពុជាគឺត្រូវចូលទៅក្នុងរដ្ឋធម្មនុញ្ញដែលកម្ពុជា​ត្រូវបន្តអនុវត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ ឥសាន បញ្ជាក់ថា ការបន្តអនុវត្តពីឆ្នាំ ១៩៩៣ រហូតមកដល់បច្ចុប្បន្ន និងទៅអនាគតទៀត មិនមែនជាការអនុវត្តកិច្ចព្រមព្រៀងទេ គឺការអនុវត្តស្មារតីនៃកិច្ចព្រមព្រៀង។

លោក សុខ ឥសានលើកឡើងថា «ការបង្កើតអ៊ុនតាក់ ការបង្កើតក្រុមប្រឹក្សាជាតិជាន់ខ្ពស់ ហើយការដែលយក ជនភៀសខ្លួន ការដកកងទ័ព ឬត្រួតពិនិត្យផ្ទៀងផ្ទាត់ការដកកងទ័ពបរទេសពីកម្ពុជាធ្វើអស់រួចហើយ បោះឆ្នោតរួចហើយ អ៊ុនតាក់រំសាយចោលខ្លួនឯងត្រឡប់ទៅផ្ទះវិញរួចហើយ អាហ្នឹងហើយ! ហៅថាការអនុវត្តកិច្ចព្រមព្រៀង»។

ប៉ុន្តែនៅស្មារតី ដែលជាការថែរក្សា បូរភាពទឹកដី អធិបតេយ្យ ឯករាជ្យភាព និងភាពមិនអាចរំលោភបំពានបាននៃ អព្យាក្រឹតភាព និងឯកភាពជាតិកម្ពុជានៅតែអនុវត្តបន្ត។

បើតាមមន្ត្រីជាន់ខ្ពស់គណបក្សប្រជាជនកម្ពុជារូបនេះអះអាងថា ការកសាងប្រទេសកម្ពុជា​ឲ្យមានការរីកច្រើន ​ឥឡូវសេដ្ឋកិច្ច​របស់កម្ពុជា ស្ថិតនៅចំណូលមធ្យម​កម្រិតទាប​ ហើយត្រៀមចូលកម្រិតមធ្យម ​ពេលកូវីដ១៩ មកដល់ក៏ធ្លាក់មកវិញមួយកម្រិតទៀត​ ដូច្នេះត្រូវកសាងបន្តទៅទៀត។ ដូច្នេះ! ការអនុវត្តកិច្ចព្រមព្រៀង​នៅបន្តទៅទៀត ប្រសិនបើកិច្ចព្រម​ព្រៀង​​ត្រូវបញ្ចប់​បណ្ដាប្រទេសនានា​នៅលើពិភពលោក ជាពិសេស​ ប្រទេសហត្ថលេខីទាំង ១៨ គឺគាត់​ឈប់ជួយ ពីព្រោះគាត់បាត់អស់កាតព្វកិច្ចរ​បស់គាត់ត្រូវជួយហើយ​ ដូច្នេះ​វាអត់ចប់ទេ​៕

អត្ថបទ៖ ឡេង ដេត