អាជ្ញាធរខេត្តស្វាយរៀង រៀបចំប្រព័ន្ធបាញ់ទឹករួចរាល់​ក្នុងតំបន់ត្រជាក់ចិត្តត្រៀម​សង្រ្កាន្តចូលឆ្នាំ

(ខេត្តស្វាយរៀង): សង្ក្រាន្តស្វាយរៀង ដែលនឹងប្រារព្ធធ្វើឡើងនៅអំឡុងចូលឆ្នាំខ្មែរ នាពេលឆាប់ៗខាងមុខនេះ នឹងកាន់តែសប្បាយ និងប្លែកខ្លាំងជាងឆ្នាំមុនៗទៀត ពោលគឺអាជ្ញាធរ បានរៀបចំដោយបំពាក់ប្រព័ន្ធបាញ់ទឹក នៅតំបន់ត្រជាក់ចិត្ត ដើម្បីត្រៀមស្វាគមន៍ប្រជាពលរដ្ឋមកលេងកម្សាន្តនៅទីនេះ។ នេះបើតាមការឲ្យដឹងពីលោក អ៊ឹម មេសា ប្រធានអង្គភាពរដ្ឋាករទឹកស្អាតស្វាយរៀង នៅថ្ងៃទី២៦ ខែមីនា ឆ្នាំ២០២៣ ខណ:ដែលលោក និងក្រុមការងារ​កំពុងតែមមាញឹកក្នុងការរៀបចំតប្រព័ន្ធបាញ់ទឹក នៅតំបន់ត្រជាក់ចិត្តសង្ក្រាន្តស្វាយរៀង​នៅខាងមុខសាលា​ខេត្តស្វាយរៀង។

លោកបានឲ្យដឹងទៀតថា «យើងបានធ្វើតេស្តបាញ់ទឹកពីលើរួចហើយ គឺបាចសាចជះពេញផ្លូវតែម្តង ខុសពីបណ្តាឆ្នាំមុនៗដែលរៀបចំទុយោទឹកកាត់ទទឹងថ្នល់ នៅតំបន់ត្រជាក់ចិត្ត សង្ក្រាន្តស្វាយរៀង» ។

សូមបញ្ជាក់ថា ក្រុមការងាររៀបចំសង្ក្រាន្តស្វាយរៀង បានរៀបចំដាក់ពាងរួចជាស្រេចមកហើយ នៅតំបន់ត្រជាក់​ចិត្តនេះ។ សង្ក្រាន្តស្វាយរៀង បានអាកខានលេងកម្សាន្តអស់រយ:ពេល៣ឆ្នាំកន្លងមកហើយ ដោយសារបញ្ហាជំងឺកូវីដ ១៩។ ហើយកាលពីពេលកន្លងទៅ គឺអាជ្ញាធរបានរៀបចំរថយន្តពន្លត់អគ្គិភ័យ ដើម្បីបាញ់ស្រោចទៅអ្នកចូល​រួមឱ្យត្រជាក់កាយចិត្តព្រមទាំងមានការប្រគុំតន្ត្រីសម័យ និងមានលេងល្បែងប្រជាប្រិយ​នៅតាមទីវត្តអារាមថែម​ទៀតផង៕

ដោយ:ភក្ដី