មេបញ្ជាការ សំរេច គឺជាឈ្មោះតួអង្គឯកប្រុសនៅក្នុងខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» ដែលជាភាពយន្តប្រវត្តិសាស្ត្រ ឆ្លុះបញ្ចាំងអំពីខ្សែជីវិតពិតរបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។ លោក ប៉ាន់ ​ខែម​ម៉ានូ​ កំពុង​ត្រូវ​បាន​ក្រសែ​ភ្នែក​មហាជនរាប់លាននាក់ផ្ដោត​ការចាប់​អារម្មណ៍យ៉ាងខ្លាំង ដោយហេតុ​ថា ​តារា​វ័យក្មេងរូប​នេះ ​ត្រូវ​បាន​ជ្រើសរើស​ឲ្យសម្ដែង​ជា​តួអង្គ​មេបញ្ជាការ សំរេច ដែលជាតួអង្គតំណាងសម្តេចតេជោ ហ៊ុន សែន។

លោក ប៉ាន់ ខែមម៉ានូ មានស្រុកកំណើតនៅសង្កាត់រកាក្នុង ក្រុងដូនកែវ ខេត្តតាកែវ ដែលមានឪពុកឈ្មោះ ប៉ាន់ សេរីវុឌ្ឍ ជាអតីតមន្ត្រីនៃមន្ទីរវប្បម៌ និងវិចិត្រសិល្បៈខេត្តតាកែវ និងម្ដាយឈ្មោះ ឡុង សុផា។ លោក ប៉ាន់ ខែមម៉ានូ ត្រូវបានគេស្គាល់ថា ជាប្អូនប្រុសបង្កើតរបស់លោក ប៉ាន់ ខែមប៊ុនថន ដែលមានតួនាទីជានាយករងខុទ្ទកាល័យសម្ដេចតេជោ នាយករដ្ឋមន្ត្រី។

កើតក្នុងគ្រួសារអ្នកសិល្បៈបុរាណ ហើយមានឧបនិស្ស័យខាងសិល្បៈផង លោក ប៉ាន់ ខែមម៉ានូ ត្រូវបានលោកឪពុកបង្ហាត់បង្រៀនលោកសម្តែងល្ខោនយីកេ និងល្ខោនបាសាក់ តាំងពីនៅកុមារភាពមកម្ល៉េះ។ ក្នុងឆ្នាំ២០០៧ លោកបានសម្តែងជាតួឯកក្នុងល្ខោនយីកេរឿងសុវណ្ណសាម នៅទូរទស្សន៍ជាតិកម្ពុជា និងក្នុងឆ្នាំ២០១០ លោកបានចូលប្រឡងចម្រៀងផ្នែកយីកេ នៅស្ថានីយទូរទស្សន៍បាយ័ន ដោយទទួលបានជ័យលាភីកិត្តិយស។

មែនទែនទៅ លោក ប៉ាន់ ខែមម៉ានូ បានវិវត្តន៍ខ្លួនមិនធម្មតានោះទេនៅក្នុងវិស័យសិល្បៈ ថ្វីត្បិតតែលោកនៅមានបទពិសោធន៍ខ្ចី ហើយវ័យនៅក្មេងក៏ដោយក្ដី។ ជាក់ស្ដែង ក្រៅពីជំនាញល្ខោនបាសាក់ និងល្ខោនយីកេ លោក ប៉ាន់ ខែមម៉ានូ ក៏មានសំឡេងយ៉ាងពិរោះស្រទន់មានមន្តស្នេហ៍ ដែលអាចបកស្រាយបទចម្រៀងសឹងតែគ្រប់ទម្រង់ ជាអាទិ៍ បទមហោរី បទប្រពៃណី ស្មូត និងចម្រៀងសម័យមរតកដើម។

តាមរយៈបទពិសោធន៍ការងារលើវិស័យសិល្បៈ និងផ្អែកលើសមត្ថភាពដែលលោកមានកន្លងទៅ ទើបធ្វើ​ឲ្យ​លោក​ ប៉ាន់ ខែមម៉ានូ ទទួល​បាន​ឱកាស​សម្ដែង​ជា​តួអង្គ​សម្ដេចតេជោ ហ៊ុន សែន នៅក្នុង​ខ្សែ​ភាពយន្ត «កូនប្រុសក្រោមពន្លឺព្រះចន្ទពេញបូណ៌មី» និងភាពយន្តចម្រៀង «ទុក្ខស្រីប្ដីព្រាត់» ខណៈលក្ខណៈសម្បត្តិ និងរូបរាងរបស់លោកស្រដៀងទៅនឹងសម្ដេចតេជោ ហ៊ុន សែន ។ សម្ដេចតេជោ នាយករដ្ឋមន្ត្រី ធ្លាប់បានសរសើរលោក ប៉ាន់ ខែមម៉ានូ ថា កាន់តែមានបុគ្គលិកលក្ខណៈសម្បត្តិដូចសម្ដេចទៅៗទាំងរបៀបធ្វើដំណើរ កាយវិការ ការនិយាយសម្ដី និងឥរិយាបទ កាលដែលសម្ដេចនៅជាយុវជន។

ក្រឡេកមកមើលកម្រិតវប្បធម៌ លោក ប៉ាន់ ខែមម៉ានូ បានបញ្ចប់ការសិក្សាសញ្ញាបត្របរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្ម នៅសាកលវិទ្យាល័យឯកទេសនៃកម្ពុជា និងសញ្ញាបត្រកម្រិតបរិញ្ញាបត្រចំនួនពីរ គឺបរិញ្ញាបត្រផ្នែកព័ត៌មានវិទ្យា នៅសាកលវិទ្យាល័យអាស៊ីអឺរ៉ុប និងបរិញ្ញាបត្រផ្នែកអក្សរសាស្ត្រខ្មែរ នៅសាកលវិទ្យាល័យអង្គរខេមរា។ សព្វថ្ងៃនេះលោក ប៉ាន់ ខែមម៉ានូ កំពុងបម្រើការងារជាមន្ត្រីការិយាល័យសិល្បៈបុរាណនៅអគ្គនាយកដ្ឋានវិទ្យុជាតិកម្ពុជា នៃក្រសួងព័ត៌មាន៕

ដោយ៖ ធឿន វ៉ាន់សុង