លោក គង់ វិបុល រំលឹកឱ្យម្ចាស់អាជីវកម្ម​បំពេញកាតព្វកិច្ច​ចុះបញ្ជីពន្ធដារ ដើម្បីចៀសវាងការផាកពិន័យ​ទោសទណ្ឌ

អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានក្រើនរំលឹកឱ្យម្ចាស់អាជីវកម្ម ដែលមិនទាន់បានចុះ​បញ្ជីពន្ធដារ​ឱ្យមកបំពេញកាតព្វកិច្ចចុះបញ្ជីពន្ធ ដើម្បីចៀសវាងនូវការផាកពិន័យទោសទណ្ឌនានា ក្នុងទិដ្ឋភាពមួយ គឺបានបំពេញកាតព្វកិច្ចចុះបញ្ជីពន្ធដារ និងឈានទៅបំពេញកាតព្វកិច្ចសារពើពន្ធផ្សេងទៀត ហើយក្នុងទិដ្ឋភាពមួយទៀត គឺបង្កើតឱកាសដល់ខ្លួនឯងក្នុងការស្វែងរកដៃគូពាណិជ្ជកម្ម ជាពិសេសការផ្គត់ផ្គង់ទំនិញ ឬសេវាជូនសហគ្រាស ធំៗ។

លោក បានបញ្ជាក់ដូច្នេះថា« បច្ចុប្បន្នគេចង់រកទទួលទានជាមួយអ្នកដែលបានចុះបញ្ជីពន្ធដារត្រឹមត្រូវតែប៉ុណ្ណោះ​ដោយសារពេលមានប្រតិបត្តិការទិញ-លក់ គេនឹងទទួលបានវិក្កយបត្រត្រឹមត្រូវដើម្បីយកទៅកាត់កងចំណាយ ឬអាករលើធាតុចូលបាន»។

បើតាមលោក គង់ វិបុល ការជំរុញការចុះបញ្ជីពន្ធដារ គឺជាការងារអាទិភាពមួយ ក្នុងចំណោមការងារអាទិភាពដទៃទៀត ត្រូវធ្វើការចុះបញ្ជីឱ្យអស់នូវសហគ្រាស ដែលកំពុងប្រកបអាជីវកម្មនៅទូទាំងប្រទេសស្រប​តាមបទប្បញ្ញត្តិស្តីពីពន្ធដារ​ជាធរមាន។

សហគ្រាសទាំងអស់នឹងទទួលបានអត្ថប្រយោជន៍ពីការចុះបញ្ជីនេះ រួមមាន

១. មានឈ្មោះជាសហគ្រាស បានអនុវត្ត ត្រឹមត្រូវតាមច្បាប់កំណត់

២. ទទួលបាននូវសេវាផ្តល់ព័ត៌មាន ជាប្រចាំអំពីដំណើរការនៃប្រព័ន្ធពន្ធដារ និងនីតិវិធីនៃការ កំណត់ពន្ធស្របតាមច្បាប់ និងបទប្បញ្ញត្តិស្តីពីពន្ធដារ

៣. សម្រាប់យន្តការអាករលើតម្លៃបន្ថែម នៅពេលលក់ឱ្យអតិថិជន ជាបុគ្គលជាប់អាករ បុគ្គលនោះអាចទទួលបានអាករលើធាតុចូល ដើម្បីធ្វើការកាត់កងអាករលើធាតុចេញ

៤. ចំពោះចំណាយរបស់បុគ្គលជាប់អាករ នោះអាចអនុញ្ញាតឱ្យកាត់កងបាន

៥. ទទួលបានការលើកទឹកចិត្តផ្សេងៗ ស្របតាមគោលនយោបាយផ្នែកពន្ធដាររបស់រាជរដ្ឋាភិបាល

៦. ការប្រកួតប្រជែងដោយស្មើភាពគ្នារវាងអាជីវកម្មនិង អាជីវកម្ម

៧. អាចទទួលបានការទុកចិត្តពីអ្នកវិនិយោគទុនក្នុងនិងក្រៅប្រទេសក្នុងការ​សម្រេចធ្វើការវិនិយោគជាមួយសហគ្រាស​ដែលមាន អនុលោមភាពពន្ធដារ និងអត្ថប្រយោជន៍ផ្សេងៗ ទៀតផងដែរ។

សូមបញ្ជាក់ថា បច្ចុប្បន្ន អគ្គនាយកដ្ឋានពន្ធដារ បាននិងកំពុងចុះអង្កេតសហគ្រាសនៅ ខណ្ឌដូនពេញ និងខណ្ឌជ្រោយចង្វារ ហើយកិច្ចការនេះ នឹងបន្តអនុវត្តនៅទូទាំងប្រទេស។ ជាមួយគ្នានេះ លោក គង់ វិបុល បានលើកឧទាហរណ៍ថា មានភោជនីយដ្ឋានពីរនៅជាប់គ្នា មួយចុះបញ្ជី និងបង់ពន្ធត្រឹមត្រូវ និងមួយទៀត​មិនបានចុះបញ្ជីនិងបង់ពន្ធសោះ។ តើមានការប្រកួតប្រជែងដោយស្មើភាពឬទេ?។ លោកបញ្ជាក់ថា វិធានការ​អង្កេតសហគ្រាស គឺជាវិធានការមួយក្នុងការពង្រឹងការប្រកួតប្រជែងដោយស្មើភាព (Level Playing Field) និងឆ្លើយតបទៅនឹងសំណូមពររបស់សហគ្រាសដែលរកស៊ីបង់ពន្ធត្រឹមត្រូវ៕