ព័ត៌មានជាតិ

តំបន់ថ្មដា ខេត្តពោធិ៍សាត់ នឹងប្រែក្លាយទៅជាទីក្រុងនាពេលអនាគត

បានផុស

៣ years មុន

នៅ

ថ្ងៃពុធ ៨ កុម្ភៈ ២០២៣

ដោយ

ពោធិ៍សាត់ ៖ តំបន់ថ្មដាខេត្តពោធិ៍សាត នឹងប្រែក្លាយទៅជាទីក្រុងនាពេលអនាគត នេះបើតាមការលើកឡើងរបស់លោកអភិបាលខេត្តពោធិ៍សាត់ នាថ្ងៃទី៧ ខែមករា ឆ្នាំ២០២៣នេះក្នុងឱកាសសម្ពោធដាក់ឱ្យប្រើប្រាស់ អគាររដ្ឋបាលសាលាឃុំថ្មដា ស្ថិតក្នុងភូមិឯកភាព ឃុំថ្មដា ស្រុកវាល ខេត្តពោធិ៍សាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីលោកអភិបាលស្រុកឡើងអានរបាយការណ៍រួចមក លោក ខូយ រីដា អភិបាលនៃគណៈអភិបាលខេត្ត ពោធិ៍សាត់បានលើកឡើងថា តំបន់នេះនិងប្រែក្លាយទៅជាទីក្រុង និងបើកច្រកព្រំដែនអន្តរជាតិ(ថ្មដាបានថាសេន) ដើម្បីដោះដូរទំនិញគ្នាទីវិញទៅមក រវាងប្រជាពលរដ្ឋខេត្តពោធិ៍សាត់ ជាមួយប្រជាពលរដ្ឋខេត្តត្រាតប្រទេសថៃ។

ដោយឃុំថ្មដាស្រុកវាលវែងដែលមានភូមិសាស្ត្រជាប់ព្រំដែនកម្ពុជាថៃ ចាប់ពីឆ្នាំ២០២៣នេះតទៅ ព្រំដែននេះនឹងក្លាយជាទីក្រុងភ្លឺចិញ្ចែងចិញ្ចាច មានសំណង់អគារខ្ពស់ៗ ផ្សារទំនើប សណ្ឋាគារ កាស៊ីណូ ភោជនីយដ្ឋាន កន្លែងកំសាន្ត និងក្លឹបហាត់ប្រាណជាដើម ដែលមានមនុស្សជាច្រើនមករស់នៅអូរអរ ដូច្នេះសូមបងប្អូនប្រជាពលរដ្ឋរៀបចំសោភ័ណភាពផ្ទះសម្បែង កន្លែងលក់ដូរ ឲ្យមានរបៀបរៀបរយ អនាម័យបរិស្ថាន និងធ្វើអ្វីត្រូវគោរពច្បាប់ទាំងអស់គ្នា។

លោកអភិបាលបានបញ្ជាក់បន្ថែមថា អគាររដ្ឋបាលសាលាឃុំថ្មដានេះ នឹងបានជាកន្លែងផ្ដល់សេវាជូនប្រជាពលរដ្ឋយ៉ាងល្អប្រសើរ ស្របតាមគោលនយោបាយរបស់ក្រសួងមហាផ្ទៃ។ ឯកឧត្តមសង្កត់ធ្ងន់ថា មេឃុំ ស្មៀន មេប៉ុស្តិ៍នគរបាលរដ្ឋបាល មេភូមិ និងប្រធានមណ្ឌលសុខភាព គឺជាអ្នកដើរតួយ៉ាងសំខាន់ ក្នុងការបម្រើសេវាជូនប្រជាពលរដ្ឋ។ ដូច្នេះត្រូវខិតខំធ្វើការងារ បំពេញតួនាទីភារកិច្ចរបស់ខ្លួនឲ្យបានល្អ ធ្វើយ៉ាងណាឲ្យប្រជាពលរដ្ឋកោតសរសើរ និងគោរពស្រលាញ់គ្រប់ៗគ្នា ហើយរដ្ឋបាលខេត្តយើងក៏មានរបស់កំដរដៃ ជូនដល់បងប្អូនប្រជាពលរដ្ឋទាំង៧០០គ្រួសារ ដោយក្នុងនោះមួយគ្រួសារបាន ក្រមា០១ មី០១កេស ដែលបានមកចូលរួម៕

ដោយ ៖ លាន គ្រន