កម្ពុជា ទទួលបានទេសចរអន្តរជាតិប្រមាណ ២,២៨លាននាក់កើនជាង ១ពាន់ភាគរយក្នុងឆ្នាំ ២០២២

កម្ពុជា ទទួលបានទេសចរអន្តរជាតិចំនួនប្រមាណ ២,២៨លាននាក់ កើនឡើងចំនួន ១,០៥៩% នៅក្នុងឆ្នាំ២០២២។ នេះបើតាមរបាយការណ៍របស់ក្រសួងទេសចរណ៍ នៅថ្ងៃទី ១៩ ខែ មករានេះ។

តាមរបាយការណ៍ស្ថិតិទេសចរណ៍ឆ្នាំ២០២២ របស់ក្រសួងទេសចរណ៍ បានបង្ហាញថា កម្ពុជាទទួលបាន​ទេសចរអន្តរជាតិ​សរុបចំនួនប្រមាណ ២,២៨ លាននាក់ កើនឡើងចំនួន ១.០៥៩% ធៀបនឹងឆ្នាំ២០២១។

ក្នុងនោះ ទេសចរផ្ទៃក្នុងរួមមាន៖ ទេសចរជាតិប្រមាណ ១៣,៩៣ លាននាក់ កើនឡើង ១៩៩% និងទេសចរបរទេស​ប្រមាណ ១,៨៨ លាននាក់ កើនឡើង ៥៧២%។ ដោយឡែកជើងហោះហើរអន្តរជាតិចូលសរុបមានចំនួន ១០.៩៣៨ ជើង (ឆ្នាំ២០២១ មាន ២.១៣៩ ជើង) ក្នុងនោះអាកាសយានដ្ឋានអន្តរជាតិភ្នំពេញ (PHN) មានចំនួន ៨.៧៤០ជើង អាកាសយានដ្ឋានអន្តរជាតិសៀមរាប (REP)មានចំនួន ១.៧៣៨ ជើង និងអាកាសយានដ្ឋានអន្តរជាតិព្រះសីហនុ (KOS)មានចំនួន ៤៦០ ជើង។

បើតាមក្រសួងទេសចរណ៍ ភ្ញៀវទេសចរលំដាប់កំពូលទាំង ១០ប្រទេស (Top 10) រួមមាន៖ ថៃ ប្រមាណ ៨៥៣.៣៧៦នាក់, វៀតណាម ៤៦៣.៩៩៥នាក់, ទេសចរចិន ចំនួន ១០៦.៨៧៥នាក់, សហរដ្ឋអាមេរិក ៩៣.៣៨៦នាក់, ឡាវ ៩២.៦០៩នាក់, ឥណ្ឌូនេស៊ី ៧៥.៦៥៣នាក់, កូរ៉េ ៦៤.០៤០នាក់, បារាំង ៥៦.៥០៩នាក់, ម៉ាឡេស៊ី ៥៣.១២៣នាក់ និងអង់គ្លេស ៤៤.១២៣នាក់៕