ដើមឆ្នាំ​២០២១​នេះ ករណី​គ្រឿង ញៀន​នៅ​ខេត្ត​តា​កែវ​ហាក់​កំរើក​ឡើងវិញ​

​សប្តាហ៍​ទី​៣​ក្នុង​ខែមករា ឆ្នាំ​២០២១​នេះ ករណី​គ្រឿងញៀន​ហាក់​កំរើក​ឡើងវិញ ​ដោយ​ជនសង្ស័យ​ពាក់ព័ន្ធ​មិនតិច​នោះទេ​ ដែល​ប៉ូលីស​តាម​បណ្តា​ស្រុក​នីមួយៗ ​ចាប់​បញ្ជូន​មក​ស្នងកា​រដ្ឋា​ន​នគរបាល​ខេត្តតាកែវ​។

ដោយមាន​ការចង្អុលបង្ហាញ​ពី​សំណាក់​លោក​ឧ​ត្ត​ម​សេនីយ៍​ទោ សុខ សំណាង ស្នងការ​នគរបាល​ខេត្ត​ ក្នុងការ​រក្សាសុខ​សុវត្ថិភាព​ជូន​ពលរដ្ឋ ពិសេស​អនុវត្ត​ឲ្យ​បាន​នូវ​គោលនយោបាយ​ភូមិ ឃុំ​មាន​សុវត្ថិភាព សមត្ថកិច្ចជំនាញ​នៃ​អធិការដ្ឋាន​តាម​បណ្តា​ស្រុក​ក្រុង​ទាំង​១០​នៃ​ខេត្តតាកែវ​បានរឹតបណ្តឹង​បន្ថែមទៀត​ នូវ​ការអនុវត្ត​តួនាទី​តាម​ជំនាញ​របស់ខ្លួន ក្នុងនោះ​ប៉ុន្មាន​ថ្ងៃ​ជាប់ៗ​គ្នា​ករណី​គ្រឿងញៀន​ហាក់​កំរើក​ឡើងវិញ ដោយ​ស្នងការដ្ឋាន​នគរបាល​ខេត្ត​ទទួល​ជនសង្ស័យ​បាន​៥​នាក់​យកមក​សាង​សំណុំរឿង​បញ្ជូនទៅ​តុលាការ​។

ជនសង្ស័យ​ទាំងនោះ​មាន​៖ ស្រុក​គីរីវង់​ចាប់បាន​២​ករណី​ ឃាត់ខ្លួន​ជនសង្ស័យ​២​នាក់។ស្រុក​ទ្រាំ​មាន​១​ករណី ​ឃាត់ខ្លួន​ជនសង្ស័យ​បាន​២​នាក់។និងស្រុកព្រៃកប្បាស១ករណី ឃាត់​ខ្លួនបានម្នាក់​។​​

​បច្ចុប្បន្ន​ជនសង្ស័យ​និង​វត្ថុតាង​ទាំងអស់​ត្រូវបាន​កម្លាំង​ជំនាញ​នៃ​ស្នងការដ្ឋាន​ទទួល​និង​កសាង​សំ​ណុំ​រឿង​បញ្ជូនទៅ​តុលាការ​ចាត់ការ​តាម​នីតិវិធី​៕

អត្ថបទ ៖ វីរៈ​