អាជីវករលក់ផ្កាចម្រុះសម្រាប់តាំងចូលឆ្នាំចិនត្អូញត្អែរពីការលក់មិនសូវដាច់

ភ្នំពេញ៖ អាជីវករលក់ផ្កាចម្រុះសម្រាប់ដាក់តាំងលម្អថ្ងៃបុណ្យចូលឆ្នាំប្រពៃណីចិន វៀតណាម បានត្អូញត្អែរពី ការលក់មិនសូវដាច់ អាចខាតចុងខាតដើម។ អ្នកស្រី គង់ ធីតា អ្នកលក់ផ្កានៅផ្សារច្បារអំពៅ បាននិយាយថា មកដល់ថ្ងៃសែនចូលឆ្នាំចិន ថ្ងៃដំបូងទៅហើយ ផ្កាចម្រុះលក់មិនដាច់ អាចនឹងខាតចុងខាតដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រីបន្តថា ពីរបីឆ្នាំចុងក្រោយ ដែលកម្ពុជា រងផលប៉ះពាល់ពីវិបត្តិកូវីដ មុខរបរលក់ផ្កាសម្រាប់សែនចូលឆ្នាំចិន ពិបាកក្នុងការរកចំណូល ជាក់ស្តែងដូចពេលនេះ ជាដើម គឺនៅសល់ស្ទើរទាំងអស់។ អ្នកលក់ផ្ការរូបនេះ បានបន្ថែមថា បើស្ថានភាពនៅតែបែបនេះ ជីវភាពរបស់អ្នកស្រី ដែលពឹងលើការចំណូលពីការលក់ផ្កានេះ នឹងកាន់តែលំបាក។

អាជ្ញាធរមូលដ្ឋានប្រចាំខណ្ឌច្បារអំពៅ បានឱ្យដឹងថា ចូលឆ្នាំចិន វៀតណាមឆ្នាំនេះ ប្រជាពលរដ្ឋភាគច្រើន បានធ្វើដំណើរទៅលេងស្រុកកំណើតរៀងៗខ្លួន។ អាជ្ញាធរ បានបន្តថា” យើងសង្កេតឃើញថា បងប្អូនយើងវិល ត្រឡប់ទៅលេងស្រុកកំណើតច្រើន សូម្បីចូលឆ្នាំក៏ពួកគាត់មិននៅសែនទទួលទេវតានៅភ្នំពេញដែរ មូលហេតុនេះហើយ ទើបអាជីវករលក់មិនសូវដាច់”។

ពាក់ព័ន្ធនឹងពិធីបុណ្យចូលឆ្នាំចិន វៀតណាមនេះ សម្តេចតេជោ នាយករដ្ឋមន្ត្រី បានអំពាវនាវដល់ពលរដ្ឋ ចូលរួមគោរពច្បាប់ចរាចរណ៍ និងត្រូវពន្លត់ទៀន ធូប មុនចាកចេញពីផ្ទះ ដើម្បីបង្ការការកើតមានអគ្គីភ័យជាយថាហេតុ៕ នរា