អាជ្ញាធរកំពុងកាត់លះមែកឈើលម្អសោភ័ណភាពរាជធានី​ត្រៀម​បុណ្យចូលឆ្នាំ និងកីឡាស៊ីហ្គេម

រដ្ឋបាលរាជធានីភ្នំពេញបានយកចិត្តទុកដាក់យ៉ាងខ្លាំងក្នុងការកែលម្អសោភណ័ភាពរាជធានីភ្នំពេញ​ ដើម្បីទទួលការប្រកួត​កីឡាស៊ីហ្គេមលើកទី ៣២ និងប៉ារ៉ា​ហ្គេម​លើក​ទី ១២ ដែលកម្ពុជាធ្វើជាម្ចាស់ផ្ទះ និងត្រៀមទទួលបុណ្យចូលឆ្នាំប្រពៃណីជាតិខ្មែរ​នាពេលដ៏ខ្លីខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក ស៊ូ សាវ៉ន ប្រធានការិយាល័យសួនច្បារ និងរុក្ខជាតិនៃមន្ទីរសាធារណការ​ និងដឹកជញ្ជូនរាជធានីភ្នំពេញ​បានឱ្យដឹងថា៖ តាមផែនការដែលបានគ្រោងទុក រដ្ឋបាលរាជធានីភ្នំពេញ តាមការណែនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញបានឲ្យមន្ទីរសាធារណការរាជធានីភ្នំពេញធ្វើការលះមែកឈើនៅតាមមហាវិថីធំៗមួយចំនួន ពិសេស នៅលើមហាវិថីដែលពាក់ព័ន្ធនិងការរៀបចំការប្រកួតកីឡាស៊ីហ្គេមលើកទី៣២ និងប៉ារ៉ាហ្គេមលើកទី១២ ដើម្បីចូលចូលរួមក្នុងពិធីចូលឆ្នាំថ្មីប្រពៃណីខ្មែនិងដើម្បីបង្ការ ទប់ស្កាត់ ការបាក់រលំដើមឈើនៅរដូវវស្សានាពេលខាងមុខនេះផងដែរ។

លោកបន្តថា ចំពោះកិច្ចការងារនេះ នៅលើបណ្ដោយមហាវិថីឈ្នះឈ្នះ ចាប់ពីផ្លូវជាតិលេខ ៦ A ដល់ស្ពានព្រែកព្នៅ យើងអនុវត្តកិច្ចការងារនេះបានសម្រេច ១០០ ភាគរយហើយ។ ក្រុមការងាររបស់លោកបន្តការកាត់លះមែកឈើ នៅតាមបណ្ដោយផ្លូវកម្ពុជាក្រោមចាប់ពីផ្សារធំថ្មីទៅដល់សាលាសន្ធម៉ុក បន្តការកាត់លះ នៅតាមបណ្ដោយផ្លូវសហព័ន្ធរុស្ស៊ី ផ្លូវព្រះមុនីវង្ស ផ្លូវព្រះនរោត្តម ផ្លូវស៊ីសុវត្ថិដែលជាផ្លូវសំខាន់ៗ ដែលប្រតិភូត្រូវឆ្លងកាត់។

ក្នុងនោះមហាវិថីព្រះសីហនុ ជុំវិញស្តាតអូឡាំពិក ក៏ជាផ្លូវដែលយើងយកចិត្តទុកដាក់ ក្នុងការកាត់លះមែកឈើទាំងនេះផងដែរ។ បន្ថែមពីនេះកំណាត់ផ្លូវម៉ៅសេទុង ផ្លូវលេខ ៥១,៦១ និងកំណត់ផ្លូវផ្សេងៗទៀត នៅក្នុងរាជធានីភ្នំពេញក៏ជាផ្លូវ ដែល អាជ្ញាធរាជធានីភ្នំពេញមយកចិត្តទុកដាក់លើការកាត់លះមែកឈើទាំងនេះផងដែរ ដើម្បីបង្ការទប់ស្កាត់ការបាក់រលំដើមឈើ បង្កគ្រោះថ្នាក់ដល់ប្រជាពលរដ្ឋដែលធ្វើដំណើរឆ្លងកាត់នារដូវវស្សា៕

អត្ថបទ៖ ស្រីរ័ត្ន