ព័ត៌មានជាតិ

ក្រុមខេមរភូមិន្ទនៅសល់ពីរភូមិទៀត នឹងសម្រេច ១០០% លើការចុះបញ្ជីដីធ្លីជូនប្រជាពលរដ្ឋ

បានផុស

១ year មុន

នៅ

ថ្ងៃអង្គារ ២៨ កុម្ភៈ ២០២៣

ដោយ

Dy Bunnara

ការចុះបញ្ជីធីធ្លីក្នុងក្រុមខេមរភូមិន្ទខេត្តកោះកុង ស្ទើរតែបញ្ចប់ ១០០% ខណៈនៅសល់ភូមិពីរទៀតនឹងបញ្ចប់ទាំងស្រុង។

លោក រស់ វីរ៉ាវុធ ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តកោះកុង បានឲ្យកម្ពុជាថ្មីដឹងតាមទូរសព្ទនៅព្រឹកនេះថា ក្នុងក្រុងខេមរភូមិន្ទនៅសល់ភូមិចំនួនពីរទៀតគឺភូមិស្មាច់មានជ័យ និងភូមិបឹងឃុនឆាង ដែលមិនទាន់បញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ដំណើរការចុះបញ្ជីដីធ្លីកន្លងទៅបានជួបបញ្ហាប្រឈមមួយចំនួន ដោយសារពលរដ្ឋខ្លះមានទីលំនៅដ្ឋាននៅឆ្ងាយ ពិបាកក្នុងការទំនាក់ទំនងសម្រាប់ការផ្តល់ព័ត៌មានដល់មន្រ្តីធ្វើការចុះវាស់វែង។ យ៉ាងណាមិញ ក្រុមការងារនឹងពន្លឿនដើម្បីឲ្យចប់សព្វគ្រប់នៅពេលឆាប់ៗខាងមុខនេះ។

ទាក់ទងការចុះបញ្ជីដីធ្លីនៅទូទាំងខេត្ត លោក រស់ វីរ៉ាវុធ បានឲ្យដឹងថា អាជ្ញាធរខេត្តកំពុងជំរុញការចុះបញ្ជីដីធ្លីជូនប្រជាពលរដ្ឋឲ្យបញ្ចប់ទាំងស្រុងនៅឆ្នាំ២០២៥ ស្របតាមគោលនយោបាយរបស់រាជរដ្ឋាភិបាល។

ជាមួយគ្នានេះ លោកក៏បានក្រើនរំលឹកដល់ពលរដ្ឋដែលទិញដីនៅតំបន់ណាមួយក្នុងខេត្ត ត្រូវពិនិត្យឲ្យបានច្បាស់លាស់និងសាកសួរមន្រ្តីជំនាញ ដើម្បីទទួលបានព័ត៌មានគ្រប់ជ្រុងជ្រោយ ចៀសវាងទិញប៉ះដីរបស់រដ្ឋនាំឲ្យកើតបញ្ហាខាតបង់លុយកាក់។

យោងតាមរបាយការណ៍របស់ឧបនាយករដ្ឋមន្ដ្រី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គិតតាំងពីចាប់ផ្តើមអនុវត្តរហូតដល់ខែ វិច្ឆិកា ឆ្នាំ២០២២ អាជ្ញាធរបានចេញបណ្ណកម្មសិទ្ធិដីធ្លីដល់ពលរដ្ឋទូទាំងប្រទេសបានចំនួន ៦ ៧៣០ ៧៥២ បណ្ណ ស្មើនឹង ៩៦,២ ភាគរយ នៃចំនួនក្បាលដីប៉ាន់ស្មានដំបូង ៧ លានក្បាលដី។

ក្នុងពេលបិទសន្និបាតរបស់ក្រសួងរៀបចំដែនដីកាលពីចុងខែធ្នូ ឆ្នាំ២០២២ ប្រមុខរដ្ឋាភិបាលសម្តេចតេជោ ហ៊ុន សែន បានណែនាំដល់ក្រសួងរៀបចំដែនដី នគរូបនីយកម្ម និងសំណង់ ត្រូវពន្លឿនការចុះបញ្ជីក្បាលដីជូនប្រជាពលរដ្ឋនៅទូទាំងប្រទេសឱ្យបានសម្រេច ១០០ ភាគរយ ដោយមិនត្រូវពន្យារពេលទៀតទេ៕