អង្គការទស្សនៈពិភពលោកអន្តរជាតិប្រចាំនៅកម្ពុជា បានដាក់ចេញនូវយុទ្ធសាស្រ្តរយៈពេល៥ឆ្នាំ (២០២៣-២០២៧) ដោយផ្តោតលើការផ្តល់ផលវិជ្ជមាន ក៏ដូចជាការគាំទ្រសុខុមាលភាពដល់កុមារប្រមាណ ៥លាននាក់ ជាពិសេសកុមារងាយរងគ្រោះបំផុតនៅកម្ពុជា។

បើតាមលោក ជេនេសម៉ានូអែល ហ្គីនទីញ នាយកប្រចាំប្រទេសអង្គការទស្សនៈពិភពលោក យុទ្ធសាស្ត្ររយៈពេល៥ឆ្នាំនេះ ត្រូវបានរៀបចំឡើងដោយផ្អែកលើកម្រងកិច្ចពិគ្រោះយោបល់ជាមួយអ្នកពាក់ព័ន្ធ និងស្ថាប័នតំណាងរាជរដ្ឋាភិបាលទាំងនៅថ្នាក់ជាតិ ថ្នាក់ក្រោមជាតិ រួមទាំងដៃគូអភិវឌ្ឍន៍។ លោកនាយកប្រចាំប្រទេស បានលើកឡើងថា យុទ្ធសាស្រ្តរបស់អង្គការទស្សនៈពិភពលោកអន្តរជាតិប្រចាំនៅកម្ពុជា គឺបានដើរស្របជាមួយនឹងយុទ្ធសាស្រ្តចតុកោណ និងគោលនយោបាយតាមវិស័យរបស់រាជរដ្ឋាភិបាលកម្ពុជា ក្នុងគោលដៅអភិវឌ្ឍន៍ប្រកបដោយចីរភាព។

គោលបំណងនៃយុទ្ធសាស្ត្រនេះ ត្រូវបានលោក ជេនេសម៉ានូអែល បញ្ជាក់ថា គឺដើម្បីសម្រេចបានសុខុមាលភាពប្រកបដោយចីរភាពសម្រាប់កុមារកម្ពុជាចំនួនប្រមាណ៥លាននាក់ ជាពិសេសកុមារងាយរងគ្រោះបំផុត។ លោកបានបន្ថែមថា យុទ្ធសាស្រ្តនេះ មានគោលដៅផ្តល់ផលវិជ្ជមានដោយផ្ទាល់ និងប្រយោលដល់កុមារចំនួន៨៥% នៃចំនួនកុមារកម្ពុជា។

ដើម្បីឈានទៅសម្រេចឲ្យបានយុទ្ធសាស្ត្រនេះ លោក ជេនេសម៉ានូអែល បានបញ្ជាក់ថា អង្គការទស្សនៈពិភពលោក ក៏មានផែនការពង្រីកវិសាលភាពភូមិសាស្រ្តកម្មវិធីបន្ថែមទៀត គឺចាប់ពីចំនួន១៤ខេត្តក្នុងយុទ្ធសាស្រ្តឆ្នាំ២០១៨~២០២២ រហូតដល់ចំនួន២៣ខេត្តក្នុងឆ្នាំ២០២៣-២០២៧។ លោកបានរំពឹងថា អង្គការទស្សនៈពិភពលោក អាចបន្ថែមគុណតម្លៃសម្រាប់កម្មវិធីអភិវឌ្ឍន៍ដែលមានស្រាប់ ដែលតួយ៉ាង កម្មវិធីមនុស្សធម៌ និងកម្មវិធីកៀរគរស្វែងរកមតិគាំទ្ររបស់រដ្ឋបាលនៅថ្នាក់មូលដ្ឋាន និងដៃគូនានា។

អង្គការទស្សនៈពិភពលោក បានធ្វើការងារជិតស្និទ្ធយ៉ាងជិតស្និទ្ធិជាមួយក្រសួងស្ថាប័នពាក់ព័ន្ធ ដៃគូអភិវឌ្ឍន៍ និងក្រុម សហគមន៍នៅកម្ពុជា។ អង្គការទស្សនៈពិភពលោក បានសហការជាមួយសហគមន៍ក្នុងការធ្វើឲ្យប្រសើរឡើងជីវិតរបស់កុមារកម្ពុជា ជាពិសេសកុមារងាយរងគ្រោះបំផុត តាមរយៈកម្មវិធីសំខាន់ៗចំនួន៣ គឺ កម្មវិធីអាហារូបត្ថម្ភ កម្មវិធីនៃការអប់រំ និងកម្មវិធីនៃការការពារ និងការចូលរួមរបស់កុមារ៕

ដោយ៖ ធឿន វ៉ាន់សុង