សម្ដេចតេជោ ហ៊ុន សែន ៖ អង់គ្លេស អាចនឹងបើកសាកលវិទ្យាល័យនៅកម្ពុជា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា អង់គ្លេស អាចនឹងបើកសាកលវិទ្យាល័យនៅកម្ពុជា ដែលនេះជាការឱកាសល្អមួយសម្រាប់សិស្ស-និស្សិត ដែលចង់រៀនសាលាបរទេស ដោយមិនចាំបាច់ចេញទៅក្រៅប្រទេសនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឲ្យដឹងខាងលើនេះ គ្រាដែលសម្ដេចតេជោ ហ៊ុន សែន អញ្ជើញជាអធិបតីក្នុងពិធីប្រគល់សញ្ញាបត្រជូនដល់និស្សិត នៃវិទ្យាស្ថានវ៉ាន់ដាជាង ៤ពាន់នាក់ នាព្រឹកថ្ងៃទី ២២ ខែមីនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ខាងមុខនេះ អាចនឹងមានសាកលវិទ្យាល័យពីបរទេស មកបើកទៀតផង អគ្គរដ្ឋទូតអង់គ្លេស គណៈប្រតិភូអង់គ្លេស តែងនិយាយជាមួយខ្ញុំ ខាងមុខនេះអង់គ្លេស អាចនឹងកសាងសាកលវិទ្យាល័យនៅកម្ពុជា ដែលនោះក៏ជាឱកាស ដែលអ្នកពុំមានលទ្ធភាពបញ្ជូននិស្សិតទៅរៀន នៅប្រទេសក្រៅ ហើយដែលឲ្យកូនរៀនភាសាអង់គ្លេសតាំងតូចនោះ គឺមានឱកាសចូលមហាវិទ្យាល័យ សាកលវិទ្យាល័យក្នុងប្រទេសយើងតែម្ដង»។

សម្ដេចតេជោ ហ៊ុន សែន បានថ្លែងទៀតថា មានបណ្ដាប្រទេសមួយចំនួន ក៏មានបំណងបើកសាកលវិទ្យាល័យនៅកម្ពុជា ហើយការដែលនិស្សិតកម្ពុជារៀននៅក្នុងស្រុក មានការចំណាយតិចជាងការចេញទៅសិក្សានៅក្រៅស្រុក៕