លោក គន់ គីម ប្រគល់ដីនិងផ្ទះ១០០ខ្នងជូនអតីតយុទ្ធជន និងគ្រួសារនៅស្រុកសាមគ្គីមានជ័យ

ឯកឧត្តមនាយឧត្តមសេនីយ៍កិតិ្តសង្គហៈបណ្ឌិត គន់ គីម ទេសរដ្ឋមន្ត្រី និងជាអគ្គលេខាធិការសមាគមអតីតយុទ្ធជនកម្ពុជា នៅព្រឹកថ្ងៃទី២៨ ខែវិច្ឆិកាឆ្នាំ២០២២ បានថ្លែងថា “អាជ្ញាធរខេត្ត ស្រុក មន្ទីរជំនាញ និងអ្នកពាក់ព័ន្ធ ត្រូវយកចិត្តទុកដាក់ចុះសួរសុខទុក្ខចំពោះអតីតយុទ្ធជនយើង ដែលបានចូលមករស់នៅលើទឹកដីថ្មីនេះឲ្យបានជាប្រចាំយ៉ាងហោចណាស់មួយខែក៏បានម្ដងដែរ ” ។ ឯកឧត្តមបានថ្លែងបែបនេះនៅក្នុងពិធីសំណេះសំណាល និងចាប់លេខរៀងយកដីនិង ផ្ទះដែលត្រូវប្រគល់ជូនអតីតយុទ្ធជន និងគ្រួសារនៅក្នុងឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តមទេសរដ្ឋមន្ត្រី បានពាំនាំនៅបណ្ដាំផ្ដាំផ្ញើសាកសួរសុខទុក្ខពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់អតីតយុទ្ធជនដែលបានចូលមករស់នៅលើដីថ្មីក្នុងពេលនេះ ។ ដោយការគិតគូរពីសម្ដេចអគ្គមហាសេនាបតីតេជោ ហ៊ុន សែន ចំពោះបងប្អូនអតីតយុទ្ឋជនកាលពីឆ្នាំទៅ សម្ដេចតេជោ បានសាងសង់ផ្ទះជូនអតីតយុទ្ធជនចំនួន៤០០ខ្នង ។ ចំណែកថ្ងៃនេះផ្ទះចំនួន១០០ខ្នង នឹងត្រូវចាប់ឆ្នោតប្រគល់នាពេលនេះក៏ជាអំ ណោយដល់ថ្លៃថ្លារបស់សម្ដេចតេជោ ហ៊ុន សែន ផងដែរ។ ថ្ងៃនេះដើម្បីឲ្យបងប្អូនអតីតយុទ្ធជនបានចូលមករស់នៅលើផ្ទះនិងដីថ្មី បានស្របតាមផ្លូវច្បាប់ ស្នើសុំឱ្យមន្ត្រីសុរិយោដី ត្រូវតែរៀបចំលិខិតបទដ្ឋានចេញប្លង់កម្មសិទ្ធិជូនពួកគាត់ឲ្យបានត្រឹមត្រូវ ។ ជាមួយគ្នានេះ អង្គភាពប្រតិបត្តិការសឹករងកំពង់ឆ្នាំង បានបញ្ជូនយោធារបស់ខ្លួនមកឈរជើងនៅទីនេះ ដើម្បីជួយការពារបងប្អូន ដែលចូលមកកាន់ទឹកដីថ្មីនេះផង។ ចំពោះបងប្អូនអតីតយុទ្ធជននិងគ្រួសារដែលចូលមករស់នៅលើទឹកដីថ្មីនេះសូមចូលរួមទាំងអស់គ្នាក្នុងការរស់នៅស្អាត អនាម័យល្អ ថែទាំសុខភាព សំអាតផ្ទះសំបែង បរិដ្ឋានជុំវិញផ្ទះ និងត្រូវខិតខំបង្កបង្កើនផលដាំដំណាំ ចិញ្ចឹមសត្វ ចិញ្ចឹមត្រី ជាដើម ដើម្បីផ្គត់ផ្គង់ជីវភាពគ្រួសារដោយស្នើសុំខាងមន្ទីរកសិកម្ម គិតគូលើបញ្ហានេះដើម្បីជួយដល់ពួកគាត់។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក៏បានរាយការណ៍ពីសកម្មភាពកាលពីឆ្នាំ២០១១ គណៈកម្មការសមាគមអតីតយុទ្ធជនខេត្តកំពង់ឆ្នាំង បានកសាងនិងប្រគល់ផ្ទះចំនួន១៦០ខ្នង ជូនអតីតយុទ្ធជននិងគ្រួសារម្ដងរួចមកហើយ។ ថ្ងៃនេះក៏បានរៀបចំប្រគល់ជូនពួកគាត់ចំនួន១០០ខ្នងផ្ទះបន្ថែមទៀត ដែលបានសាងសង់លើផ្ទៃដីលំនៅឋាន និងដីកសិកម្មទំហំ១៣៤,៥០ ហិកតា ដោយក្នុង១គ្រួសារ ទទួលដីទំហំ៧០ម៉ែត្រគុណនិង១៥០ម៉ែត្រ។ លើទីតាំងថ្មីនេះ បានដាំកូនក្ងោក ១ ៨៥០ដើម និងបានកសាងផ្លូវ ប្រវែង ២០៣០ម៉ែត្រ ផ្លូវពីរង្វង់មូលភ្ជាប់មកដីសប្បទានសង្គមកិច្ចប្រវែង២០ ៦០ម៉ែត្រ ។ សម្រាប់ជំហាន២ នឹងសាងសង់ផ្ទះថ្មប្រក់ស័ង្កសីចំនួន ៤០០ ខ្នង ដែលមានទំហំ ៦ម៉ែត្រគុណ១២ម៉ែត្រ លើដីទំហំ៣០ ម៉ែត្រគុណ៤០ម៉ែត្រ ក្នុង១គ្រួសារ ជាមួយ នឹងការកសាងភូមិថ្មី ធ្វើឱ្យក្លាយជាភូមិគំរូនេះ នឹងត្រូវ សាងសង់ផ្សារ មណ្ឌលសុខភាព សាលារៀន សា លាបុណ្យ ប៉ុស្តិ៍រដ្ឋបាល អាគាស្នាក់ការសមាគមន៍ និងបំពាក់ អំពូល ភ្លើងសឡាសម្រាប់បំភ្លឺក្នុងមូលដ្ឋានផងដែរ៕

អត្ថបទ៖ ឈៀងថារិទ្ធ