ស្វីសផ្ដល់ជំនួយថែទាំសុខភាពផ្លូវចិត្តដល់ជនភៀសសឹកកម្ពុជា ដោយសារជម្លោះព្រំដែន

ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ក្នុងភាពជាដៃគូជាមួយអង្គការទស្សនៈពិភពលោកអន្តរជាតិប្រចាំនៅកម្ពុជា បានផ្តល់ការគាំទ្រផ្នែកផ្លូវចិត្តសង្គម និងជំនួយជាសាច់ប្រាក់ដល់ជនភៀសសឹកកម្ពុជារាប់ពាន់នាក់។ ជំនួយរបស់ទីភ្នាក់ងារស្វីស ជាជំនួយមនុស្សធម៌ ដើម្បីឆ្លើយតបទៅនឹងផលប៉ះពាល់នៃជម្លោះព្រំដែនកម្ពុជា-ថៃ ជាពិសេសចំពោះជនងាយរងគ្រោះដែលកំពុងប៉ះទង្គិចផ្លូវចិត្តធ្ងន់ធ្ងរពីជម្លោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឆ្លើយតប គឺត្រូវបានអនុវត្តនៅទូទាំងជំរុំសុវត្ថិភាពជាច្រើន ក្នុងខេត្តព្រះវិហារ សៀមរាប និងឧត្តរមានជ័យ ដោយផ្តោតយ៉ាងខ្លាំងលើការការពារក្រុមងាយរងគ្រោះ រួមមានកុមារ ស្ត្រី ជនមានពិការភាព និងមនុស្សចាស់។ តាមការឱ្យដឹងដោយអង្គការទស្សនៈពិភពលោក សេវាផ្លូវចិត្តសង្គម ត្រូវបានផ្តល់ជូន ដោយសហការជាមួយដៃគូឯកទេស រួមទាំងអង្គការចិត្តសង្គមអន្តរវប្បធម៌ (TPO) និងអាជ្ញាធរមូលដ្ឋាន ដោយធានាបាននូវការថែទាំដែលសមស្របតាមបរិបទ និងយកចិត្តទុកដាក់លើការប៉ះពាល់ផ្លូវចិត្ត។

តាមរយៈកិច្ចអន្តរាគមន៍មនុស្សធម៌នេះ អង្គការទស្សនៈពិភពលោក បានបញ្ជាក់ឱ្យដឹងថា ជនភៀសសឹកចំនួនជាង១៤ ៤៧០នាក់ នៅខេត្តព្រះវិហារ និងខេត្តឧត្តរមានជ័យ បានទទួលសេវាគាំទ្រផ្លូវចិត្តសង្គមចាំបាច់។ ការឆ្លើយតបបានផ្តល់អាទិភាពដល់ជនងាយរងគ្រោះបំផុត រួមមាន ស្ត្រីចំនួនជាង២ ២០០នាក់ និងកុមារចំនួនជាង១១ ៤០០នាក់ ដែលពួកគាត់ភាគច្រើនរងការប៉ះពាល់ផ្លូវចិត្ត ដែលបណ្តាលមកពីអំពើហិង្សា ការផ្លាស់ទី និងភាពមិនច្បាស់លាស់យូររយៈពេលវែង។

លើសពីនេះ ជនភៀសសឹកចំនួនជាង១ ៣០០នាក់បានទទួលជំនួយសាច់ប្រាក់ ដែលអាចឱ្យគ្រួសាររបស់ពួកគេបំពេញតម្រូវការចាំបាច់ ដូចជាអាហារ ថ្នាំពេទ្យ និងសម្ភារៈជម្រកជាមូលដ្ឋាន ស្របតាមអាទិភាពរបស់ពួកគេ។ អង្គការទស្សនៈពិភពលោក ចាត់ទុកការគាំទ្រផ្នែកថែទាំផ្លូវចិត្តសង្គម និងជំនួយសាច់ប្រាក់ពេលនេះថា បាននាំមកនូវភាពធូរស្បើយផ្នែកសុខុមាលភាពដល់គ្រួសារភៀសសឹក ដែលរងផលប៉ះពាល់ដោយសារជម្លោះព្រំដែន។

លោក Reto Grueninger ជាប្រធានទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ និងជាទីភ្នាក់ងារកុងស៊ុលប្រចាំនៅកម្ពុជា បានលើកឡើងថា រដ្ឋាភិបាល និងប្រជាជនស្វីស ឈរក្នុងសាមគ្គីភាពជាមួយស្ត្រី បុរស និងកុមារងាយរងគ្រោះរាប់ពាន់នាក់ ដែលត្រូវបានភៀសខ្លួនពីផ្ទះរបស់ពួកគេ ដោយស្វីសចូលរួមកិច្ចខិតខំប្រឹងប្រែងរួមគ្នា ដើម្បីឆ្លើយតបទៅនឹងវិបត្តិដែលអូសបន្លាយនេះ។

លោក បានបន្តដូច្នេះថា «តាមរយៈភាពជាដៃគូរបស់យើងជាមួយអង្គការទស្សនៈពិភពលោកអន្តរជាតិប្រចាំនៅកម្ពុជា យើងអាចផ្តល់ជំនួយទាន់ពេលវេលា ដែលផ្តោតលើប្រជាជន ដែលដោះស្រាយតម្រូវការបន្ទាន់ និងគាំទ្រសុខុមាលភាពផ្លូវចិត្តសង្គម។ វិធីសាស្រ្តនេះធានាថាស្ត្រី និងកុមារទទួលបានការការពារ ការថែទាំ និងជំនួយដែលពួកគេត្រូវការ ដើម្បីឆ្លងកាត់ស្ថានភាពលំបាកនេះ»៕