ព័ត៌មានជាតិ

ទឹកស្ទឹងសង្កែ កំពុងប្រឈមភាពកខ្វក់ ដោយសារបែចិញ្ចឹមត្រីរាប់សិបកន្លែង

បានផុស

១ year មុន

នៅ

ថ្ងៃសៅរ៍ ១៨ កុម្ភៈ ២០២៣

ដោយ

នាយខណ្ឌរដ្ឋបាលជលផល លោក ជួង សុភា ធ្លាប់បាននិយាយថា បែចិញ្ចឹមត្រីដែលមានជាង ៣០ កន្លែង នៅក្នុងស្ទឹងសង្កែ ត្រូវប្រមូលផល និងរុះរើចេញឲ្យអស់មុនថ្ងៃចូលឆ្នាំខ្មែរ ខាងមុខ បន្ទាប់ពីរដ្ឋបាលខេត្តមានផែនការថ្មី នេះមិនខុសអីពីការវាយកម្ទេចឆ្នាំងបាយខ្លួនឯងយ៉ាងដូច្នេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រយៈពេលប៉ុន្មានខែចុងក្រោយនេះ លោក សុខ លូ អភិបាល នៃគណៈអភិបាលខេត្តបាត់ដំបង បានបញ្ជាទៅមន្ទីរជំនាញ ធ្វើការបិទទ្វារទឹកកង្ហត និងបើកទ្វារទឹកសាលាតាអន ដើម្បីធ្វើយ៉ាងណាឲ្យកម្ពស់ទឹកនៅបាតស្ទឹង ងាយស្រួលឲ្យក្រុមការងារធ្វើការសម្អាតបរិស្ថានតាមមាត់ស្ទឹង និងជួសជុលច្រាំងស្ទឹងដែលមានការខូចខាតនាពេលកន្លងមកផងដែរ។

ស្របពេលដែលទឹកស្ទឹងត្រូវបានទម្លាក់ឲ្យនៅបាតស្ទឹង និងស្របពេលបែត្រីជាង ៣០ កន្លែង មិនទាន់រុះរើ បានធ្វើឲ្យទឹកស្ទឹងមានសភាពយ៉ាប់យ៉ឺនមែនទែន ដោយសារតែអាចម៍ត្រី និងចំណីត្រីដែលគេដាក់នៅតាមបែ វាបានធ្វើឲ្យទឹកកាន់តែល្អក់ ថែមទាំងមានក្លិនមិនល្អផងដែរ។

បច្ចុប្បន្នបើគេសង្កេតមើលនៅតាមបណ្ដោយដងស្ទឹង ចាប់ពីចំណុចភូមិចិន រហូតដល់ភូមិកំពង់ពិល គែ បែទាំងអស់នេះ ស្ថិតនៅខាងលើទឹក នៃស្ថានីយបូមទឹករបស់អង្គភាពរដ្ឋាករទឹក ដើម្បីទាញយកទឹកមកផលិតទឹកស្អាតទាំងអស់ ដែលបញ្ហានេះហើយ ទើបធ្វើឲ្យមានការព្រួយបារម្ភពីមជ្ឈដ្ឋានជាច្រើនក្នុងក្រុងបាត់ដំបង។

លោក ជួង សុភា ធ្លាប់បាននិយាយថា ទីតាំងបែទាំងអស់ គ្មានច្បាប់អនុញ្ញាតនោះទេ គ្រាន់តែមានការជូនដំណឹងតែប៉ុណ្ណោះ បើដូច្នេះមែន គួរណាស់តែមានវិធានការដើម្បីបញ្ចៀសនូវភាពកខ្វក់ដល់ទឹកស្ទឹងសង្កែ ដែលប្រជាពលរដ្ឋប្រើប្រាស់រាល់ថ្ងៃ៕

អត្ថបទ ៖ សោ និយមរ័ត្ន