ព័ត៌មានជាតិ

សួនច្បារថ្មីមួយទៀត ត្រូវបានដាក់ឲ្យដំណើរការ ក្នុងខេត្តកំពង់ឆ្នាំង

បានផុស

៣ years មុន

នៅ

ថ្ងៃព្រហស្បតិ៍ ៧ មករា ២០២១

ដោយ

សួនច្បារថ្មីដែលប្រសិទ្ធិនាមថា “សួនច្បារសម្តេចព្រះសង្ឃរាជជួន ណាត” សាងសង់លើផ្ទៃដីជាងកន្លះហិកតា នៅមុខវិទ្យាល័យក្រុងកំពង់ឆ្នាំង ត្រូវបានអាជ្ញាធរខេត្ត ធ្វើពិធីក្រុងពលីឆ្លងដាក់ឲ្យប្រើប្រាស់ជាផ្លូវការ កាលពីថ្ងៃទី៦ ខែមករា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមអធិបតីភាព លោក ឈួរ ច័ន្ទឌឿន អភិបាលខេត្តកំពង់ឆ្នាំង និងលោកស្រី។ អភិបាលខេត្តកំពង់ឆ្នាំង បានមានប្រសាសន៍ថា ការដាក់រូបសំណាក សម្តេចព្រះសង្ឃរាជជួន ណាត នៅលើសួរច្បារថ្មីនេះមុខសាលា គឺជានិមិត្តរូប ទុកឲ្យយុវជនជំនាន់ក្រោយ បានស្គាល់បុព្វបុរស ដែលមានគុណបំណាច់ ចំពោះប្រទេសជាតិ និងជាការលើកកម្ពស់ វិស័យព្រះពុទ្ធសាសនា។ ប្រជាពលរដ្ឋ ជិតឆ្ងាយមកលំហែកម្សាន្តនៅទីតាំងសួនថ្មី របស់ខេត្តកំពង់ឆ្នាំង ឬអាចមកហាត់ប្រាណ ដែលមានបរិយាកាស បរិស្ថានល្អ និងចូលរួមថែរក្សាសួនមួយនេះ ដើម្បីប្រយោជន៍រួមទាំងអស់គ្នា។

គូសបញ្ជាក់ថា សួនច្បារថ្មីដែលធ្វើពិធីឆ្លងនេះ បានចាប់ដំណើរការសាងសង់កាលពីខែសីហា ឆ្នាំ២០១៩ ហើយសួននេះ មានទទឹង២១ម៉ែត្រ និងបណ្តោយ២៤០ម៉ែត្រ នៅលើផ្ទៃសួនទាំងមូលលម្អដោយដាំស្មៅ ផ្ការ បំពាក់ភ្លើងអំពូល និងមានបុស្បុកមួយតម្កល់រូបសំណាកសម្ដេចព្រះមហាសុមេធាធិបតី ជួន ណាត (ជោតញ្ញាណោ) ស្ថិតនៅមុខវិទ្យាល័យក្រុងកំពង់ឆ្នាំង ក្នុងភូមិសាស្ត្រសង្កាត់ខ្សាម ក្រុងកំពង់ឆ្នាំង៕

អត្ថបទ៖ សំអឿន