ព័ត៌មានជាតិ

ខេត្តស្វាយរៀងមានប្រភពទឹកធំៗ ៣ ទីតាំង សម្រាប់ពលរដ្ឋធ្វើកសិកម្ម

បានផុស

៣ years មុន

នៅ

ថ្ងៃចន្ទ ៨ ឧសភា ២០២៣

ដោយ

វិស័យកសិកម្ម នៅក្នុងខេត្តស្វាយរៀង បានក្លាយទៅជាវិស័យមួយដ៏សំខាន់ និងមានសក្ដានុពលក្នុងចំណោមវិស័យអាទិភាពនានា។

ជាមួយគ្នានេះ ពាក់ព័ន្ធនឹងការរីកចម្រើនពីមួយឆ្នាំទៅមួយឆ្នាំផ្នែកវិស័យកសិកម្មក៏ដូចជាដំណាំកសិផល ខេត្តស្វាយរៀងមានប្រភពសក្ដានុពលធនធានទឹកសំខាន់ធំៗ ចំនួន ៣កន្លែង ដែលបម្រើដល់ការប្រើប្រាស់ និងស្រោចស្រពដំណាំកសិកម្មដល់ប្រជាពលរដ្ឋទូទាំងខេត្ត គួបផ្សំទាំង ព្រែក អូរ ប្រឡាយ ជាច្រើនកន្លែងទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ស្តីពី «ភាពជោគជ័យរយៈពេល ៥ឆ្នាំរបស់រដ្ឋបាលខេត្តស្វាយរៀង» វិស័យកសិកម្មក្នុងខេត្តអាចរីកចម្រើនទៅបាន ត្រូវមានការពឹងផ្អែកលើប្រព័ន្ធធារាសាស្ត្រ នៃការផ្គត់ផ្គង់ទឹកជាចម្បងផងដែរ។ ដោយហេតុថាវិស័យកសិកម្ម ជាវិស័យអាទិភាពមួយក្នុងខេត្ត ដូច្នេះរដ្ឋបាលខេត្តបានគិតគូរយ៉ាងច្បាស់ពីចំណុចនេះ ហើយដើម្បីអាចឱ្យមានទឹកប្រើប្រាស់គ្រប់គ្រាន់ ខេត្តមានប្រភពសក្ដានុពលធនធានទឹកសំខាន់ធំៗ ៣កន្លែងដូចជា ទន្លេកំពង់ត្រាច ស្ថិតនៅស្រុករមាសហែក, ទន្លេវ៉ៃគោ ស្ថិតក្នុងក្រុងស្វាយរៀង និងព្រែកព្រំដែនកម្ពុជា-វៀតណាម ជាដើម ដែលជាកន្លែងផ្ដល់ប្រភពទឹក គ្រប់រដូវនីមួយៗដល់ពលរដ្ឋ។

លើសពីនេះ ក្រៅពីប្រភពទឹកធំៗទាំង ៣កន្លែង នៅទូទាំងខេត្តស្វាយរៀង ក៏នៅមានប្រព័ន្ធធារាសាស្ត្រសរុបប្រមាណជា ៣៥ ដែលមានប្រព័ន្ធធារាសាស្ត្រតូចចំនួន ០២, ប្រព័ន្ធធារាសាស្ត្រធំចំនួន ០៦ និងមធ្យមមាន ២៧ប្រព័ន្ធ។

ជាក់ស្ដែង ប្រព័ន្ធធារាសាស្ត្រទាំង ៣៥នេះ គិតត្រឹមឆ្នាំ២០២២ មានលទ្ធភាពស្រោចស្រពទៅលើផ្ទៃដីស្រូវប្រាំងប្រមាណ ២១.២០៦ ហិតា, ស្រូវវស្សា ៦៧.៥៧៩ហិតា ស្មើនឹង ៤៧.២៣% ធៀបឆ្នាំ២០១៨ ខុសគ្នា ១២.០៨% ហើយបច្ចុប្បន្ន រដ្ឋបាលខេត្ត ក៏កំពុងស្ថាបនា និងជួសជុលប្រព័ន្ធធារាសាស្ត្រ នៅក្នុងខេត្តបន្ថែមទៀតទៅតាមក្រុងស្រុកនីមួយៗ។

គួរបញ្ជាក់ផងថា នៅទូទាំងខេត្តស្វាយរៀង មានផ្ទៃដីដាំដំណាំកសិកម្មសរុបប្រមាណ ២០៥.៤៧៦ហិតា ក្នុងនោះផ្ទៃដីផលិតកម្មដំណាំស្រូវ ១១៨.០០០ហិតា(ស្រូវវស្សា ១៦៧.៥០០ហិតា និងស្រូវប្រាំង ២០.៥០០ហិតា) និងដំណាំរួមផ្សំ កសិ-ឧស្សាហកម្ម សរុប ១៧.៤៧៦ហិតា(ដំណាំគ្រប់ប្រភេទ ៤.៣២៧ហិតា ផ្ទៃដីដំណាំកៅស៊ូជាលក្ខណៈគ្រួសារចំនួន ២.៣០២ហិតា ផ្ទៃដីដំណាំអំពៅ ស្ករ ៤.៧៥៩ហិតា និងដំឡូងមី ៦.០៨៨ហិតា ផងដែរ៕