សម្ដេចតេជោ ហ៊ុន​ សែន ប្រកាសអំពីភាពជោគជ័យ នៃប្រជុំកំពូលអាស៊ានឆ្នាំ ២០២២ ដែលកម្ពុជាជាម្ចាស់ផ្ទះ  

សម្ដេចតេជោ ហ៊ុន សែ​ន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២នេះ បានប្រកាសអំពីភាពជោគជ័យនៃការរៀបចំ ធ្វើជាប្រធានអាស៊ានរបស់កម្ពុជា សម្រាប់ឆ្នាំ ២០២២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់សម្ដេចតេជោ ហ៊ុន សែន ខាងលើនេះ គឺនៅក្នុងពិធីបិទកិច្ចប្រជុំកំពូលអាស៊ានលើកទី ៤០ និង៤១ និងកិច្ចប្រជុំកំពូលពាក់ព័ន្ធ និងពិធីផ្ទេរតំណែងប្រធានអាស៊ានជូនឥណ្ឌូណេស៊ី នារសៀលថ្ងៃទី ១៣ ខែវិច្ឆិកា ឆ្នាំ ២០២២នេះ។

សម្ដេចតេជោ ហ៊ុន សែន បានថ្លែងថា បន្ទាប់ពីសម្ដេច បានទទួលបានតំណែងជាប្រធានអាស៊ានពីព្រះចៅ​ ស៊ុល​តង់ព្រុយណេ កាលពីថ្ងៃទី ២៨ ខែតុលា ឆ្នាំ ២០២១រួចមក ​គឺជារយៈពេល ១ឆ្នាំដែលពោរពេញទៅដោយអនុស្សាវរីយ៍ និងជាប្រវត្តិសាស្រ្ដ សម្រាប់សម្ដេចផ្ទាល់ និងប្រទេសកម្ពុជា ដែលមានកិត្ដិយសទទួលបានតំណែងជាប្រធានអាស៊ានប្ដូរវេន។

សម្ដេចតេជោ ហ៊ុន សែន បានថ្លែងបន្ថែមថា «ខ្ញុំមានសេចក្ដីរីករាយ ដែលកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលពាក់ព័ន្ធ ត្រូវបានបញ្ចប់ដោយជោគជ័យ និងសូមអរគុណចំពោះកិច្ចសហប្រតិបត្តិការពេញលេញ ការគាំទ្រ ភាពទន់ភ្លន់ដែលបានផ្ដល់ពីប្រទេសជាសមាជិកអាស៊ាន និងប្រទេសដៃគូ បាននាំមកនូវលទ្ធផលដ៏ច្រើនក្រៃលែង ជាទីមោទនៈ»។

សូមជម្រាបថា ប្រទេសកម្ពុជា ធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី ៤០ លើកទី ៤១ និងកិច្ចប្រជុំកំពូលពាក់ព័ន្ធ ចាប់ពីថ្ងៃទី ១០ ដល់ថ្ងៃទី ១៣ ខែវិច្ឆិកា ឆ្នាំ ២០២២។ នៅថ្ងៃនេះ គឺជាថ្ងៃចុងក្រោយនៃកិច្ចប្រជុំ ហើយអ្នកតាមដានស្ថានការណ៍នយោបាយជាតិ-អន្តរជាតិ បានកត់សម្គាល់ឃើញថា ប្រទេសកម្ពុជា បានរៀបចំយ៉ាងល្អ និងប្រកបដោយជោគជ័យ សម្រាប់កិច្ចប្រជុំនេះ៕