រដ្ឋបាលខេត្តកណ្តាលជំរុញឱ្យមានការវិនិយោគ និងអភិរក្សលើវិស័យវប្បធម៌

លោក ហាក់ សុខមករា អភិបាលរងខេត្តកណ្ដាលបានជំរុញឱ្យមានគាំទ្រចូលរួមការវិនិយោគលើវិស័យ​វប្បធម៌បន្ថែមទៀត ដើម្បីបង្កើតឱ្យមានទីផ្សារការងារក៏ដូចជាចូលរួមជំរុញកំណើនសេដ្ឋកិច្ចផងដែរ។

ថ្លែងក្នុងពិធីបិទការប្រឡងចម្រៀងមហោស្រពសិល្បៈមហាជន ខេត្តកណ្តាល លើកទី៤ ឆ្នាំ២០២២​កាលពីរសៀលថ្ងៃទី១៩ តុលា លោក ហាក់ សុខមករា បានមានប្រសាសន៍ថាប្រទេសកម្ពុជា មាន​សម្បត្តិវប្បធម៌សម្បូរបែបទាំងរូបី និងអរូបី ដែលបុព្វបុរសយើងបានបន្សល់ទុករហូតដល់សព្វថ្ងៃ មានតួនាទីសំខាន់ក្នុងការផ្សារភ្ជាប់ទំនាក់ទំនងរវាងមនុស្សនិងមនុស្ស សង្គមនិងសង្គម ព្រមទាំងរួម​ចំណែកក្នុងការលើកកម្ពស់សេដ្ឋកិច្ចជាតិ និងភាពសុខសាន្តរបស់ប្រជាពលរដ្ឋ។

ដោយឡែកខេត្តកណ្តាល ក៏សម្បូរទៅដោយបេតិកភណ្ឌវប្បធម៌ទាំងរូបីនិងអរូបី ដែលយើងត្រូវចូលរួមថែរក្សា ការពារអភិរក្សកេរដំណែលវប្បធម៌ជាតិឱ្យគង់វង្ស និងចូលរួមគាំទ្រឱ្យមានការវិនិយោគលើវិស័យវប្បធម៌ ដើម្បីកំណើនសេដ្ឋកិច្ច បង្កើតឱ្យមានទីផ្សារការងារ គឺជាកិច្ចការចាំបាច់ចំពោះមុខ ឆ្លើយតបនឹង​កំណែទម្រង់​ស៊ីជម្រៅគ្រប់ជ្រុងជ្រោយរបស់រាជរដ្ឋាភិបាលកម្ពុជា។ នេះជាការបន្ថែមរបស់លោកអភិបាលរងខេត្ត។

បើតាមលោក ហាក់ សុខមករា មហោស្រពសិល្បៈមហាជន ខេត្តកណ្តាល លើកទី៤ ឆ្នាំ២០២២ គឺបានចូលរួម​ចំណែកអភិរក្ស និងលើកតម្កើងសិល្បៈវប្បធម៌ជាតិគ្រប់ទម្រង់ ក៏ដូចជាការផ្សព្វផ្សាយដល់សាធារណជន មហាជន យុវជនបានឃើញបានស្គាល់ និងបានយល់ អំពីសិល្បៈទស្សនីយភាពខ្មែរ ដែលមានប្រវត្តិដ៏យូរលង់ណាស់មកហើយ។

លោកអភិបាលរងខេត្ត បានសំណូមពរដល់ថ្នាក់ដឹកនាំ មន្ត្រីរាជការ អាជ្ញាធរគ្រប់លំដាប់ និង សិល្បករ សិល្បកា​រិនីទាំងអស់ បន្តសហការចូលរួមចំណែកជំរុញការផ្សព្វផ្សាយ ការផ្ទេរចំណេះដឹង ជំនាញបច្ចេកទេស និងទេព​កោសល្យវប្បធម៌ ក៏ដូចជាការក្រើនរំលឹក បំផុសស្មារតីស្រឡាញ់វប្បធម៌ និងមនសិការស្នេហាជាតិ ដល់ប្រជាពល​រដ្ឋទាំងអស់ ចូលរួមថែរក្សាឱ្យបានស្ថិតស្ថេរគង់វង្ស នូវសម្បត្តិវប្បធម៌ជាតិ ដែលជាអត្តសញ្ញាណដ៏ខ្ពង់ខ្ពស់ ឧត្តុង្គឧត្តម នៃជាតិខ្មែរយើង រក្សាបាននូវឯកភាពជាតិ សាមគ្គីភាព សន្តិភាព និងការអភិវឌ្ឍសម្បត្តិវប្បធម៌ជាតិយើងទាំងអស់គ្នា។

ជាមួយគ្នានេះ លោកស្រី មួង សារឹម មន្ទីរវប្បធម៌ និងវិចិត្រសិល្បៈខេត្តកណ្តាល បានឱ្យដឹងថា ក្រុមសិល្បៈមហាជន​ចូលរួមដាក់ពាក្យ មកពីតាមបណ្តាក្រុង ស្រុក ក្នុងខេត្ត មានក្រុមសិល្បៈ ល្ខោនបាសាក់ ចំនួន ៥ក្រុម, ក្រុមរបាំ ៣ក្រុម, ចម្រៀងសម័យ ៤២នាក់ និងចម្រៀងប្រពៃណី ៣៥នាក់ ដែលអញ្ជើញ ។ ក្នុងនោះបានជម្រុះ និងជ្រើសរើស​ក្រុម​សិល្បៈមានសមត្ថភាព ចូលមកប្រឡងប្រជែងលើឆាកនៅសល់ ក្រុមល្ខោនបាសាក់ ៣ក្រុម, ក្រុមរបាំ ២ក្រុម, ចម្រៀង​សម័យ ១២នាក់ និង ចម្រៀងប្រពៃណី ៤នាក់៕ សំអឿន