អភិបាល​ខេត្តកំពត​ចុះពិនិត្យ​ផ្សាររាត្រីរៀបចំសោភ័ណភាព និងអនុញ្ញាតឱ្យអាជីវករតសំយ៉ាប

លោក ម៉ៅ ធនិន អភិបាល នៃគណៈអភិបាលខេត្តកំពតនៅរសៀលថ្ងៃទី ៦ ខែមីនា ឆ្នាំ ២០២៣ បានអញ្ជើញចុះត្រួតពិនិត្យស្ថានភាពនៅជុំវិញផ្សាររាត្រីកំពតនៅជាប់រង្វង់មូលទុរេនកំពតទៅតាមការឆ្លើយតបសំណូមពរស្នើសុំរបស់អ្នកគ្រប់គ្រងផ្សាររួមទាំងអាជីវករលក់ដូរនៅក្នុងផ្សាររាត្រីកំពតបានសំណូមពរដល់លោកអភិបាលខេត្តឆ្លើយតបអនុញ្ញាតឱ្យក្នុងការតសំយ៉ាបទៅតាមតូបលក់ដូរនីមួយៗនៅជុំវិញផ្សាររាត្រីកំពតនេះ។

អភិបាលខេត្តកំពតបានអនុញ្ញាតទៅតាមការឆ្លើយតប និងសំណូមពររបស់អ្នកគ្រប់គ្រងផ្សាររួមទាំងអាជីវករ លក់ដូរ នៅក្នុងផ្សាររាត្រីកំពត។

ក្រោយពីបានធ្វើការពិនិត្យរួចរាល់មក លោក ម៉ៅ ធនិន បានអនុញ្ញាតឱ្យអ្នកគ្រប់គ្រង ផ្សារ ក៏ដូចជា អាជីវករ ទាំងអស់ អាចធ្វើការតសំយ៉ាបចេញពីតូបដែលនៅជុំវិញផ្សារទាំងអស់បានតែធ្វើយ៉ាងណាកុំឱ្យមានការតចេញហួស មកលើចិញ្ចើមផ្លូវពីការកំណត់របស់អាជ្ញាធរ ម្យ៉ាងទៀតអ្នកគ្រប់គ្រងផ្សារត្រូវ ត្រួតពិនិត្យមើលធ្វើយ៉ាងណាឱ្យការតសំយ៉ាបលយចេញ ជជុំវិញផ្សាររាត្រីកំពតនេះក៍ត្រូវមានស្តង់ដារតែមួយព្រមទាំងឱ្យមានភាពទាក់ទាញសម្រាប់ភ្ញៀវទេសចរ ជាតិនិងអន្តរជាតិដែលមកកម្សាន្តនៅក្នុងខេត្តកំពត។

អភិបាលខេត្តកំពតបានបន្ថែមឱ្យដឹងទៀតថា បើសិនផ្សាររាត្រីកំពតនេះមានភាពទាក់ទាញស្អាតនៅពេលយប់ដែលភ្ញៀវទេសចរណ៍ជាតិនិងអន្តរជាតិមកលេងកម្សាន្តនៅក្នុងខេត្តកំពតពួកគាត់មិនអាចរំលងផ្សាររាត្រីកំពតនេះពីព្រោះនៅជិតរង្វង់មូលទុរេនទីរួមខេត្តកំពតកាលណាភ្ញៀវទេសចរបានឆ្លងកាត់កាន់តែច្រើននិងធ្វើឱ្យអាជីវករលក់ដូរបានដាច់ច្រើន។

ដោយឡែកចុងក្រោយនេះ លោក ម៉ៅ ធនិន អភិបាលខេត្ត កំពតក៏បានបញ្ចាក់ថា ទីតាំងផ្សាររាត្រីកំពតនេះ គឺជា បេះដូង នៃខេត្តកំពតព្រោះនៅជិតរង្វង់មូលទុរេន ដែលជានិមិត្តរូបរបស់ខេត្តកំពតដូច្នេះហើយសូមឱ្យអ្នកគ្រប់គ្រងក៏ដូចជា អាជីវករ លក់ដូរទាំងអស់ត្រូវរួមសហការគ្នាធ្វើយ៉ាងណាឱ្យទីតាំងនេះមានភាពទាក់ទាញទាំងសោភ័ណភាព បរិស្ថាន និងអនាម័យឱ្យបានល្អប្រសើរទៅថ្ងៃមុខ៕

អត្ថបទ៖ សឹង រ៉ាត់