នាវាស្វ័យ​ការពារ​ជើងទឹកជប៉ុនមួយគ្រឿង ចូលចតនៅកំពង់ផែក្រុងព្រះសីហនុ រយៈពេល ៣ថ្ងៃ

នាវាស្វ័យ​ការពារ​ជើងទឹកជប៉ុនមួយគ្រឿង បានចូលចតដោយសុវត្ថិភាព នៅកំពង់ផែស្វយ័តក្រុងព្រះសីហនុ នាវេលាម៉ោង ៩ និង ៥០នាទីព្រឹកថ្ងៃអង្គារនេះ។ ការចូលចតនេះ គឺដើម្បីរឹតចំណងមិត្តភាព ​និង​ទស្សនកិច្ច​ផ្លូវការ​ នៅ​ព្រះរាជាណាចក្រ​កម្ពុជា​ រយៈពេល ៣ថ្ងៃ ចាប់ពីថ្ងៃទី ២៨ ដល់ថ្ងៃទី ៣០ ខែមីនា ឆ្នាំ ២០២៣។

ក្នុងពិធីបដិសណ្ឋាកិច្ចទទួលមេបញ្ជាការ និងក្រុមនាវិកនៅលើនាវា នៅកំពង់ផែស្វយ័តក្រុងព្រះសីហនុ មានមន្ត្រីស្ថានទូតជប៉ុនប្រចាំនៅព្រះរាជាណាចក្រកម្ពុជា បានដឹកនាំក្រុមប្រតិភូ រួមនិងមន្ត្រីកងទ័ពជើងទឹកមូលដ្ឋានសមុទ្ររាមជាច្រើននាក់ បានទៅទទួលស្វាគមន៍ នៃការអញ្ជើញមកដល់ផងដែរ។

មន្ត្រីកងទ័ពជើងទឹកមូលដ្ឋានសមុទ្ររាម បានឲ្យដឹងថា​ នាវា​ស្វ័យការពារជើងទឹកជប៉ុននេះ មានឈ្មោះ KIRISAME-(DD-104) ផ្ទុកមនុសុសចំនួន ១៧០នាក់ ​ហើយមានបណ្ដោយ ១៥១ម៉ែត្រ និងទទឹង ១៧.៤​ម៉ែត្រ។ ក្នុងនោះ ជម្រៅ​ទឹក ៩ម៉ែត្រ និងទំងន់​ផ្ទុក ៤៥៥០តោន។ រីឯ Speed ៣០knots=៥៦km/h និងមាន​ Helicopter មួយគ្រឿង ដឹកនាំដោយមេបញ្ជាការនាវា លោកវរនាវីឯក​ MAKI TAKAYUKI៕