ទូតឥណ្ឌូណេស៊ីចប់អាណត្តិ កត់សម្គាល់ពីការរីកចម្រើន និងការអភិវឌ្ឍជាលំដាប់របស់កម្ពុជា

ឯកអគ្គរដ្ឋទូតឥណ្ឌូណេស៊ី ដែលបានបំពេញការងារនៅក្នុងប្រទេសកម្ពុជា រយៈពេល ៤ឆ្នាំកន្លងមកនេះ បាន​កត់សម្គាល់អំពីការរីកចម្រើន និងការអភិវឌ្ឍជាលំដាប់របស់ប្រទេសកម្ពុជា ជាពិសេសសុខសន្តិភាព និងស្ថិរភាពនយោបាយ។

ការកត់សម្គាល់នេះ គ្រាដែលសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឲ្យលោក ស៊ូឌីម៉ាន់ ហាសេង ឯកអគ្គរដ្ឋទូតឥណ្ឌូណេស៊ី ដែលចប់អាណត្តិការទូតនៅកម្ពុជា ចូលជួបសម្តែងការគួរសម និងជម្រាបលា នៅវិមានសន្តិភាព កាលពីព្រឹកថ្ងៃទី ២០ ខែមករា ឆ្នាំ ២០២៣នេះ។

លោក ស្រ៊ី ថាមរ៉ុង រដ្ឋមន្ត្រីប្រតិភូអមនាយករដ្ឋមន្ត្រី មានប្រសាសន៍ប្រាប់ក្រុមអ្នកសារព័ត៌មានថា នៅក្នុងជំនួបនេះ លោកឯកអគ្គរដ្ឋទូតឥណ្ឌូនេស៊ី បាននាំយកនូវការអបអរសាទរពីសំណាក់ប្រធានា​ធិបតីឥណ្ឌូណេស៊ី ជូនសម្ដេចតេជោនាយករដ្ឋមន្ត្រី រាជរដ្ឋាភិបាល និងប្រជាជនកម្ពុជា ចំពោះជោគជ័យដ៏ត្រចះត្រចង់ ក្នុងការរៀបចំកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធផ្សេងទៀត ហើយជោគជ័យនេះបានជំរុញលើកទឹកចិត្តដល់ប្រទេសឥណ្ឌូណេស៊ី ដែលបន្តវេនជាប្រធានអាស៊ានពីប្រទេសកម្ពុជា។

លោក ស៊ូឌីម៉ាន់ ហាសេង បានថ្លែងអំណរគុណដល់រាជរដ្ឋាភិបាលកម្ពុជា ជាពិសេសសម្ដេចតេជោនាយករដ្ឋមន្ត្រី ដែលបានសម្រេចដាក់ឈ្មោះផ្លូវ ២ខ្សែនៅកម្ពុជា ជូនថ្នាក់ដឹកនាំនៃប្រទេសឥណ្ឌូណេស៊ី គឺវិថីស៊ូកាណូ និងវិថីអាលីអាឡា តាស់ ដែលបង្ហាញអំពីការយកចិត្តទុកដាក់ ក្នុងទំនាក់ទំនងមិត្ត​ភាព​ជិតស្និទ រវាងប្រទេសទាំងពីរ។

ក្នុងពេលបំពេញការងារនៅកម្ពុជា រយៈពេល ៤ឆ្នាំកន្លងមកនេះ លោក ស៊ូឌីម៉ាន់ ហាសេង ឯក​អគ្គរដ្ឋទូតឥណ្ឌូណេស៊ី បាន​កត់សម្គាល់អំពីការរីកចម្រើនជាលំដាប់របស់ប្រទេសកម្ពុជា ហើយក៏កត់សម្គាល់អំពីសុខសន្តិភាព ស្ថិរភាពនយោ បាយ និងការអភិវឌ្ឍយ៉ាងលឿនរបស់កម្ពុជា ផងដែរ។

ជាការឆ្លើយតបសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំណរគុណដល់លោកឯក​អគ្គរដ្ឋទូតឥណ្ឌូ​ណេស៊ី ដែលបាននាំយកនូវការអបអរសាទរ ពីសំណាក់ប្រធានា​ធិបតីឥណ្ឌូណេស៊ី ជូនសម្ដេច រាជរដ្ឋាភិបាល និងប្រជាជនកម្ពុជា ចំពោះជោគជ័យដ៏ត្រចះត្រចង់ ក្នុងការរៀបចំកិច្ចប្រជុំកំពូលអាស៊ាន និងក៏ថ្លែងអំណរគុណ ចំពោះការវាយតម្លៃជាវិជ្ជមាន ចំពោះការរីកចម្រើនរបស់កម្ពុជា។

សម្ដេចតេជោ ហ៊ុន សែន លើកឡើងថា ជោគជ័យនៃការរៀបចំកិច្ចប្រជុំកំពូលអាស៊ានកន្លងមកនេះ មិនអាចកាត់ផ្ដាច់ពីការជួយគាំទ្រពីភាគីឥណ្ឌូណេស៊ី និងបណ្ដាប្រទេសក្នុងតំបន់អាស៊ាននោះឡើយ។ ជាមួយគ្នានេះ សម្ដេចតេជោនាយករដ្ឋមន្ត្រី ក៏បានថ្លែងអំណរគុណដល់លោក ស៊ូឌីម៉ាន់ ហាសេង ឯកអគ្គរដ្ឋទូតឥណ្ឌូណេស៊ី និងសហការីរបស់លោក ដែលជួយសម្រួលដល់ការលើកកម្ពស់ទំនាក់ទំនងរវាងប្រទេសទាំងពីរ កម្ពុជា-ឥណ្ឌូណេស៊ី ជាពិសេសការរៀបចំសម្រួលនូវដំណើរទស្សនកិច្ច និងកិច្ចប្រជុំនានារបស់សម្ដេច នៅប្រទេសឥណ្ឌូណេស៊ី ផងដែរ៕