ព័ត៌មានជាតិ
បុណ្យអុំទូក ៣ថ្ងៃ នៅខេត្តកោះកុង ទទួលបានភ្ញៀវទេសចរជាង ២ម៉ឺននាក់
ខេត្តកោះកុង បានទទួលភ្ញៀវទេសចរសរុបជាង ២ម៉ឺន ដែលពួកគេបាននាំគ្នាមកលេងកម្សាន្តនៅខេត្តកោះកុង តាមតំបន់រមណីយដ្ឋាននានា អំឡុងព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប រយៈពេល ៣ថ្ងៃកន្លងទៅនេះ។
លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង បង្ហាញថា បើគិតចាប់ពីថ្ងៃទី ៧ដល់ថ្ងៃទី ៩ ខែវិច្ឆិកា មូលដ្ឋានខេត្តកោះកុង មានភ្ញៀវទេសចរសរុបប្រមាណ ២១,០៨២នាក់។ ក្នុងនោះ អ្នកទេសចរបរទេសចំនួន ២៧៧នាក់ បើធៀបនឹងរយៈពេលដូចគ្នាកាលពីឆ្នាំ ២០២១ ថយចុះចំនួន ៣,៤៨៦នាក់ ស្មើនឹង ១៦ភាគរយ។
លោកប្រធានមន្ទីរទេសចរណ៍ខេត្តកោះកុង លើកឡើងនៅថ្ងៃទី ១០ ខែវិច្ឆិកានេះថា អំឡុងឱកាសព្រះរាជពិធីបុណ្យអុំទូក អកអំបុក សំពះព្រះខែ ឆ្នាំ ២០២២ ក្រុមភ្ញៀវទេសចរ បាននាំគ្នាទៅលេងកម្សាន្តនៅតំបន់អេកូទេសចរធម្មជាតិឆាយអារ៉ែង សហគមន៍អេកូទេសចរព្រៃកោងកាងពាមក្រសោប ទឹកជ្រោះតាតៃក្រោម កោះស្តេច តំបន់រមណីយដ្ឋានឆ្នេរនេសាទ និងតំបន់ព្រំដែនអន្តរជាតិចាំយាម។
ទន្ទឹមនោះ រដ្ឋបាលខេត្តកោះកុង សហការជាមួយមន្ទីរពាក់ព័ន្ធ និងក្រុមហ៊ុនឯកជនរៀបចំជាកម្មវិធីប្រគុំតន្រ្តី បណ្តែតប្រទីប តាំងពិព័រណ៌ស្នាដៃសិស្ស សម្ភារៈប្រើប្រាស់ និងចំណីអាហារ នៅទល់មុខអគារសាលា ដើម្បីផ្តល់ភាពសប្បាយដល់ប្រជាពលរដ្ឋ និងអ្នកទេសចរ។ ទាក់ទិននឹងបញ្ហាតម្លៃសេវាកម្មស្នាក់នៅ និងចំណីអាហារ ម្ចាស់ភោគជនីយដ្ឋាន អាហារដ្ឋាន ផ្ទះសំណាក់ ក៏ដូចជាសណ្ឋាគារ មិនតម្លើងថ្លៃហួសហេតុពេកនោះទេ។
សន្តិសុខសណ្តាប់ធ្នាប់សាធារណៈអំឡុងថ្ងៃពិធីបុណ្យអុំទូក ៣ថ្ងៃនេះ លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង ឲ្យដឹងដែរថា គ្រប់តាមគោលដៅទេសចរនានា សុទ្ធតែត្រូវបានយកចិត្តទុកដាក់ខ្ពស់ ពង្រាយកងកម្លាំងសមត្ថកិច្ចល្បាត ការពារសុវត្ថិភាពជូនអ្នកទេសចរ និងប្រជាពលរដ្ឋ។ ឆ្លើយតបតាមបទបញ្ជារបស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោកស្រី អភិបាលខេត្ត។
លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង អះអាងថា ៣ថ្ងៃនៃពិធីបុណ្យអុំទូកឆ្នាំ ២០២២នេះ ពុំបទល្មើសអ្វីកើតឡើងគួរឲ្យកត់សម្គាល់ឡើយ ពោលគឺមានសុខសុវត្ថិភាពល្អប្រសើរច្រើនណាស់សម្រាប់ឆ្នាំ ២០២២ មិនថានៅទីរួមខេត្ត ឬបណ្តាស្រុកគោលដៅទេសចរណ៍៕
អត្តបទ៖ សិរីវឌ្ឍនៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?