ព័ត៌មានជាតិ

ក្រសួងទេសចរណ៍គ្រោងផ្តល់បណ្ណ ប.ស.ស. សម្រាប់អ្នកបម្រើការងារក្នុងវិស័យសេវាកម្សាន្ត

បានផុស

៣ years មុន

នៅ

ថ្ងៃសៅរ៍ ៤ កុម្ភៈ ២០២៣

ដោយ

មន្ត្រីជាន់ខ្ពស់ក្រសួងទេសចរណ៍ បានឱ្យដឹងថា បច្ចុប្បន្នក្រសួងកំពុងធ្វើការងារជាមួយមន្ទីរទេសចរណ៍រាជធានីកំណត់អត្តសញ្ណាណ ចំពោះស្ត្រីបំរើការងារនៅតាមក្លឹបរង្គសាល ខារ៉ាអូខេ បៀហ្គាឌិន ជាដើម ដើម្បីឱ្យពួកគាត់ទទួលបានការប្រើប្រាស់បណ្ណ ប.ស.ស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ហ៊ុន ដានី រដ្ឋលេខាធិការក្រសួងទេសចរណ៍បានមានប្រសាសន៍ថា បន្ទាប់ពីប្រមុខដឹកនាំរាជរដ្ឋាភិបាល បានឯកភាពឲ្យមានការផ្តល់បណ្ណបេឡាជាតិសន្តិសុខសង្គម ឬហៅ បណ្ណ ប.ស.ស ជូនអ្នកបម្រើការសេដ្ឋកិច្ចក្រៅប្រព័ន្ធ ជាពិសេសការផ្តល់ជូនស្ត្រីបម្រើការងារនៅតាមក្លឹបរង្គសាល ខារ៉ាអូខេ បៀហ្គាឌិន នៅពេលនេះ មន្ត្រីជំនាញពាក់ព័ន្ធបាននិងកំពុងរួមគ្នារៀបចំគោលនយោបាយផ្តល់បណ្ណ ប.ស.ស ជូនដល់ពួកគេ។ ការផ្តល់ជូននេះ អាចជួយសម្រាលបន្ទុកការពិនិត្យព្យាបាលជំងឺដោយឥតគិតថ្លៃ។

លោកស្រីបានបន្តថា «នៅពេលនេះ ក្រសួងទេសចរណ៍បាននិងកំពុងធ្វើការងារជាមួយមន្ទីរទេសចរណ៍រាជធានី ដើម្បីកំណត់អត្តសញ្ណាណឱ្យបានត្រឹមត្រូវចំពោះអ្នកបំរើការងារសេដ្ឋកិច្ចក្រៅប្រព័ន្ធ ដើម្បីឲ្យគាត់បានការប្រើប្រាស់បណ្ណ ប.ស.ស ទទួលបានសេវាសុខាភិបាលដោយមិនមានការគិតថ្លៃ»។

លោកស្រីបានបន្ថែមថា នៅពេលនេះបណ្តាស្ថាប័នពាក់ព័ន្ធ បាននិងកំពុងពន្លឿនរៀបចំគោលនយាបាយផ្តល់បណ្ណ ប.ស.ស នេះ ទៅតាមជំនាញរៀងៗខ្លួន។

បើតាមលោក ហេង សុផាន់ណារិទ្ធ អ្នកនាំពាក្យបេឡាជាតិសន្តិសុខសង្គម បានឱ្យដឹងដែរថា នៅពេលនេះក្រុមការងារ ប.ស.ស កំពុងតែសិក្សាការពង្រីកការផ្តល់បណ្ណ ប.ស.ស ជូនស្ត្រីបម្រើការសេដ្ឋកិច្ចក្រៅប្រព័ន្ធ ក្នុងវិស័យទេសចរណ៍រួចរាល់ហើយៗ បណ្ណ ប.ស.ស នេះ អាចនឹងទទួលបានការដាក់ចេញឲ្យប្រើប្រាស់ក្នុងពេលដ៏ខ្លីខាងមុខនេះហើយ។

គួរបញ្ជាក់ថា រាជរដ្ឋាភិបាល ក៏កំពុងគិតគូរផ្តល់បណ្ណសមធម៌ ឬបណ្ណ ប.ស.ស ដល់ក្រុមអ្នកបម្រើសេវាផ្លូវភេទ ដើម្បីលើកទឹកចិត្តឱ្យពួកគេមកធ្វើតេស្តរកមេរោគអេដស៍ឱ្យបានច្រើនបន្ថែមទៀតផងដែរ៕សំអឿន