លោកជំទាវ ម៉ែន សំអន ជំរុញមន្ត្រីគ្រប់លំដាប់ថ្នាក់ត្រូវបន្តចុះជួបប្រជាពលរដ្ឋ ដើម្បីដោះស្រាយទុក្ខលំបាករបស់ពួកគាត់

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាលកម្ពុជា ចុះមូលដ្ឋានខេត្តស្វាយរៀង​​ បានជំរុញដល់មន្ត្រីគ្រប់លំដាប់ថ្នាក់ ត្រូវបន្តចុះជាប់ជាប្រចាំជួបប្រជាពលរដ្ឋ ដោះស្រាយទុក្ខលំបាកនានា និងបានជំរុញដល់អាជ្ញាធរ ត្រូវខិតខំអភិវឌ្ឍន៍មូលដ្ឋានខេត្តស្វាយរៀង ឲ្យមានការរីកចម្រើនជាបន្តបន្ទាប់ ផងដែរ។

លោកជំទាវ ម៉ែន សំអន ជំរុញបែបនេះ ខណៈអញ្ជើញចូលរួមក្នុងពិធីសែនក្រុងពាលី​ និងអភិសេករូបសំណាកបារមីលោកតា​ លោកយាយព្រះពោធិព្រឹកថែរក្សាខេត្តស្វាយរៀង ស្ថិតនៅអាស្រមថ្មី​ សួនច្បារ​ឯកឧត្តម ហុក ឡងឌី (សួនពោធិព្រឹក្សា)​ ស្ថិតក្នុងភូមិរោងបន្លែ​ សង្កាត់ស្វាយរៀង​ ក្រុងស្វាយរៀង​ ខេត្តស្វាយរៀង​ នាព្រឹកថ្ងៃទី ៦ ខែមករា ឆ្នាំ ២០២៣នេះ។ ពិធីនេះមានការចូលរួមពី​លោក ម៉ែន វិបុល អភិបាលខេត្តស្វាយរៀង ព្រមទាំងលោក-លោកស្រីប្រធានមន្ទីរជុំវិញខេត្ត ក្រុមការងារ និងមន្ត្រីពាក់ពន្ធ័ជាច្រើនរូប ផងដែរ។

លោកជំទាវ ម៉ែន សំអន បាននាំយកនូវការផ្តាំផ្ញើដល់មន្ត្រីគ្រប់លំដាប់ថ្នាក់ ត្រូវតែបន្តចុះជាប់ជាប្រចាំជួបប្រជាពលរដ្ឋ ដោះស្រាយទុក្ខលំបាកនានា និងបានជំរុញដល់អាជ្ញាធរ ត្រូវខិតខំអភិវឌ្ឍន៍មូលដ្ឋានសំដៅលើកកម្ពស់ជីវភាពរស់នៅរបស់ប្រជាពលរដ្ឋ ឲ្យមានជីវភាពធូរធាបានមួយកម្រិតទៀត ស្របតាមគោលនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ តែម្តង។

សូមជម្រាបថា​ អាស្រមថ្មីបារមីលោកតាលោកយាយព្រះពោធិព្រឹក​ ដែលបានរៀបចំពិធីសែនក្រុងពាលីនាព្រឹកនេះ​ គឺជាទីគោរពសក្ការបូជា​សម្រាប់ថ្នាក់ដឹកនាំខេត្ត​ និងប្រជាពលរដ្ឋមកបន់ស្រន់សុំសេចក្តីសុខចម្រើន ហើយសួនច្បារឯកឧត្តម​ឧត្តមសេនីយ៍​ ហុក ឡងឌី (សួនពោធិព្រឹក្សា) ក៏ជាទីកន្លែងសម្រាប់ប្រជាពលរដ្ឋខេត្តស្វាយរៀង ហាត់ប្រាណ និងដើរលេងកម្សាន្ត ផងដែរ។

ប្រជាពលរដ្ឋខេត្តស្វាយរៀង បានលើកឡើងថា លោកជំទាវ ម៉ែន សំអន ដែលជាប្រធានក្រុមការងារគណបក្សប្រជាជនកម្ពុជា ចុះខេត្តស្វាយរៀង តែងតែចុះជាប់ជាប្រចាំជួបប្រជាពលរដ្ឋ ដោះស្រាយទុក្ខលំបាកនានា និងបានជំរុញដល់អាជ្ញាធរ ត្រូវខិតខំអភិវឌ្ឍន៍មូលដ្ឋានខេត្តស្វាយរៀង ឲ្យមានការរីកចម្រើនជាបន្តបន្ទាប់ផងដែរ។

ជាមួយគ្នានេះ ក្នុងអាណត្តិដឹកនាំរបស់​លោក ម៉ែន វិបុល ជាអភិបាលខេត្តស្វាយរៀង ប្រជាពលរដ្ឋសង្កេតឃើញថា បានកែប្រែមុខមាត់ខេត្តស្វាយរៀង លើកកម្ពស់ការអភិវឌ្ឍលើគ្រប់វិស័យ និងបានជំរុញកំណើនសេដ្ឋកិច្ច ឲ្យមានសន្ទុះខ្លាំងក្លាឡើង តាមរយៈការទាក់ទាញ អ្នកវិនិយោគមកបណ្តាក់ទុន នៅក្នុងទឹកដីខេត្តស្វាយរៀង បង្កើតការងារឲ្យប្រជាពលរដ្ឋ ធ្វើនៅមូលដ្ឋានរាប់ម៉ឺននាក់ បានលើកកម្ពស់ជីវភាពរស់នៅរបស់ប្រជាពលរដ្ឋ ឲ្យមានជីវភាពធូរធាបានមួយកម្រិត ស្របតាមគោលនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រជូនប្រជាពលរដ្ឋ ផងដែរ៕

អត្ថបទ៖ វិមាន