សម្ដេចតេជោ ៖ គណបក្សប្រជាជនកម្ពុជាកាន់អំណាច គឺសន្តិភាពកើតមាននៅទូទាំងប្រទេស និងគ្រប់ទីកន្លែងទាំងអស់

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានថ្លែងថា នៅពេលដែលគណបក្សប្រជាជនកម្ពុជា បាននិងកំពុងកាន់អំណាច គឺសន្តិភាពកំពុងកើតមាននៅទូទាំងប្រទេស និងគ្រប់ទីកន្លែងទាំងអស់។

សម្ដេចតេជោ ហ៊ុន សែន ក្នុងពិធីបើកការដ្ឋានសាងសង់ លើកកម្រិតគុណភាពផ្លូវជាតិលេខ ៤១ នាព្រឹកថ្ងៃទី ២៦ ខែធ្នូ ឆ្នាំ ២០២២នេះ បានថ្លែងអំណរគុណដល់ប្រជាពលរដ្ឋនៅខេត្តកណ្ដាល និងខេត្តកំពង់ស្ពឺនិយាយដោយឡែក និងនិយាយជារួមប្រជាពលរដ្ឋនៅទូទាំងប្រទេស ដែលបានបោះឆ្នោតជូនគណបក្សប្រជាជនកម្ពុជា សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥កន្លងទៅនេះ។

ក្នុងនោះដែរ សម្ដេចតេជោ ហ៊ុន សែន សង្ឃឹមថា ប្រជាពលរដ្ឋនៅខេត្តកំពង់ស្ពឺ និងខេត្តកណ្ដាល និយាយដោយឡែក និងប្រជាពលរដ្ឋនៅទូទាំងប្រទេសនិយាយជារួម នឹងបន្តបោះឆ្នោតឲ្យគណបក្សប្រជាជនកម្ពុជាបន្តទៀត នៅក្នុងការបោះឆ្នោតជ្រើសតាំងតំណាងរាស្រ្ដ នីតិកាលទី ៧ នាខែកក្កដា ឆ្នាំ ២០២៣ខាងមុខ។

សម្ដេចតេជោ ហ៊ុន សែន បានថ្លែងបន្តថា «ប្រជាពលរដ្ឋ បានឃើញរួចហើយ នៅពេលដែលគណបក្សប្រជាជន កាន់អំណាច សន្តិភាព កំពុងកើតមាននៅទូទាំងប្រទេស គ្រប់ទីកន្លែងទាំងអស់ ឥឡូវកន្លែងដែលធ្លាប់ច្បាំងរាំជល់ទាំងប៉ុន្មាន គឺថា ក្លាយទៅជាតំបន់ទេសចរណ៍»៕