នាយឧត្តមសេនីយ៍ ប៉ែន វិបុល ជំរុញអាជ្ញាធរពង្រឹងអនុវត្តភូមិឃុំមានសុវត្ថិភាព បម្រើពលរដ្ឋក្នុងមូលដ្ឋាន

(ខេត្តស្វាយរៀង): នាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិ និងជាតំណាងលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ នៅរសៀលថ្ងៃទី២៩ ខែមីនា ឆ្នាំ២០២៣ បានថ្លែងអំណរគុណយ៉ាង​ធំធេងដល់កងកម្លាំងនគរបាលជាតិ និងអាជ្ញាធរដែនដីគ្រប់លំដាប់ថ្នាក់ក្នុងការចូលរួមអនុវត្តវិធានការនានា របស់រាជរដ្ឋាភិបាល ធានាថែរក្សាការពារបានយ៉ាងរឹងមាំនូវសន្តិសុខសណ្ដាប់ធ្នាប់សាធារណៈ សុវត្ថិភាពសង្គម និងការផ្ដល់សេវាសាធារណៈជូនប្រជាពលរដ្ឋ ។

លោកនាយឧត្តមសេនីយ៍បានមានប្រសាសន៍ថា ក្នុងឱកាសដែលលោកនិងលោក ប៉េង ពោធិ៍សា អភិបាលរងខេត្ត តំណាងលោក ម៉ែន វិបុល អភិបាល នៃគណៈអភិបាលខេត្តស្វាយរៀងបានអញ្ជើញជាអធិបតីនៅក្នុងពិធី ប្រកាសផ្ទេរ​ភារកិច្ច តែងតាំងមុខតំណែង និងបំពាក់ឋានន្តរស័ក្តិ ជូនដល់មន្ត្រីនគរបាលជាតិ នៃស្នងការដ្ឋាននគរបាល​ខេត្តស្វាយ​រៀង ដែលបានប្រព្រឹត្តទៅនៅស្នងការដ្ឋាននគរបាលខេត្តស្វាយរៀង ។

លោកនាយឧត្តមសេនីយ៍ ប៉ែន វិបុល បានណែនាំដល់កងកម្លាំង អាជ្ញាធរឱ្យខិតខំជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាព ដើម្បីលើកកម្ពស់ការចូលរួមរបស់ប្រជាពលរដ្ឋក្នុងការបង្ការ ទប់ស្កាត់ និងបង្ក្រាបបទល្មើស​នានានៅមូលដ្ឋានជាពិសេសសកម្មភាពជួញដូរចែកចាយប្រើប្រាស់ គ្រឿងញៀនខុសច្បាប់ បទល្មើសលួច ឆក់ ប្លន់ ល្បែងស៊ីសងខុសច្បាប់នៅតាម មូលដ្ឋាន អំពើហិង្សាក្នុងគ្រួសារ ក្រុមក្មេងទំនើង និងបទល្មើសនានានៅមូលដ្ឋាន ទូទាំងខេត្តឱ្យមានប្រសិទ្ធភាពខ្ពស់នៅតាមមូលដ្ឋានរបស់ខ្លួន។

សូមបញ្ជាក់ផងដែរថា កម្មវិធីផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិនាពេលនេះមានចំនួន ១២៣នាក់ ក្នុងនោះ បំពាក់ឋានន្តរសក្តិ ចំនួន ៨០នាក់ និងតែងតាំងមុខតំណែង ចំនួន ៤៣នាក់៕

ដោយ៖ ភក្ដី